ភ្នំពេញ ៖ បន្ទាប់ពីបានកសាងរួចរាល់ជាស្ថាពរ រូបសំណាកសម្តេចព្រះមហា សុមេធាធិបតីជោត្តញ្ញាណ្ណោ ជួនណាត ធ្វើអំពីស្ពានចំណាយថវិកាប្រមាណ១ម៉ឺនដុល្លារអាមេរិក ត្រូវបានរៀបចំក្រុងពាលីតាមបែបប្រពៃណីទំនៀមទម្លាប់ខ្មែរ និង សម្ពោធដាក់ឲ្យគោរពបូជា តម្កល់ទុកនៅក្នុងបរិវេណនៃវិទ្យាល័យទួលទំពូង រាជធានីភ្នំពេញ កាលពីល្ងាចថ្ងៃទី៣ ខែកញ្ញា ឆ្នាំ២០១៨ ក្រោមការអញ្ជើញចូលរួមពីសំណាក់ លោក អ៊ាង សុផល្លែត ជាអ្នកផ្តួចផ្តើមនិងសហការី រួមទាំងលោកគ្រូ អ្នកគ្រូ សិស្សានុសិស្សជាច្រើនផងដែរ។
លោក អ៊ាង សុផល្លែត ទីប្រឹក្សាផ្ទាល់ សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា និងជាអនុរដ្ឋលេខាធិការក្រសួងបរិស្ថាន បានមានប្រសាសន៍ឲ្យដឹងថា រូបសំណាកសម្តេចព្រះមហា សុមេធាធិបតីជោត្តញ្ញាណ្ណោ ជួនណាត កើតចេញពីកត្តាសាមគ្គីភាព របស់អតីតសិស្សវិទ្យាល័យទួលទំពូងបាក់ឌុបជំនាន់ទី១ឆ្នាំសិក្សា១៩៨៥-១៩៨៦ក្នុងនោះរូបលោកផ្ទាល់ក៏សិស្សវិទ្យាល័យនេះ ផងដែរ។ ការកសាងរូបសំណាកនេះឡើងដើម្បីតម្កល់ទុកជានិមិត្តរូប នៃការគោរពនូវចំណេះដឹង គុណធម៌ សីលធម៌ និងគុណតម្លៃ នៃពូជខ្មែរយើងសម្រាប់សិស្សជំនាន់ក្រោយបានសិក្សារៀនសូត្រពីគំរូវីរភាពរបស់សមេ្តច។
តាមរបាយការណ៍របស់លោក កុយ សេដា នាយកវិទ្យាល័យទួលទំពូង បានគូសបញ្ជាក់ឲ្យដឹងថា ក្នុងឆ្នាំសិក្សា២០១៧-២០១៨នេះវិទ្យាល័យទួលទំពូង បានចូលរួមប្រលងសិស្សពូកែទូទាំងប្រទេស ទទួលបានមេដាយមាស ផ្នែកអក្សរសាស្ត្រខ្មែរថ្នាក់ទី១២។ មិនតែប៉ុណ្ណោះ សិស្សានុសិស្សបានចូលរួមប្រកួតប្រជែងផ្នែកវិទ្យាសាស្ត្រ និងវិស្វកម្ម ទទួលបានពានរង្វាន់លេខ១ ទូទាំងរាជធានីភ្នំពេញ និងបានទៅចូលរួមប្រកួតប្រជែងនៅ អាស៊ាន ប្រទេសឥណ្ឌូនេស៊ី ទទួលបានពានរង្វាន់លេខ១ ផងដែរ៕
Source: Kampuchea Thmey Daily
0 Comments