រតនគិរី ៖ យុវជនម្នាក់ បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ បន្ទាប់ពីជិះម៉ូតូចេញពីខេត្តបានធ្វើដំណើរទៅផ្ទះវិញ មិនទាន់ដល់ផ្ទះផង ស្របជាមួយគ្នានោះដែរ មានរថយន្តមួយគ្រឿងមិនស្គាល់ម៉ាកបើកបរនៅពីមុខ ក៏ជ្រុលចង្កូតទៅបុកគូទរថយន្តពីក្រោយយ៉ាងពេញទំហឹងតែម្តង បណ្តាលឲ្យបាក់ដៃខាងស្តាំ និងផុងលលាដ៍ក្បាលស្លាប់មួយរំពេច។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បានកើតឡើងនៅវេលាម៉ោង៩និង១៨នាទីយប់ ថ្ងៃពុធ ១១រោច ខែស្រាពណ៍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៦ ខែកញ្ញា ឆ្នាំ២០១៨ នៅតាមបណ្តោយផ្លូវជាតិលេខ៧៨ នៅក្បែរស្នាក់ការគយ ស្ថិតនៅភូមិ១ សង្កាត់កាចាញ ក្រុងបានលុង។
ប្រភពពីកន្លែងកើតហេតុបានឲ្យដឹងថា នៅមុនពេលកើតហេតុ គេបានឃើញម៉ូតូមួយគ្រឿងជិះដោយយុវជនម្នាក់ក្នុងទិសដៅពីកើតទៅលិចក្នុងល្បឿនយ៉ាងលឿន ដល់ត្រង់ចំណុចកើតហេតុក៏បុកគូទរថយន្តមួយគ្រឿងមិនស្គាល់ម៉ាក ខណៈបើកបរស្របទិសគ្នា យ៉ាងពេញទំហឹង ហើយបានស្លាប់នៅកណ្តាលផ្លូវហូរឈាមដាប បានបន្សល់ទុកថ្នាំរថយន្តពណ៌ស នៅកន្លែងកើតហេតុ ហើយបានគេចខ្លួនបាត់ស្រមោលតែម្តង។
លោក សួន សាវុធ នាយប៉ុស្តិ៍កាចាញបានឲ្យដឹងថា យុវជនរងគ្រោះឈ្មោះ ឃាន គន្ធា អាយុ ២៥ឆ្នាំ ជនជាតិខ្មែរ មុខរបរស៊ីឈ្នួលបើកបររថយន្តដេប៉ូលក់គ្រឿងសំណង់ ទ្រីសាន នៅក្រុងបានលុង (ស្លាប់) មានទីលំនៅភូមិគ៦០ ឃុំត្រពាំងច្រេស ស្រុកកូនមុំ ជិះម៉ូតូមួយគ្រឿងម៉ាក អ៉ិចស៊ិនធ័រ ពណ៌ខ្មៅ អត់ស្លាកលេខ បានខូចខាតអស់ទាំងស្រុង។
ក្រោយកើតហេតុនគរបាលប៉ុស្តិ៍កាចាញបានចុះមកអន្តរាគមន៍ទំនាក់ទំនងទៅរថយន្តសង្គ្រោះស្នងការនគរបាលខេត្ត បន្ទាប់មកបានទាក់ទងទៅសាច់ញាតិមកទទួលយកសព ហើយបានយករថយន្តចរាចរណ៍ខេត្តដឹកសពទៅលំនៅឋានដើម្បីរៀបចំធ្វើបុណ្យតាមប្រពៃណី។ រីឯម៉ូតូត្រូវបាននគរបាលចរាចរណ៍យកមករក្សាទុកនៅស្នងការដ្ឋាននគរបាលខេត្ត៕
Source: Kampuchea Thmey Daily
0 Comments