ភ្នំពេញ ៖ ព្រះករុណាព្រះបាទសម្ដេចព្រះ បរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់តែងតាំង និងដំឡើងឋានន្តរស័ក្ដិ នៃកងយោធពលខេមរភូមិន្ទចំនួន៣រូប តាមសំណើរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នេះបើតាមព្រះរាជក្រឹត្យចុះថ្ងៃទី៦ ខែកញ្ញា ឆ្នាំ២០១៨។
បើតាមព្រះរាជក្រឹត្យរបស់ព្រះករុណាព្រះបាទសម្ដេចព្រះ បរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា កូនប្រុសច្បងសម្តេចអគ្គមហាសេនាបតីតេជោ ហ៊ុន សែន ត្រូវបានតែងតាំងជាមេបញ្ជាការកងទ័ពជើងគោក ខណៈនាយទាហានចំនួន២រូបទៀត ក៏ត្រូវបានតែងតាំងឲ្យកាន់តំណែងជាថ្នាក់ដឹកនាំកងទ័ពផងដែរ។
ក្នុងព្រះរាជក្រឹត្យចុះថ្ងៃទី៦ ខែកញ្ញាឆ្នាំ២០១៨ ព្រះមហាក្សត្របានត្រាស់បង្គាប់តែងតាំង និងដំឡើងឋានន្ដរស័ក្ដិនាយទាហាន៣ រូប គឺទី១, តែងតាំង និងដំឡើងឋានន្ដរស័ក្ដិ គឺលោកឧត្តមសេនីយ៍ វង្ស ពិសេន ជាអគ្គមេបញ្ជាការនៃកងយោធពលខេមរភូមិន្ទ និងដំឡើងឋានន្តរស័ក្ដិថ្នាក់នាយឧត្តមសេនីយ៍ ទី២, នាយឧត្តមសេនីយ៍ ឥត សារ៉ាត់ ជានាយសេនាធិការចម្រុះនៃកងយោធពលខេមរភូមិន្ទ បន្ថែមលើមុខងារបច្ចុប្បន្ន និងទី៣, លោកឧត្តមសេនីយ៍ឯក ហ៊ុន ម៉ាណែត ធ្វើជាមេបញ្ជាការកងទ័ពជើងគោក បន្ថែមលើមុខងារបច្ចុប្បន្ន។
សូមបញ្ជាក់ថា មុនការតែងតាំងនេះ លោកឧត្តមសេនីយ៍ វង្ស ពិសេន គឺមេបញ្ជាការរង និងជា នាយសេនាធិការ កងរាអាវុធហត្ថលើផ្ទៃប្រទេស។ ចំណែកនាយឧត្តមសេនីយ៍ ឥត សារ៉ាត់ មុនការតែងតាំងនេះ លោកគឺជាអគ្គមេបញ្ជាការរងនៃកងយោធពលខេមរភូមិន្ទ ហើយលោកឧត្តមសេនីយ៍ឯក ហ៊ុន ម៉ាណែត មុនការតែងតាំងនេះ លោកគឺជាមេបញ្ជាការរងកងទ័ពជើងគោក និងជានាយរងសេនាធិការចម្រុះ នៃកងយោធពលខេមរភូមិន្ទ៕
Source: Kampuchea Thmey Daily
0 Comments