បាត់ដំបង ៖ មន្ត្រីអាវុធហត្ថតែប៉ុន្មានរូបប៉ុណ្ណោះ ដែលជាប់ពាក់ព័ន្ធនឹងករណីជំរិតប្រាក់ពីអ្នករកស៊ីបទល្មើសសត្វព្រៃ តែត្រូវបរាជ័យ នោះ គឺអាចប្រឈមមុខនឹងផ្លូវច្បាប់ បន្ទាប់ពីជនរងគ្រោះបានទម្លាយអាថ៌កំបាំងទាំងអស់ ជុំវិញសកម្មភាពនៃការជំរិតនេះ ព្រោះបានធ្វើឲ្យមានការភ្ញាក់ផ្អើលដល់អាជ្ញាធរ និងសមត្ថកិច្ចជំនាញក្នុងខេត្តសៀមរាប។
យោងតាមចម្លើយរបស់ក្រុមគ្រួសារ សាច់ញាតិដែលកម្ពុជាថ្មីទទួលបាន គឺ កិច្ចប្រតិបត្តិការនោះបានធ្វើឡើង កាលពីវេលាម៉ោង ៣ និង២២នាទី រសៀល ថ្ងៃទី២៨ ខែសីហា ឆ្នាំ២០១៨ នៅ ចំណុច អាង ចុងទឹក ក្នុងតំបន់មេជ្រៃ លើទឹកដីស្រុកពួក ខេត្តសៀមរាប ទើបកម្លាំងប៉េអិមទាំងនេះ បាននាំខ្លួនម្ចាស់សត្វព្រៃមកកាន់ស្នាក់ការ ៥០៨ វិញ ដែលស្ថិតក្នុង ភូមិព្រែកចាស់ ឃុំកោះជីវាំង ស្រុកឯកភ្នំ ខេត្តបាត់ដំបង ដើម្បីធ្វើការចរចា។
នៅក្នុងកិច្ចប្រតិបត្តិការនេះដែរ ក៏មានការចូលរួមពីមន្ត្រីប៉េអិមដ៏ឆ្នើមម្នាក់ ដែលល្បីថា ពូកែរកលុយ គឺឈ្មោះ ទ្រី តិចសែ ផងដែរ រហូតឈានដល់ការឃាត់ខ្លួនមុខសញ្ញាម្នាក់ ឈ្មោះ តី តុលា ភេទប្រុស អាយុ២៩ឆ្នាំ មុខរបរនេសាទ រស់នៅភូមិថ្វាង ឃុំកោះជីវាំង ស្រុកឯកភ្នំ ខេត្តបាត់ដំបង រួមជាមួយនឹងកាណូតស្មាច់ ១ គ្រឿង រួមជាមួយនឹងសត្វព្រៃមួយចំនួនថែមទៀត។
បងប្រុសរបស់ជនរងគ្រោះ ដែលមានឈ្មោះ រស្មី ជាអ្នករត់ការចេញមុខដើម្បីដោះស្រាយបានរៀបរាប់ថា នៅទីនោះ គឺម៉ោងប្រមាណ ជាង៩យប់ ខ្លួនបានធ្វើដំណើរស្កាត់មករកប្អូននិងដើម្បីធ្វើការសម្របសម្រួលជាមួយមន្ត្រីឆ្នើមៗរបស់ប៉េអិម បន្ទាប់ពីប្អូនប្រុសរបស់ខ្លួន ត្រូវបានគេបញ្ជូនទៅលើទឹកដីស្រុកពួកវិញ គឺកម្លាំងប៉េអិមខេត្តបាត់ដំបង បានបើករថយន្តម៉ាកឡង់គ្រីស័រ ពណ៌ព្រីងទុំ ទៅកាន់ទីតាំងខាងលើ ព្រមទាំងបានវ៉ៃខ្នោះប្អូនរបស់ខ្លួន ឲ្យអង្គុយនៅក្នុងរថយន្តឯខ្លួនបានជួបជាមួយមន្ត្រីប៉េអិមទាំងនោះ ដែលពួកគេមានឈ្មោះ សែ ឈ្មោះ ទុំ និងឈ្មោះ ភក្តិ ដោយដំបូងគេបានប្រើភាសាថា មេឲ្យបង់លុយ ១ ម៉ឺនដុល្លារ បើមិនបានទេ និងបញ្ជូនទៅដាក់គុកយ៉ាងតិចក៏ ៧ ខែដែរ។
ឈ្មោះរស្មីបានបន្ថែមថា ខ្លួនក៏បានតថ្លៃសុំឲ្យចុះបន្តិចម្តងៗ ហើយនៅពេលនោះដែរខ្លួនក៏បានទាក់ទងទៅពូ ទៅប្រពន្ធ ទៅឪពុក និងទៅបងប្អូន ដើម្បីរកប្រាក់មកធានាយកប្អូនប្រុសត្រឡប់ទៅវិញ ប៉ុន្តែការរកលុយទាំងយប់សែនពិបាក ព្រោះទូរស័ព្ទទៅណាក៏គេគ្មានលុយដែរ ដោយការចរចានៅតែបន្តរហូតដល់ម៉ោង១០យប់ ពេលនោះឈ្មោះភក្តិ បាននិយាយថា មេឲ្យចុះនៅត្រឹម ៧០០០ ដុល្លារ ហើយក៏បានចុះបន្តទៀត បន្ទាប់ពីការជំរិតនេះមិនបានសម្រេច ដោយសារតែការរកប្រាក់របស់ជនរងគ្រោះរកមិនបាន នៅទីបំផុតតម្លៃត្រូវបានធ្លាក់មកនៅត្រឹម៣៥០០ដុល្លារ ហើយត្រូវរកមកបង់ឲ្យពួកគេទាំងយប់ បើទោះបីជាឈ្មោះរស្មី សុខចិត្តធ្វើកិច្ចសន្យាផ្តិតមេដៃ ក្នុងការធានាសងយ៉ាងណាក៏ដោយ។
