ការប្រកួតប្រដាល់ដណ្តើមពានរង្វាន់ជើងឯក TV5 Boxing Knock Out Series by K.cement ទម្ងន់៥៧គីឡូក្រាម លើសង្វៀន TV5 ព្រែកកំពឹស នៅថ្ងៃសៅរ៍ទី១៧ ខែសីហា ឆ្នាំ២០១៨នេះ ជាការប្រកួតលើកទី២ ក្នុងជម្រុះដំណាក់កាលទីពីរ ដែលមានអ្នកប្រដាល់៤រូប ដែលឆ្លងផុតពីដំណាក់កាលទី១មក ដើម្បីប្រជែងយកកៅអីសម្រាប់ដំណាក់កាលទី៣ ដែលជាវគ្គពាក់កណ្តាលផ្តាច់ព្រ័ត្រនិងផ្តាច់ព្រ័ត្រនោះ។
សម្រាប់ការប្រកួតជម្រុះលើកទី២ ក្នុងដំណាក់កាលទី២នេះ តាំង តាក់អ្នកប្រដាល់ក្លិបរស្មីភូមិគាបខេត្តបន្ទាយមានជ័យ ត្រូវជួបប្រកួតជាមួយវុត្ថា លាន់លិញ អ្នកប្រដាល់ក្លិបអង្គរធំគុនខ្មែរ។
រវាងតាំង តាក់ និង វុត្ថា លាន់លិញនេះ ពួកគេទាំងពីរជាអ្នកប្រដាល់ស្រករក្រោយដូចគ្នា និងមិនធ្លាប់ដែលជួបគ្នាទេកន្លងមក ។ កាលពីក្នុងដំណាក់កាលទី១ តាំង តាក់គេវាយឈ្នះភើយ ថា អ្នកប្រដាល់ក្លិបស្វាយរលំឫទ្ធីជ័យក្នុងទឹកទី១ ។ ឯ វុត្ថា លាន់លិញគេវាយឈ្នះជើងថ្មី គុជសា ចាន់រាជ ក្លិបកុសលកីឡា ក្នុងទឹកទី២។
សម្រាប់ការជួបគ្នារវាងតាំង តាក់ និង វុត្ថា លាន់លិញនេះ តាមក្រុមអ្នកវិភាគប្រដាល់អះអាងនោះថា តាំង តាក់ទំនងជាមិនឈ្នះវុត្ថា លាន់លិញ នោះឡើយ ។ ព្រោះលាន់លិញ វាយបុកខ្លាំងនិងមានផ្លែល្អជាងតាំង តាក់ ហើយថែមទាំងខ្ពស់ជាងទៀតផង ។ ចាំមើល តើវុត្ថា លាន់លិញ អាចយកឈ្នះតាំង តាក់ បានឬអត់ ? ។
ការប្រកួតក្នុងដំណាក់ទី២នេះ ក៏ប្រកួតតែបីទឹកដូចក្នុងដំណាក់កាលទី១ដែរ ហើយអ្នកដែលឈ្នះបានឡើង និងអ្នកដែលចាញ់ត្រូវជ្រុះធ្លាក់ត្រឹមនេះ ។
ចំពោះការប្រកួតមួយគូទៀតនោះ ជាការជួបគ្នារវាងឈាន រស្មី អ្នកប្រដាល់ក្លិបរាជសីហ៍ខេត្តរតនគិរី និង ឡុង រ៉ាមី អ្នកប្រដាល់ក្លិបខ្លារខិនមានរិទ្ធ ។ ពីរនាក់នេះ ក៏មិនធ្លាប់ប៉ះគ្នាដែរកន្លងមក ។
