នាយករដ្ឋមន្ត្រីឥណ្ឌាបីដងលោក Atal Bihari Vajpayee បានទទួលមរណភាពកាលពីថ្ងៃព្រហស្បតិ៍ដែលជាហេតុនាំឲ្យមានការឧទ្ទិសបួងសួងពីសំណាក់អ្នកនយោបាយទូទាំងប្រទេស ខណៈមេដឹកនាំបច្ចុប្បន្នលោក Narendra Modi បានកាន់ទុក្ខចំពោះ “ការបាត់បង់ដែលមិនអាចកាត់ថ្លៃបាន” នៃរដ្ឋបុរសគួរជាទីគោរព។
បុរសវ័យ៩៣ឆ្នាំរូបនេះបានប្រយុទ្ធជាមួយនឹងសុខភាពមិនល្អជាច្រើនឆ្នាំមកហើយប៉ុន្តែស្ថានភាពរបស់គាត់បានធ្លាក់ចុះយ៉ាងខ្លាំងនៅក្នុងរយៈពេលប៉ុន្មានថ្ងៃចុងក្រោយនេះ។
លោក Modi បាននិយាយនៅក្នុងការបង្ហោះ Twitter មួយកាលពីថ្ងៃព្រហស្បតិ៍ថា “ការស្លាប់របស់លោក Atal Ji គឺជាការបាត់បង់ផ្ទាល់ខ្លួននិងមិនអាចទទួលយកបានសម្រាប់ខ្ញុំ។ លោក Atal Ji គឺជាអ្នកដឹកនាំគំរូដ៏ល្អដែលបានបង្កើតមូលដ្ឋានគ្រឹះសម្រាប់ប្រទេសឥណ្ឌាដ៏រឹងមាំ វិបុលភាពនិងការបញ្ចូលគ្នានៅក្នុងសតវត្សរ៍ទី២១”។
លោក Vajpayee ត្រូវបានទទួលការព្យាបាលនៅវិទ្យាស្ថានវិទ្យាសាស្ត្រវេជ្ជសាស្ត្រឥណ្ឌា (AIIMS) ក្នុងទីក្រុង Delhi ។
AIIMS បាននិយាយនៅក្នុងសេចក្តីថ្លែងការណ៍មួយថា “ជាអកុសល ស្ថានភាពរបស់គាត់បានធ្លាក់ដុនដាបក្នុងរយៈពេល៣៦ម៉ោងចុងក្រោយហើយគាត់ត្រូវបានគេដាក់ជាមួយប្រព័ន្ធគាំទ្រជីវិត។ យើងបានចូលរួមជាមួយប្រជាជាតិក្នុងការកាន់ទុក្ខចំពោះការបាត់បង់ដ៏ធំនេះ”។
កាលពីល្ងាចថ្ងៃព្រហស្បតិ៍ សពរបស់គាត់ត្រូវបានគេផ្ទេរទៅលំនៅដ្ឋានរបស់គាត់ក្នុងទីក្រុង Delhi ។ លោក Amit Shah ប្រធានគណបក្ស Bharatiya Janata Party (BJP) បាននិយាយថា លោក Vajpayee នឹងត្រូវបូជានៅថ្ងៃសុក្រក្នុងរដ្ឋធានីឥណ្ឌា។
គួរបញ្ជាក់ថា អតីតអ្នកកាសែតនិងកវីដែលប្រែក្លាយទៅជាអ្នកនយោបាយរូបនេះគឺជាមនុស្សម្នាក់ក្នុងចំណោមតំណាងរាស្ត្រគណបក្សប្រឆាំងមួយចំនួននៅខាងក្នុងសភានៅពេលដែលនាយករដ្ឋមន្ត្រីដំបូងរបស់ប្រទេសឥណ្ឌាគឺលោក Jawaharlal Nehru នៅតែកាន់តំណែង។
អាជីពរយៈពេលជាងប្រាំទសវត្សរ៍របស់គាត់បានឈានដល់ចំណុចកំពូលក្នុងទសវត្សរ៍ឆ្នាំ១៩៩០នៅពេលការថ្លែងសុន្ទរកថាយ៉ាងប៉ិនប្រសប់របស់គាត់បានទាក់ទាញមនុស្សរាប់ម៉ឺននាក់ឲ្យប្រមូលផ្តុំគ្នានៅទូទាំងប្រទេស៕ AFP
Source: Kampuchea Thmey Daily
0 Comments