ទីបំផុតនៅពេលដែលជនរងគ្រោះកំពុងទាក់ទងទៅភរិយាដើម្បីរកប្រាក់ ស្រាប់តែរឿងនេះក៏ត្រូវបានបែកធ្លាយ ទើបកម្លាំងប៉េអិម កម្លាំងបរិស្ថាន កម្លាំងមេព្រៃ និងអាជ្ញាធរស្រុកពួក ចុះទៅដល់ចំណុចខាងលើ ព្រមទាំងបានស្តីបន្ទោសថា ហេតុអ្វីបានជាមកយកបទល្មើសឆ្លងដែនបែបនេះ គឺនៅពេលនោះខាងប៉េអិមស្រុកពួក សឹងតែចង់ប្រទាញប្រទង់យក ជនល្មើសទៅកាន់ខេត្តសៀមរាបវិញ ប៉ុន្តែក្រោយមកក៏ព្រមឲ្យនាំខ្លួនមកកាន់ ទីបញ្ជាការដ្ឋាន កងរាជអាវុធហត្ថខេត្តបាត់ដំបង ទាំងយប់ ដោយសារតែការចរចាត្រូវបរាជ័យ។
ដោយឡែកជនសង្ស័យដែលរកស៊ីជួញដូរសត្វព្រៃ ក៏ដូចជាជនរងគ្រោះដែលត្រូវប៉េអិមចាប់ជំរិត និងបង្ខាំងរាងកាយផងនោះ គឺឈ្មោះ តី តុលា បានរៀបរាប់ថា នៅពេលដែលគេនាំខ្លួនយកទៅកាន់ទឹកដីស្រុកពួក គឺគេបានវ៉ៃខ្នោះ ហើយបានដាក់ខ្លួនឲ្យនៅក្នុងរថយន្តរហូតរង់ចាំការចរចាគ្នា ដែលនៅក្នុងរថយន្តនោះគឺមានឈ្មោះ ភក្តិ ឈ្មោះ ទុំនិងឈ្មោះ សែ ឯម្នាក់ទៀតខ្លួនមិនបានស្គាល់ទេ ដោយសារតែគេជាប៉េអិមមកពីបាត់ដំបង។
នៅក្នុងរថយន្តខ្លួនមានការលំបាកខ្លាំងដោយសារតែគេបានគំរាមអំពីការវាយដំ និងរឿងគុក ច្រវាក់ ហើយគេបាននិយាយថា បើមិនសម្របសម្រួលគ្នានៅទីនេះទេ គឺនៅពេលដែលត្រូវបញ្ជូនទៅខេត្ត អ្ហែងក៏ត្រូវអស់ច្រើនជាងនឹងទៀត ទៅលើជំនាញ ព្រោះត្រូវបង់ឲ្យតុលាការយ៉ាងតូចក៏ ៧០០០ ទៅ ១០ ០០០ ដុល្លារដែរទើបអាចរួចខ្លួន។ ពេលខ្លួនសុំចុះនោមក៏ត្រូវបានគេគំរាមរកវ៉ៃដែរ ដោយគេបានក្របួច កអាវជាប់ឲ្យនោមទាំងដៃជាប់ខ្មោះ ដូចជាបទល្មើសនេះ ជាទោសសម្លាប់មនុស្សដែរ បានជាគេធ្វើសាហាវបែបនេះ។
ជុំវិញករណីបង្ខាំងរាងកាយដើម្បីជំរិតទារប្រាក់នេះ ឈ្មោះ តី តុលា បានលើកឡើងថា ខ្លួនមានបំណងចង់ដាក់ពាក្យប្តឹងទៅលើមន្ត្រីប៉េអិមទាំងនោះវិញដែរ ប៉ុន្តែខ្លួនមិនសូវយល់អំពីផ្លូវច្បាប់ទាល់តែសោះបន្ទាប់ពីជនរងគ្រោះរូបនេះត្រូវបានមេព្រៃធ្វើការពិន័យជាទឹកប្រាក់អស់ ៧ ៤៤០ ០០០រៀល និងបានដោះលែងឲ្យមានសេរីភាពរួចមក។
ដោយឡែក លោក ព្រះរាជអាជ្ញារង ប៉ង់ ចាន់សុយុទ្ធារ៉ា ដែលជាអ្នកកាន់រឿងនេះ បានបញ្ជាក់យ៉ាងខ្លីថា រឿងនេះគឺខណ្ឌរដ្ឋបាលព្រៃឈើ បានធ្វើមួយជំហានហើយ ចំណែកតុលាការ កំពុងរង់ចាំទទួលឯកសារ និងសំណុំរឿងនេះ ធ្លាក់មកដល់ដៃ ទើបពិនិត្យនិងចាត់វិធានការតាមជាក់ស្តែង៕
Source: Kampuchea Thmey Daily
0 Comments