ភ្នំពេញ ៖ នគរបាលខណ្ឌសែនសុខបានចាប់ខ្លួនបុរសជនជាតិខ្មែរម្នាក់រកស៊ីធ្វើជាមេឆ្នោតកន្ទុយលេខវៀតណាមម្នាក់ដែលធ្វើអាជីវកម្មបើកល្បែងស៊ីសងខុសច្បាប់កាលពីរសៀលថ្ងៃទី៥ខែកញ្ញា ឆ្នាំ២០១៨នៅភូមិត្រពាំងឈូក សង្កាត់អូរបែក្អម។
មន្ត្រីនគរបាលបានឲ្យដឹងថា ជនសង្ស័យ ដែលបានឃាត់ខ្លួនក្នុងករណីពាក់ព័ន្ធលេងល្បែងស៊ីសងខុសច្បាប់ខាងលើឈ្មោះ កែវ ចាន់នី ភេទប្រុសអាយុ២៩ឆ្នាំ មុខរបរបើកល្បែងស៊ីសងខុសច្បាប់ប្រភេទឆ្នោតកន្ទុយលេខវៀតណាម ស្នាក់នៅផ្ទះជួលចំណុចកើតហេតុខាងលើ។
តាមរបាយការណ៍របស់សមត្ថកិច្ចមូលដ្ឋានបានឲ្យដឹងថា នៅមុនពេលឃាត់ខ្លួនជនសង្ស័យខាងលើសមត្ថកិច្ច បានទទួលព័ត៌មានមកថា នៅចំណុចផ្ទះកើតហេតុខាងលើ មានបើកអាជីវកម្មលេងល្បែងស៊ីសងប្រភេទឆ្នោតកន្ទុយលេខវៀតណាម ដែលជាប្រភេទស៊ីសងខុសច្បាប់។ ក្រោយធ្វើការសើបអង្កេតឃើញការពិតទើបដឹកនាំកម្លាំងចុះបង្ក្រាបតែម្តង។
សមត្ថកិច្ចបានបញ្ជាក់ថា នៅក្នុងការបង្ក្រាបនោះសមត្ថកិច្ចបានដកហូតបាននូវលុយខ្មែរចំនួន៣៣៥ ០០០រៀល និងលុយអាមេរិកចំនួន៣២ដុល្លារ ព្រមទាំងសម្ភារៈពាក់ព័ន្ធបទល្មើសមួយចំនួនទៀតមាន ម៉ាស៊ីនគិតលេខ ម៉ាស៊ីនហ្វាក់ឯកសារឆ្នោត កន្ទុយលេខ ក្រដាសកត់ត្រាលេខឆ្នោត ត្រាអុកសម្គាល់ថ្ងៃខែឆ្នាំ ទទួលលុយកន្ទុយលេខ និងទូរស័ព្ទទំនាក់ទំនងមេឆ្នោតធំ។
ពាក់ព័ន្ធការបង្ក្រាបល្បែងស៊ីសងឆ្នោតកន្ទុយលេខនេះ ត្រូវបានមហាជនរាយការណ៍ប្រាប់អ្នកសារព័ត៌មានថា ប៉ូលិសចាប់តែមេឆ្នោតណាដែលគ្មានខ្សែបណ្តាញកាងការពារនៅពីក្រោយខ្នងទេ ពោលគឺចាប់អ្នកដែលមិនបានមកទំនាក់ទំនងមេប៉ូលិសមូលដ្ឋានមុនតែប៉ុណ្ណោះដោយគេបានបង្ហាញទីតាំងធំជាច្រើនកន្លែងនៅក្នុងមូលដ្ឋានខណ្ឌសែនសុខ ថា បើកអាជីវកម្មកត់ឆ្នោតបែបនេះរាប់ឆ្នាំហើយ ប៉ូលិសអត់ដែលហ៊ានចាប់ទេល្បីថា បានបង់លុយជូនមេៗប៉ូលិសគ្រប់កន្លែងទាំងអស់ដូច្នេះហើយទើបគេចាប់តែមេឆ្នោតណាដែលគ្មានក្រុមហ៊ុនប៉ុណ្ណោះ៕
Source: Kampuchea Thmey Daily
0 Comments