កាសែត New York Times បានរាយការណ៍កាលពីថ្ងៃអាទិត្យថា រដ្ឋអាជ្ញាសហព័ន្ធបានផ្តោតលើប្រាក់កម្ចីជាង២០លានដុល្លារដែលទទួលបានដោយលោក Michael Cohen ដែលជាអតីតមេធាវីផ្ទាល់របស់ប្រធានាធិបតីសហរដ្ឋអាមេរិកលោក Donald Trump ពីក្រុមហ៊ុនតាក់ស៊ី ដែលជាកម្មសិទ្ធិរបស់គាត់និងគ្រួសាររបស់គាត់។
ប្រាក់កម្ចីនេះគឺជាផ្នែកមួយនៃការស៊ើបអង្កេតថាតើលោក Cohen បានប្រព្រឹត្តការក្លែងបន្លំធនាគារនិងការលួចបន្លំពន្ធដែរឬក៏អត់និងចំពោះការរំលោភលើច្បាប់យុទ្ធនាការដែលទាក់ទងនឹងការបង់ប្រាក់ចំនួន១៣០,០០០ដុល្លារអាមេរិកចំពោះតារាសិច Stormy Daniels ។ ទោះបីជាយ៉ាងណាក៏ដោយ គាត់មិនត្រូវបានចោទប្រកាន់ពីបទល្មើសណាមួយឡើយ។
ដោយលើកឡើងប្រភពពីមនុស្សដែលដឹងពីបញ្ហានេះ កាសែតនេះបាននិយាយថា ប្រាក់កម្ចីនេះគឺមកពីធនាគារជាតិ Sterling និងសហភាពឥណទាន Melrose ដែលជាគ្រឹះស្ថានទាំងពីរនៅទីក្រុងញូវយ៉កដែលធ្វើជំនួញជាមួយឧស្សាហកម្មតាក់ស៊ី។
ទាំងលោក Cohen និងមេធាវីរបស់គាត់មិនបានឆ្លើយតបភ្លាមៗទៅនឹងសំណើសុំយោបល់ទេ។
កាសែតនេះបាននិយាយថា ការស៊ើបអង្កេតកំពុងព្យាយាមកំណត់ថាតើលោក Cohen បានរាយការណ៍ខុសអំពីតម្លៃទ្រព្យសម្បត្តិរបស់គាត់ដែលទទួលបានពីប្រាក់កម្ចីនេះឬក៏យ៉ាងណា។
កាសែតបានចុះផ្សាយថា ពួកគេក៏កំពុងពិនិត្យមើលផងដែរថាតើគាត់គ្រប់គ្រងប្រាក់ចំណូលដោយរបៀបណាហើយថាតើគាត់មិនបានរាយការណ៍ទៅសេវាប្រាក់ចំណូលផ្ទៃក្នុងមែនឬមិនមែន។
កាសែតបានបន្តថា ការស៊ើបអង្កេតកំពុងស្ថិតនៅក្នុងដំណាក់កាលចុងក្រោយហើយរដ្ឋអាជ្ញារកំពុងពិចារណាលើការដាក់ពាក្យបណ្តឹងនៅត្រឹមចុងខែសីហា។
ក្រុមហ៊ុនផ្តល់ប្រាក់កម្ចីទាំងពីរត្រូវបានដាក់ឈ្មោះក្នុងដីកាឆែកឆេរសម្រាប់ការវាយឆ្មក់ដែលឆែកឆេរការិយាល័យ ផ្ទះនិងបន្ទប់សណ្ឋាគាររបស់លោក Cohen ដែលគាត់កំពុងស្នាក់នៅ៕ REUTERS
Source: Kampuchea Thmey Daily
0 Comments