តាកែវ ៖ ក្រុមចោរដើរលបលួចឆ្មក់ធ្វើសកម្មភាពលួចកាច់សោ ក ម៉ូតូ២នាក់ត្រូវបានប៉ូលិសស្រុកបាទីចាប់ខ្លួនបានបញ្ជូនឡើងតុលាការ ក្រោយធ្វើសកម្មភាពលើម៉ូតូនារីម្នាក់ដែលចតទុកនៅមុខរោងចក្រ។
ដោយអនុវត្តន៍តាមការណែនាំចង្អុលបង្ហាញនិងបញ្ជាផ្ទាល់ពីលោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ ក្នុងការបង្ការ ទប់ស្កាត់ និងបង្ក្រាបបទល្មើសផ្សេងៗឲ្យបានទាន់ពេលវេលា នាព្រឹកថ្ងៃទី០៦ ខែកញ្ញា ឆ្នាំ២០១៨ កម្លាំងនគរបាលការិយាល័យព្រហ្មទណ្ឌកម្រិតធ្ងន់បានបញ្ជូនខ្លួនជនសង្ស័យជាប់ពាក់ព័ន្ធករណីលួចមានស្ថានទម្ងន់ទោស(កាច់សោកម៉ូតូ)២នាក់ទៅកាន់សាលាដំបូងខេត្តតាកែវក្រោយប៉ូលិសស្រុកបាទីចាប់បញ្ជូនមក។
តាមការឲ្យដឹងពីលោកវរសេនីយ៍ឯក ង៉ាន់ សារី អធិការនគរបាលស្រុកបាទីប្រាប់ថា កាលពីថ្ងៃទី០៥ ខែកញ្ញា ឆ្នាំ២០១៨ វេលាម៉ោង១៧និង៤០នាទី នៅមុខរោងចក្រវីនតាយ ស្ថិតនៅភូមិឃ្លាំងសម្បត្តិ ឃុំពត់សរ សុក្របាទី ខេត្តតាកែវ មានករណីលួចមានស្ថានទម្ងន់ទោសមួយកើតឡើង ដែលប្រព្រឹត្តដោយ ឈ្មោះ ជុង វិច្ឆ័យ ភេទប្រុស អាយុ២៣ឆ្នាំ រស់នៅភូមិត្រើង ឃុំថ្នល់ទទឹង ស្រុកចំការលើ ខេត្តកំពង់ចាម និងឈ្មោះ វុធ រស្មី ភេទប្រុស អាយុ១៨ឆ្នាំ រស់នៅភូមិតទួមាស ឃុំតាអុង ស្រុកចំការលើ ខេត្តកំពង់ចាម។ ជនសង្ស័យទាំង២នាក់បានជិះម៉ូតូម៉ាកហុងដា សេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ភ្នំពេញ 1GP-8295 ធ្វើសកម្មភាពលួចកាច់សោ ក យកម៉ូតូ០១គ្រឿង ម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខ តាកែវ 1T-7578 របស់ឈ្មោះ ឃាង ឡោ ភេទស្រី អាយុ៤៩ឆ្នាំ រស់នៅភូមិបឹងខ្យាង ឃុំព្រែកតាតូច ស្រុកកណ្តាលស្ទឹង ខេត្ត កណ្តាល ខណៈដែលជនរងគ្រោះបញ្ឈរទុកមុខរោងចក្រកន្លែងកើតហេតុបានសម្រេចនិងជិះគេចខ្លួន។ បន្ទាប់ពីទទួលបានព័ត៌មានកម្លាំងសមត្ថកិច្ចបានធ្វើការពួន ស្ទាក់ គ្រប់ច្រកល្ហក ទើបចាប់ជនសង្ស័យបានទាំពីរនាក់ខាងលើព្រមទាំងវត្ថុតាង។
បច្ចុប្បន្នជនសង្ស័យរួមនឹងវត្ថុតាងត្រូវបានកម្លាំងជំនាញស្នងការនគរបាលខេត្តតាកែវកសាងសំណុំរឿងបញ្ជូនទៅកាន់សាលាដំបូងខេត្តចាត់ការតាមនីតិវិធី៕
Source: Kampuchea Thmey Daily
0 Comments