ភ្នំពេញ ៖ លោក លី ឆេង អគ្គនាយកប៊ែលធី និងជាសាកលវិទ្យាធិការសាកលវិទ្យាល័យប៊ែលធី មានប្រសាសន៍ថា ៖ “គ្មានក្តីសប្បាយណា សប្បាយដូចជោគជ័យដែលបានមកពីសមត្ថភាពរបស់ខ្លួនឯង"។
លោកលើកឡើងបែបនេះ ក្នុងឱកាសដែលលោកបានជួបសំណេះសំណាលជាមួយក្មួយៗសិស្សប៊ែលធី និទ្ទេស A ទាំង ៤២រូប កាលពីថ្ងៃទី១៨ ខែ កញ្ញា ឆ្នាំ២០១៨ ដែលសិស្សទាំងនោះ បានប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា ២០១៧-២០១៨។
ពិធីនោះក៏មានការ អបអរសាទរចំពោះសិស្សប៊ែលធី ប៉េង គីមហេង ទទួលបានចំណាត់ថ្នាក់លេខ២ ទូទាំងប្រទេស លំដាប់ពិន្ទុ ៩៩.៩៩៩ និងសិស្សប៊ែលធី ៤១នាក់ផ្សេងទៀត ដែលទទួលបាននិទ្ទេស A ក្នុងការប្រឡងសញ្ញាបត្រមធ្យមសិក្សាទុតិយភូមិ ២០១៨ ។
ក្នុងឱកាសជួបសំណេះសំណាលជាមួយក្មួយៗ សិស្សប៊ែលធី និទ្ទេស A ទាំង ៤២រូប ដែលបានប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា ២០១៧-២០១៨ នោះលោក លី ឆេង បានថ្លែងលើកទឹកចិត្តក្មួយៗទាំងអស់ និងណែនាំឲ្យសិស្សត្រូវបន្តខិតខំប្រឹងប្រែងសិក្សារៀនសូត្របន្ថែមទៀត ដើម្បីទទួលបានជោគជ័យក្នុងការសិក្សាថ្នាក់ឧត្តមសិក្សាលើមុខជំនាញដែលខ្លួនពេញចិត្ត និងក្លាយជាធនធានដ៏មានសារៈសំខាន់បំផុតសម្រាប់ជួយអភិវឌ្ឍប្រទេសកម្ពុជាយើងឱ្យបានរីកចម្រើនរុងរឿងនាពេលអនាគត។
គួរបញ្ជាក់ផងដែរថា សិស្សប៊ែលធី និទ្ទេស A ទាំង ៤២រូប នឹងទទួលបានអាហារូបករណ៍ ឧកញ៉ា លី ឆេង ទៅបន្តការសិក្សានៅសាកលវិទ្យាល័យដៃគូល្បីៗរបស់ប៊ែលធី នៅជុំវិញពិភពលោក មានដូចជា សហរដ្ឋអាមេរិក កាណាដា ជប៉ុន សឹង្ហបុរី ចិន ថៃ ម៉ាឡេស៊ី ជាដើម៕
Source: Kampuchea Thmey Daily
0 Comments