លី​គ​កំពូល​កម្ពុជា ​៖ ​ណាហ្គា​វើ​ល គ្រង​ជើងឯក ខណៈ​ទ័ព និង​អាស៊ី​អឺរ៉ុប សុទ្ធតែ​ឈ្នះ​ដូចគ្នា​

ក្រុមបាល់ទាត់​ណាហ្គា​វើ​ល បាន​គ្រង​ជើងឯក​ពានរង្វាន់​លី​គ​កំពូល​កម្ពុជា (Metfone Cambodian League 2018) រដូវ​កាល​ឆ្នាំ​២០១៨ ក្រោយ​រកបាន​ពិន្ទុ​ច្រើនជាងគេ​ត្រឹម​សប្ដាហ៍​ទី​២២ ខណៈ​សប្ដាហ៍​ចុងក្រោយ​ដែល​ធ្វើឡើង​នៅ​ថ្ងៃ​សៅរ៍ ទី​២៩ ខែ​ក​ញ្ញា ឆ្នាំ​២០១៨ នេះ​ក្រុម​ក្រសួងការពារជាតិ (​ទ័ព​) និង​ក្រុម​អាស៊ី​អឺរ៉ុប សុទ្ធតែ​រកបាន​ជ័យជម្នះ​ដូចគ្នា​។



គណៈកម្មការ​រៀបចំ​កា​រ​ប្រកួត​បាល់ទាត់​ជាតិ​កម្ពុជា (CNCC) បានរៀបចំ​ពិធី​ប្រគល់​ពានរង្វាន់​និង​មេដាយ​សម្រាប់​ក្រុម​ជើងឯក​ណាហ្គា​វើ​ល រួចរាល់​ហើយ ខណៈ​ពានរង្វាន់​ជាច្រើន​ដទៃទៀត ក៏ដូចជា​មេដាយ​ជ័យលាភី​ជើងឯក​រង និង​ក្រុម​លេខ​៣ ព្រមទាំង​ពានរង្វាន់​ឯកត្តជន​ជាច្រើន​ទៀត​នឹងធ្វើ​ក្នុង​ពិធី Cambodian Awards Night នៅ​ចុង​ឆ្នាំនេះ​។



សរុប​លទ្ធផល​ចុងក្រោយ​ក្រុម​ណាហ្គា​វើ​ល បាន​យកឈ្នះ​លើ​ក្រុម​អគ្គស្នងការដ្ឋាន​នគរ​បាល​ជាតិ ដោយ​លទ្ធផល​៦​ទល់​២ លើ​ទីលាន​ពហុ​កីឡដ្ឋាន​ជាតិ​។ កីឡាករ Inui Tatsuro បា​នរក​គ្រាប់​បាល់​បើកឆាក​នៅ​នាទី​២៦ ខណៈ​កីឡាករ Bisan George បា​នរក​គ្រាប់​បាល់​៤​គ្រាប់​ម្នាក់ឯង​គឺ​នៅ​នាទី​៤៥+១,៥៨,៦១ និង​៩០ និង​កីឡាករ គួច ដា​នី បា​នរក​គ្រាប់​បាល់​ចុងក្រោយ​នៅ​នាទី​៦៧​។ ចំណែក​២​គ្រាប់​របស់​ក្រុម​អគ្គស្នងការដ្ឋាន​នគរ​បាល​ជាតិ រកបាន​ដោយ​កីឡាករ Suzuki Yuta នៅ​នាទី​៦៣​និង​កីឡាករ Oladipupo Abiodun Michael នៅ​នាទី​៨៦​។

ចំណែក​ក្រុម​ក្រសួងការពារជាតិ វិញ​បាន​យកឈ្នះ​លើ​ក្រុម​អគ្គីសនី​កម្ពុជា ដោយ​លទ្ធផល​៩​ទល់​១ លើ​ទីលាន​កីឡដ្ឋាន​អគ្គីសនី​កម្ពុជា​។ កីឡាករ ង៉ែត លី​ទី បា​នរក​គ្រាប់​បើកឆាក​អោយ​ក្រុម​ក្រសួងការពារជាតិ នៅ​នាទី​ទី​៥ ខណៈ​ប្រធាន​ក្រុម រ៉ឹ​ម ប៊ុន​ហៀ​ង រកបាន​៣​គ្រាប់​គឺ​នៅ​នាទី​៣២,៦៦​និង​៨០ ហើយ​កីឡាករ Na Hyon Sung រកបាន​២​គ្រាប់​នៅ​នាទី​៥០​និង​៦០ និង​កីឡាករ Yudai Ogawa រកបាន​៣​គ្រាប់​នៅ​នាទី​៥៦,៧២​និង​៩០​។



ចំពោះ​ក្រុម​អាស៊ី​អឺរ៉ុប បាន​យកឈ្នះ​លើ​ក្រុម​វេ​ស្ទើ​ន​ភ្នំពេញ លើ​ទីលាន​កីឡដ្ឋាន​វេ​ស្ទើ​ន ដោយ​លទ្ធផល​៧​ទល់​៣​។ កីឡាករ Privat បា​នរក​គ្រាប់​បាល់​៥​គ្រាប់​ម្នាក់ឯង​ក្នុង​ប្រកួត​នេះ​ឱ្យ​អាស៊ី​អឺរ៉ុប ហើយ​កីឡាករ Kelechi រកបាន​១​គ្រាប់ និង​កីឡាករ ឈឹម សំបូរ រកបាន​១​គ្រាប់​។ ចំណែក​៣​គ្រាប់​របស់​វេ​ស្ទើ​ន​ភ្នំពេញ រកបាន​ដោយ​កីឡាករ សឿង បញ្ញា នៅ​នាទី​៥៦​និង​៦៤ ស្របពេល​កីឡាករ យ៉ាន់ សុខា រកបាន​១​គ្រាប់​នៅ​នាទី​៦៨​។

ចំណែក​ប្រកួត​៣​គូ​ផ្សេងទៀត​ប្រចាំ​សប្ដាហ៍​ចុង​ក្រោយនេះ​ត្រូវធ្វើឡើង​នៅ​ថ្ងៃអាទិត្យ ទី​៣០​ខែកញ្ញា ឆ្នាំ​២០១៨ ដោយ​ក្រុម​ព្រះខ័ន​រាជ​ស្វាយរៀង ប៉ះ​ក្រុម​វិសាខា នៅ​ម៉ោង​៦​ល្ងាច​លើ​ទីលាន​កីឡដ្ឋាន​ខេត្តស្វាយរៀង មាន​ផ្សាយ​ផ្ទាល់​តាម​ប៉ុស្តិ៍ BTV News ខណៈ​ក្រុម​បឹងកេត​ជួប​ភ្នំពេញ​ក្រោ​ន នៅវេលា​ម៉ោង​៦​ល្ងាច​ដូចគ្នា​លើ​ទីលាន​ពហុ​កីឡដ្ឋាន​ជាតិ មាន​ផ្សាយ​ផ្ទាល់​តាម CNCC និង​ក្រុម​សូល​ទី​ឡូ​អង្គរ ប៉ះ​ក្រុម​អង្គ​រថា​យ​ហ្គឺ​រ នៅវេលា​ម៉ោង​៣និង៣០​នាទី​លើ​ទីលាន​កីឡដ្ឋាន​ខេត្តសៀមរាប មាន​ផ្សាយ​ផ្ទាល់​តាម​ហ្វេ​ស​ប៊ុ​ក​កម្ពុ​ជាថ្មី​៕

Source: Kampuchea Thmey Daily