អ្នកប្រដាល់ជើងខ្លាំង និងជាម្ចាស់មេដាយស៊ីហ្គេមឆ្នាំ២០១៧របស់កម្ពុជា គឺពេជ្រម្ទេសខ្មាំង ក្លិបអារុណរះកីឡា បានស្វាគមន៍អ្នកប្រដាល់ថៃ Moeung Phich ដែលបានសុំសងសឹកវិញ ក្នុងកម្មវិធីប្រដាល់មិត្តភាពអន្តរជាតិBoostrong Fighter On Fire នៅលើសង្វៀនSEA-T V នាព្រឹកថ្ងៃអាទិត្យទី០៩ខែកញ្ញា ឆ្នាំ២០១៨នេះ។
Moeung Phich អ្នកប្រដាល់ជើងខ្លាំងថៃ បានវាយចាញ់ពេជ្រ ម្ទេសខ្មាំង ក្នុងទឹកទី៣ កាលពីជួបគ្នាថ្ងៃទី២៥សីហាកន្លងទៅ។ Moeung Phich ត្រូវម្ទេសខ្មាំងវាយដួលនៅដើមទឹកទី៣ ធ្វើអោយអាជ្ញាកណ្តាលរាប់៨ម្តងហើយនៅពេលបន្តការប្រកួតទៀត អ្នកប្រដាល់ថៃរូបនេះ ក៏ត្រូវម្ទេសខ្មាំងទាត់អោយខូចជើងនិងបោះបង់ការប្រកួតក្នុងទឹកទី៣នេះតែម្តង ។ពួកគេទាំងពីរ ជួបប្រកួតក្នុងប្រភេទទម្ងន់៥៧គីឡូក្រាម។
សម្រាប់ការជួបគ្នាលើកទី២នេះ ពុំដឹងថាពេជ្រ ម្ទេសខ្មាំង គេអាចផ្តួលយកឈ្នះ Moeung Phich នេះបានទៀតដែរអត់នោះទេ ? ព្រោះអ្នកប្រដាល់ថៃរូបនេះ គេមានស្នៀតប្រដាល់ល្អ ពិសេសស្នៀតទាត់របស់គេ ហើយគេរឹងមាំវាយមិនចេះហត់ថែមទៀត ។ នេះបើតាមការកត់សម្គាលឃើញក្នុងការប្រកួតរបស់គេកន្លងមក។
ទោះជាយ៉ាងណា មិនអាចនិយាយមុនថា អ្នកណាឈ្នះអ្នកណាចាញ់រវាងពេជ្រ ម្ទេសខ្មាំងនិង Moeung Phich នេះ ។ ពេជ្រ ម្ទេសខ្មាំង គេក៏ខ្លាំងដែរ គេធ្លាប់ជួបច្រើននាក់ហើយកន្លងមក ដោយវាយឈ្នះច្រើនជាងចាញ់ ជាក់ស្តែងការប្រកួតចុងក្រោយនេះ គេឈ្នះ Moeung Phich នេះឯង។
យ៉ាងណា សំរាប់ការជួបជាមួយម្ទេសខ្មាំង ជើងខ្លាំងរបស់កម្ពុជាម្នាក់នេះ Moeung Phich មិនជាស្រួលខ្លួនប៉ុន្មានទេ ព្រោះម្ទេសខ្មាំងគេវាយខ្លាំងនិងមានបច្ចេកទេសក្នុងការប្រកួតល្អ ហើយមួយទៀត គេវាយរហ័ស ដករហ័ស ចេញចូលលឿន។ ចាំមើល ពេជ្រ ម្ទេសខ្មាំងអាចយកឈ្នះ Moeung Phich បានដែរឬអត់?។
