ស្ទឹងត្រែង ៖ ដោយមើលឃើញភាពលំបាករបស់ប្រជាពលរដ្ឋលោកម៉ុម សារឿន អភិបាលខេត្តស្ទឹងត្រែងរួមជាមួយក្រុមហ៊ុន nissan បាននាំអំណោយមនុស្សធម៌ចែកជូនប្រជាពលរដ្ឋរងគ្រោះដោយទឹកជំនន់ទន្លេមេគង្គចំនួន១០០គ្រួសារនៅសង្កាត់ស្រះឫស្សី ក្រុងស្ទឹងត្រែង កាលពីព្រឹកថ្ងៃទី១៨ ខែសីហាឆ្នាំ២០១៨។
លោកតាន់ចុងម៉ូទ័រអគ្គនាយកក្រុមហ៊ុនខេមបូឌាភីធីវ៉ាយអិលធីឌីបានឲ្យដឹងថា អំណោយ ដែលប្រជាពលរដ្ឋទទួលបានក្នុងមួយគ្រួសារមាន អង្ករ៣០គីឡូក្រាម មី ១កេស ត្រីខ ១យួរ ទឹកសុទ្ធ១វិតាល់កេស អំណោយទាំងនេះគឺជាអំណោយសប្បុរសធម៌របស់ក្រុមហ៊ុន(tan chong motor cambodia) ភីធីវ៉ាយអិលធីឌីនិងជាអ្នកចែកចាយផ្ដាច់មុខនៃរថយន្ត nissanនៅកម្ពុជា។
លោកអគ្គនាយកក្រុមហ៊ុន nissan បានបន្តថា ប្រជាពលរដ្ឋរងគ្រោះដោយទឹកជំនន់ អំណោយទាំងនេះគឺអាចកាត់បន្ថយបាននូវទុក្ខលំបាករបស់ប្រជាពលរដ្ឋបានមួយកម្រិត ទោះជាមិនគ្រប់តាមតម្រូវការក៏ដោយ តែអាជ្ញាធរមិនទុកឲ្យប្រជាពលរដ្ឋណារងទុកលំបាកដោយគ្រោះមហន្តរាយទឹកជំនន់នោះឡើយ។
លោកម៉ុម សារឿន អភិបាលខេត្តស្ទឹងត្រែងបាននាំមកនូវការផ្ដាំផ្ញើរសាកសួរសុខទុក្ខ ពីសំណាក់សម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលជានិច្ចជាកាលសម្ដេចទាំងទ្វេ តែងតែគិតគូរអំពីសុខទុក្ខ របស់បងប្អូនប្រជាពលរដ្ឋនៅគ្រប់ទីកន្លែង ដោយមិនមានការប្រកាន់ ពូជសាសន៍ ពណ៌សម្បុរ និន្នាការនយោបាយ អ្វីឡើយ ហើយសម្ដេចតែងតែគិតគូរជួយសង្គ្រោះប្រជាពលរដ្ឋ ដែលរងគ្រោះមហន្តរាយផ្សេងៗ ឲ្យបានទាន់ពេលវេលា។
លោកអភិបាលខេត្តបានផ្តាំផ្ញើដល់ប្រជាពលរដ្ឋ ឲ្យថែរក្សាសុខភាព រស់នៅមានអនាម័យ ត្រូវបរិភោគទឹកដាំពុះ គេងក្នុងម៉ុង ពិសេសនៅក្នុងរដូវភ្លៀងធ្លាក់នេះ ដែលងាយ និងបង្កជាមេរោគផ្សេងៗ ដែលប្រជាពលរដ្ឋទាំងអស់ត្រូវតែរស់នៅប្រកបដោយអនាម័យ ហូបស្អាត ផឹកស្អាត និងរស់នៅស្អាត ជាពិសេសត្រូវប្រុងប្រយ័ត្នគ្រប់ពេលវេលាក្នុងការធ្វើដំណើរ ព្រោះក្នុងពេលទឹកជំនន់អាចនិងមានសត្វអាសេរពឹសចេញមកបង្កគ្រោះថ្នាក់ដល់ខ្លួនយើង និងក្រុមគ្រួសារយើង៕
Source: Kampuchea Thmey Daily
0 Comments