ភ្នំពេញ ៖ ដោយសារមើលឃើញពីសមត្ថភាពនិងសន្ទុះនៃការគាំទ្ររបស់អតីតបេក្ខជនប្រឡងកម្មវិធី ចម្រៀងពិភពលោក Cambodia idolលោក រស់ ព្រួយ ថ្មីៗនេះកវីនិពន្ធវ័យក្មេងម្ចាស់បទ កូនខុសហើយម៉ែ ច្រៀងដោយលោក ប៊ុត សីហា និងបទ រងា ច្រៀងដោយតារាចម្រៀងពហុជំនាញអ្នកនាង ខាត់ សុឃីម គឺលោក ស៊ីវ ចន្ទ បានជ្រើសនិពន្ធបទចម្រៀងដែលមានអត្ថន័យបង្កប់ការអប់រំដល់យុវវ័យទាក់ទងការធ្វើអំពើរល្អសម្រាប់សង្គម។
ការជ្រើសនិពន្ធបទថ្មីដែលមានចំណងជើងថា កោរសក់សាងបុណ្យ ពីសំណាក់អ្នកនិពន្ធវ័យក្មេងលោក ស៊ីវ ចន្ទ ដើម្បីឲ្យតារាចម្រៀងពន្លកថ្មីលោក រស់ ព្រួយ ច្រៀងចេញចរាចរណ៍ទាញយកទីផ្សារគាំទ្រនិងប្រជាប្រិយភាពលើវិស័យសិល្បៈនាពេលនេះ ដោយហេតុថាលោកបានសហការជាមួយលោកលី ប៊ុនលិ ជាអ្នកនិពន្ធរួមអាជីព ហើយក៏បានផ្ញើបទនេះអោយទៅរស់ព្រួយ ច្រៀងតែម្តង។ម្យ៉ាងទៀតដោយសារតែការចូលចិត្តស្រលាញ់សំឡេង និងសមត្ថភាពលោក រស់ ព្រួយផងដែរ។
លោក ស៊ីវ ចន្ទ បានបញ្ជាក់ថា មូលហេតុដែលជំរុញឲ្យខ្ញុំសរសេរបទនេះឡើងគឺចង់បង្ហាញនិងឆ្លុះបញ្ចាំងពីសង្គមពិតព្រោះបច្ចុប្បន្ន យុវវ័យមួយចំនួនជ្រុលខ្លួនដើរផ្លូវខុសបំផ្លាញខ្លួនឯងគ្រួសារ និងសង្គមជាតិ ដោយសារថ្នាំញៀន ធ្វើអោយសង្គមស្អប់ខ្ពើម។ ខ្ញុំសូមផ្តាំផ្ញើទៅយុវវ័យគ្រប់រូបត្រូវជៀសឆ្ងាយពីគ្រឿងញៀន ហើយខំធ្វើបុណ្យជូនម្តាយឪពុកទាន់ពេលវេលារដូវបុណ្យភ្ជុំបិណ្ឌគៀចូលមកដល់នាពេលខាងមុខនេះ។
អ្នកនិពន្ធលោក ស៊ីវ ចន្ទ បន្ថែមថា បទនេះពិតជាកម្សត់ហើយប្លែក ខណៈដែលអតីតបេក្ខជនប្រឡងកម្មវិធីពិភពលោក Cambodia idol លោក រស់ ព្រួយ បានចេញបទថ្មី កោរសក់សាងបុណ្យយ៉ាងពីរោះហើយកម្សត់ សម្រាប់កូនប្រុសដែលធ្វើខុសចំពោះអ្នកមានគុណខ្លាំងរហូតដល់កោរសក់សាងបុណ្យ ធ្វើបុណ្យជូនម្តាយ ឪពុក។
សូមបញ្ជាក់ថា តារាចម្រៀងលោក រស់ ព្រួយ គឺជាតារាចម្រៀងដែលមានដើមកំណើតមកពីខេត្ត ឧត្តរមានជ័យ ហើយខ្សែជីវិតលោកពិតជាកម្សត់ និងរស់ក្នុងជីវភាពគ្រួសារខ្វះខាតតែដោយចិត្តស្រលាញ់វិស័យសិល្បៈ លោកក៏បានតស៊ូជាច្រើនកន្លងមកព្រោះចង់កែប្រែជោគវាសនា របស់ខ្លួននិងគ្រួសារទាំងមូលផងដែរ។ ម្យ៉ាងទៀតលោករស់ ព្រួយនឹងមានអ្វីដែលប្លែកៗសម្រាប់បទក្រោយៗដើម្បីបម្រើអារម្មណ៍ទស្សនិកជន៕
Source: Kampuchea Thmey Daily
0 Comments