ភ្នំពេញ ៖ ក្រសួងអប់រំ យុវជន និងកីឡាបានអះអាងថា ការប្រកាសផ្សព្វផ្សាយលទ្ធផលប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នឹងត្រូវប្តូរមកប្រកាសនៅថ្ងៃទី០៩ ខែកញ្ញា ឆ្នាំ២០១៨ សម្រាប់រាជធានីភ្នំពេញ និងខេត្តកណ្ដាល ដោយឡែកសម្រាប់មណ្ឌលផ្សេងទៀត នឹងប្រកាសលទ្ធផលនៅថ្ងៃទី១០ ខែកញ្ញា ឆ្នាំ២០១៨។
យោងតាមសេចក្តីជូនដំណឹងរបស់ក្រសួងអប់រំយុវជននិងកីឡាដែលបានចេញផ្សាយកាលពីថ្ងៃទី០៦ ខែកញ្ញាឆ្នាំ២០១៨បានឲ្យដឹងថា ការប្រកាសលទ្ធផលមុនកាលបរិច្ឆេទកំណត់នេះ ដោយសារដំណើរការកំណែនិងដំណើរការស្រង់បូកពិន្ទុ និងផ្ទៀងផ្ទាត់ពិន្ទុតាមប្រព័ន្ធកុំព្យូទ័រ បានប្រព្រឹត្តទៅដោយរលូន និងតម្លាភាពប្រកបដោយស្មារតីយកទុកដាក់ និងទទួលខុសត្រូវខ្ពស់ពីសំណាក់ប្រធាន អនុប្រធាននិងសមាជិកអនុគណៈកម្មការទាំងអស់ដែលពាក់ព័ន្ធខណៈពីដំបូងក្រសួង គ្រោងនឹងប្រកាសលទ្ធផលការ នៅថ្ងៃទី១១ និង ១២ ខែកញ្ញា។
សូមជម្រាបថា លទ្ធផលនៃការប្រឡងបាក់ឌុប ឆ្នាំ២០១៨នេះ ក៏មានផ្សាយតាមរយៈទំព័រហ្វេសប៊ុកផ្លូវការក្រសួងអប់រំផងដែរ Facebook.com/moeys.gov.kh។
ការប្រឡងបាក់ឌុបឆ្នាំនេះមានបេក្ខជនចូលរួមប្រឡងចំនួន១១ ៥២៦៨នាក់ស្រី ៥៨ ១៥៨ នាក់ក្នុងនោះមានបេក្ខជនអវត្តមានចំនួន១៨៩៩នាក់ស្រី៧៤៤នាក់ស្មើនឹង១.៦៥ភាគរយ។
ក្នុងនោះមានបេក្ខជនមានបញ្ហាសុខភាពចំនួន៦៤ករណីដូចជាវិលមុខ ខ្យល់គ ខ្សោយកម្លាំងដោយសារការទទួលទានអាហារនិងសម្រាកមិនបានគ្រប់គ្រាន់ប៉ុន្តែអាចដំណើរការប្រឡងបន្តទៀតបាន បន្ទាប់ពីទទួលបានការសង្គ្រោះបឋមក្នុងនោះមានបេក្ខជន៥នាក់មិនអាចបន្តការប្រឡងបានដោយសារស្ថានភាពសុខភាពធ្ងន់ធ្ងរ។មានបេក្ខជនមានកំហុសឆ្គងចំនួន៧ករណីក្នុងនោះមាន៥នាក់យកទូរស័ព្ទដៃចូលនិង២នាក់ទៀតយកឯកសារចូល។ ចំណែកគណៈមេប្រយោគមានកំហុសឆ្គងដោយមានទុកជាប់ខ្លួននិងប្រើទូរស័ព្ទដៃនៅក្នុងមណ្ឌលប្រឡងចំនួន៥ករណី។
ទោះបីជាយ៉ាងណាក៏ដោយការប្រឡងបាក់ឌុបនៅឆ្នាំនេះប្រព្រឹត្តតិទៅដោយរលូននិងមានលក្ខណៈល្អប្រសើរជាងបណ្តាឆ្នាំមុនៗទៅទៀដោយសារតែមានការសហការបានយ៉ាងល្អពីគ្រប់ភាគីពាក់ព័ន្ធទាំងអស់រួមមានក្រសួងអប់រំ អ្នកសង្កេតការណ៍ អង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា និងអាជ្ញាធរមានសមត្ថកិច្ចពាក់ព័ន្ធពិសេសបេក្ខជនប្រឡងបានបំពេញភារកិច្ចនិងគោរពតាមបទបញ្ញត្តិរបស់ក្រសួងបានល្អ៕
Source: Kampuchea Thmey Daily
0 Comments