សម្រាប់ការជួបគ្នាលើកនេះ មិនដឹងថានរណា ជាអ្នកមានសំណាងបានឡើងទៅប្រកួតបន្តទៀតនោះទេ ? តែយ៉ាងណា ឈាន រស្មី គេមានកលល្បិចនិងបទពិសោធន៍លើរេញច្រើនជាងឡុង រ៉ាមី ។ប៉ុន្តែឈាន រស្មី ក៏មិនអាចធ្វេសប្រហែសឬមើលស្រាលឡុង រ៉ាមី បានដែរ ព្រោះរ៉ាមីនេះ គេក៏វាយខ្លាំងនិងល្អដែរ និយាយរួមពីរនាក់នេះ គឺត្រូវមានការប្រយ័ត្នរៀងៗខ្លួន។ យ៉ាងណា ការប្រកួតរវាងអ្នកប្រដាល់ទាំងពីរ ទោះជាអ្នកណាឈ្នះ ក៏ឈ្នះដោយវេទនាដែរ ។
កាលពីប្រកួតក្នុងដំណាក់កាលទី១នោះ ឈាន រស្មី វាយឈ្នះស៊ឹម ប៊ុនឆៃ ក្លិបព្រៃទទឹងខេត្តបាត់ដំបង ដោយពិន្ទុ ឯ ឡុង រ៉ាមី គេវាយឈ្នះលី តឿន ក្លិបមកុដរាជសីហ៍ ដោយពិន្ទុដែរ ។ ចាំមើល ក្នុងដំណាក់កាលទី២ រវាង ឈាន រស្មី និង ឡុង រ៉ាមី តើនរណាជួបសំណាងល្អ នរណាជួបសំណាងអាក្រក់នោះ? ។
ចំពោះ ការប្រកួតជាលក្ខណះមិត្តភាពអន្តរជាតិវិញនោះ ពុទ្ធ ឆាយរិទ្ធី អ្នកប្រដាល់ក្លិបពុទ្ធសេរីវង្សកីឡា ត្រូវគេផ្គូអោយជួបប្រកួតជាមួយអ្នកប្រដាល់ថៃ Thai Oulan ដោយ ជួប គ្នាក្នុងប្រភេទទម្ងន់៦៧គីឡូក្រាម ។
ពីរនាក់នេះ ធ្លាប់ជួបគ្នាពីរដងហើយ កាលពីដើមឆ្នាំ២០១៧កន្លងមក ដោយឆាយរិទ្ធីចាញ់ Thai Oulan ទាំងពីរដង ។ ចាំមើល ការជួបគ្នាលើកនេះ ពុទ្ធ ឆាយរិទ្ធីគេអាចមានវាសនាបានឈ្នះ Thai Oulan វិញទេ? ។
ពុទ្ធ ឆាយរិទ្ធី ជាអ្នកប្រដាល់ជើងខ្លាំង ក្នុងចំណោមអ្នកប្រដាល់ជើងខ្លាំងរបស់កម្ពុជា ។ ប៉ុន្តែយ៉ាងណា ឆាយរិទ្ធី គេធ្លាប់វាយចាញ់ Thai Oulan ដល់ទៅ២ដងរួចទៅហើយ ។
Thai Oulan កំណត់ត្រាប្រកួតរបស់គេ គឺ៦៩លើក ឈ្នះ៥៧លើក ចាញ់១២លើក និងមិនដែលស្មើ ហើយពុទ្ធ ឆាយរិទ្ធី គេមានប្រវត្តិប្រកួតចំនួន ៨៩លើក ឈ្នះ៧០លើក ចាញ់១៧លើក និងស្មើ០២លើក ។
ឡាញ់ ផល្លា អ្នកប្រដាល់ក្លិបអេភូថងកីឡា នឹងជួបប្រកួតជាមួយផាន រះ អ្នកប្រដាល់ក្លិបតាព្រហ្មមានជ័យ ។ពីរនាក់នេះ ប្រកួតគ្នាក្នុងទម្ងន់៦០គីឡូ ក្រាម។ឡាញ់ ផល្លា ធ្លាប់ឈ្នះផាន រះ ម្តងហើយកាលពីជួបគ្នាកន្លងមក តែលើកនេះមិនដឹងថាឡាញ់ ផល្លា គេអាចយកឈ្នះផាន រះបានទៀតដែរឬអត់នោះទេ?៕
Source: Kampuchea Thmey Daily
0 Comments