ព្រឹត្តិការណ៍ប្រកួតប្រដាល់ជម្រុះដណ្ដើមប្រាក់១០លានរៀល របស់ក្រុមហ៊ុនស្រាបៀរGanz berg ក្នុងប្រភេទទម្ងន់៦៥គីឡូក្រាម នៅលើសង្វៀនទូរទស្សន៍អាស៊ីអាគ្នេយ៍ បានឈានដល់សប្តាហ៍ទី៦ ហើយ នៅយប់ថ្ងៃសៅរ៍ទី០៨ ខែកញ្ញា ឆ្នាំ២០១៨នេះ។
សម្រាប់ការប្រកួតជម្រុះសប្តាហ៍ទី៦នេះ ជាការប្រកួតជុំទី៣ ដែលមាន២គូ រវាងហុងជីវ៉ុងអ្នកប្រដាល់ក្លិបមិត្តប៉ូលីស និង ធឿន ធី អ្នកប្រដាល់ក្លិបអង្គរមានជ័យខេត្តសៀមរាប ហើយមួយគូទៀត ជាការជួបគ្នារវាងមុត ខ្លឹមខ្មៅ អ្នកប្រដាល់ក្លិបមកុដរាជសីហ៍ និង ប៊ី ចាន់ណា អ្នកប្រដាល់ក្លិបមហិទ្ធរិទ្ធមេសរថ្ងកខេត្តស្វាយរៀង។
រវាង ហុងជីវ៉ុង និង ធឿន ធី មិនធ្លាប់ដែលប៉ះគ្នាទេកន្លងមក ។ ពួកគេទាំងពីរ សុទ្ធតែមានសមត្ថភាពបច្ចេកទេសខ្ពស់ដូចគ្នា ដែលមិនមាននរណាហ៊ានមើលស្រាលគ្នានោះទេ ក្នុងការជួបគ្នាលើកដំបូងនេះ ។
កាលពីប្រកួតជុំទី២ ហុង ជីវ៉ុង ចាញ់អ៊ុំ វណ្ណេត ក្នុងទឹកទី៣ បាន១ពិន្ទុសរុប២ជុំ ជីវ៉ុង បាន២ពិន្ទុ ដោយសារចាញ់ទាំងពីរជុំ ។ ឯ ធឿន ធី ប្រកួតជុំទី២ វាយឈ្នះហ៊ឹម សារ៉ាន់ ទឹកទី២ បាន៣ពិន្ទុ ហើយសរុប២ជុំ បាន៤ពិន្ទុ ដោយវាយឈ្នះ១ចាញ់១ប្រកួត ។
ចាំមើល តើក្នុងការប្រកួតជុំទី៣នេះ រវាងហុង ជីវ៉ុង និង ធឿន ធី ជួបគ្នាលើកនេះ តើអ្នកណារកបាន៣ពិន្ទុបន្ថែមនោះ?។
ចំពោះ ការជួបគ្នារវាងមុត ខ្លឹមខ្មៅ និង ប៊ី ចាន់ណា វិញនោះ ក៏ពុំធ្លាប់ជួបគ្នាដែរពីមុនមក ។ពីរនាក់នេះ ឆ្លងកាត់ពីរប្រកួតរួចហើយដូចគ្នា ដែលមុត ខ្លឹមខ្មៅ គេប្រកួត២ជុំកន្លងមកឈ្នះទាំង២ជុំ បាន៦ពិន្ទុ ហើយប៊ី ចាន់ណា ពីរប្រកួតកន្លងមក ឈ្នះ១ ចាញ់១ប្រកួត បាន៤ពិន្ទុ។
សម្រាប់ការជួបគ្នាក្នុងជុំទី៣នេះ ទោះជាគេមិនហ៊ានទស្សន៍ទាយមុនថានរណាជាអ្នកឈ្នះនោះ ក៏គេរំពឹងទុកថាមុត ខ្លឹមខ្មៅ ជាអ្នកដែលមានប្រៀបឈ្នះច្រើនជាងប៊ី ចាន់ណា ដែរ ។ដូច្នេះចាំ មើល ការប្រកួតជាក់ស្តែង តើនរណាជាអ្នកឈ្នះនោះ ?។
ព្រឹត្តិការណ៍ប្រកួតប្រដាល់គុនខ្មែរ ដណ្ដើមប្រាក់១០លានរៀលរបស់ក្រុម ហ៊ុនស្រាបៀរGanz berg ក្នុងប្រភេទទម្ងន់៦៥គីឡូក្រាមនេះ មានអ្នកប្រដាល់ជើងចាស់ចំនួន០៨នាក់ មកពីសមាគមក្លិបចំនួន៨ បានចូលរួមប្រកួតក្នុងព្រឹត្តិការណ៍នេះ។ អ្នកប្រដាល់ទាំង០៨រូបនោះ ត្រូវបែងចែកជាពីរពូល មួយពូលមាន៤រូប ដែលក្នុងពូល A មានកីឡាករ ហុង ជីវ៉ុង ក្លិបមិត្តប៉ូលីស, មុត ខ្លឹមខ្មៅក្លិបមកុដរាជសីហ៍ , មាស សុជាតិ ក្លិបឃ្លាំងមឿងកីឡា និង ហ៊ឹម សារ៉ាន់សមាគមកីឡាប្រដាល់ក្រសួងការពារជាតិ។ ចំណែកពូល B មាន ង៉ែត រដ្ឋា ក្លិបតាព្រហ្មមានជ័យ, អ៊ុំ វណ្ណេត ក្លិបការិយាល័យទី៥កងទ័ពជើងគោក , សេក គឹមរួនក្លិបអង្គរមានជ័យខេត្តសៀមរាប និងកីឡាករ ហួន សុខនីម ក្លិបមហិទ្ធរិទ្ធតាដំបងដែក។
ចំពោះរូបមន្តនៃការប្រកួត គឺធ្វើតាមរូបមន្តវិលជុំសន្សំពិន្ទុក្នុងពូល ដោយអ្នកទាំង ៨ ត្រូវជួបគ្នាទាំងអស់ ។ការប្រកួតជម្រុះទម្លាក់ចោល ៦ នាក់ចេញទុក ១ នាក់ដែលមានពិន្ទុលើសគេក្នុងពូលនីមួយៗ ពោលគឺយកលេខ១ពូលA និងលេខ១ពូលB ដើម្បីឡើងទៅប្រកួតផ្តាច់ព្រ័ត្រដណ្តើមយកប្រាក់១០លានរៀលតែម្តង៕
Source: Kampuchea Thmey Daily
0 Comments