ពេជ្រ ម្ទេសខ្មាំង មានកំនត់ត្រាប្រកួតចំនួន៩៤លើក ក្នុងនោះវាយឈ្នះ៨៣លើក ចាញ់១០លើក និងស្មើ ០១លើក ។ ចំណែក Moeung Phich គេមានកំនត់ត្រាប្រកួតចំនួន៥៧លើក ឈ្នះ៤៨លើក ចាញ់០៩លើក មិនដែលស្មើ។
ចំពោះស៊ូ វណ្ណះ អ្នកប្រដាល់ក្លិបនាគរាជមានជ័យ ត្រូវជួបប្រកួតសងសឹកជាមួយ ម៉ន ព្រហ្មម៉ាញ អ្នកប្រដាល់ក្លិបការិយាល័យទី៥កងទ័ពជើងគោក ដោយជួបប្រកួតក្នុងទម្ងន់៦៣,៥០០គីឡូក្រាម ។
ពីរនាក់នេះ ធ្លាប់ជួបប្រកួតគ្នាម្តងហើយកន្លងមក។ ដូច្នេះ ការជួបគ្នាលើកនេះ គឺជាលើកទី២ របស់ពួកគេទាំងពីរ ដែលការឈ្នះចាញ់ មិនដឹងថា បានទៅលើនរណានោះឡើយ? ។
ស៊ូ វណ្ណះ មានស្នៀតទាត់និងកណ្តាប់ដៃខ្លាំង និងវាយល្អ ហើយមានចិត្តប្រដាល់ធំ និងមានទិចនិចប្រកួតច្រើន ដើម្បីយកឈ្នះលើគូប្រកួត។ ដោយសារតែយ៉ាងដូច្នេះហើយ ទើបឡើងប្រកួតឈ្នះច្រើនជាងចាញ់។ យ៉ាងណា ការប្រកួតលើកចុងក្រោយនេះ ស៊ូ វណ្ណះបានវាយចាញ់ម៉ន ព្រហ្មម៉ាញដោយពិន្ទុ កាលពីថ្ងៃទី១៩សីហា២០១៨។
ម៉ន ព្រហ្មម៉ាញ គេជាអ្នកប្រដាល់ជើងខ្លាំង តែបច្ចុប្បន្នរាងស្រុតធ្លាក់ចុះ ដោយសារការហ្វឹកហាត់មិនសូវជាប់លាប់ ។គេក៏មានចិត្តប្រដាល់ធំដែរ ប៉ុន្តែមានកម្លាំងស៊ុហ្វមិនសូវរឹងមាំ។ ព្រហ្មម៉ាញ វាយមិនសូវសម្រុកចូលទេ ប៉ុន្តែរាល់ការវាយចេញរបស់គេ ភាគច្រើនចំគោលដៅល្អ។ ការប្រកួតចុងក្រោយគេនេះ ម៉ន ព្រហ្មម៉ាញ វាយឈ្នះអ្នកប្រដាល់ស៊ូ វណ្ណះ ដោយពិន្ទុ ។ ចាំមើល តើស៊ូ វណ្ណះ អាចសងសឹកម៉ន ព្រហ្មម៉ាញ បានសម្រេចឬអត់លើកនេះ ។
រីឯ សំរាំង ភក្តី អ្នកប្រដាល់ក្លិបព្រៃទទឹងខេត្តបាត់ដំបង ត្រូវគេផ្គូអោយជួបប្រកួតជាមួយ ហ៊ឹម គឹមរៀង អ្នកប្រដាល់ក្លិបតាព្រហ្មមានជ័យ ។ អ្នកប្រដាល់ទាំងពីរនាក់នេះ ប្រកួតគ្នាក្នុងទម្ងន់៥៧គីឡូក្រាម ។ចំណែកអៀប ឆា ក្លិបតាឯកដំបងដែកមានរិទ្ធខេត្តព្រៃវែង ជួបប្រកួតជាមួយ ធា វាសនា ក្លិបរាជសីហ៍ខេត្តរតនគិរី ដោយប្រកួតក្នុងទម្ងន់៦០គីឡូក្រាម៕
Source: Kampuchea Thmey Daily
0 Comments