បន្ទាយមានជ័យ ៖ លោកឧត្តមសេនីយ៍ទោអាត់ ខែម ស្នងការនគរបាលខេត្តបន្ទាយមានជ័យ បានដឹកនាំកងកម្លាំងនគរបាលការិយាល័យ ប្រឆាំងគ្រឿងញៀន និងកម្លាំងនគរបាលការិយាល័យ ការពារនិងអន្តរាគមន៍ និងកម្លាំងនគរបាលស្រុកអូរជ្រៅ បានចុះប្រតិបត្តិការចុះបង្ក្រាបជនសង្ស័យម្នាក់ជំនាញ២មុខលក់គ្រឿងញៀន និងឆក់ត្រី រួមទាំងដកហូតវត្ថុតាងមួយចំនួន នៅវេលាម៉ោង៩និង១០នាទីព្រឹកថ្ងៃទី៥ ខែកញ្ញា ឆ្នាំ២០១៨ នៅចំណុចផ្ទះរបស់ជនសង្ស័យ ស្ថិតក្នុងភូមិសូរិយាថ្មី ឃុំកូប ស្រុកអូរជ្រៅ ខេត្តបន្ទាយមានជ័យ។
លោកវរសេនីយ៍ត្រី ង៉េង សុជា នាយការិយាល័យ នគរបាលប្រឆាំងគ្រឿងញៀន បានប្រាប់អ្នកយកព័ត៌មានឲ្យដឹងថា ជនសង្ស័យមាន ឈ្មោះពេត សារ៉ុម ភេទប្រុស អាយុ២៧ឆ្នាំ ភូមិយាងថ្មី ឃុំកូប ស្រុកអូរជ្រៅ ខេត្តបន្ទាយមានជ័យ។
លោកឧត្តមសេនីយ៍ទោ អាត់ ខែម ស្នងការនគរបាលខេត្ត ក៏បានប្រាប់អ្នកយកព័ត៌មានឲ្យដឹងដែរថា ក្រោយពីឃាត់ខ្លួនជនសង្ស័យហើយ សមត្ថកិច្ចធ្វើការឆែកឆេរ នៅនឹងផ្ទះរបស់ជនសង្ស័យ រកឃើញវត្ថុតាងជាក់ស្តែងមានថ្នាំញៀនប្រភេទមេតំហ្វេតាមីនអាយស៍ម្សៅ ពណ៌សក្រាម ចំនួន២កូនថង់ទម្ងន់១១,១០ក្រាម កាំភ្លើងខ្លីជ័រម៉ាកឡុក១ដើម ទូរស័ព្ទដៃ១គ្រឿង ជញ្ជីងថ្លឹងថ្នាំញៀន១ ដែកកេះ២ ដាវសាម៉ូរ៉ៃ ១ និងសម្ភារៈសម្រាប់វេចខ្ចប់មួយចំនួនទៀត និងក្រដាសវេលុយថ្លៃទិញថ្នាំចំនួន២សន្លឹក ជននេះជាមុខសញ្ញាប្រើប្រាស់និងជួញដូរគ្រឿង និងជាមុខសញ្ញា ឆក់ត្រីយ៉ាងសកម្មផងដែរ។
បើតាមចម្លើយសារភាព របស់ជនសង្ស័យ បាននិយាយថា ថ្នាំញៀនទាំងនេះ គឺគេ ទិញមកពីមនុស្សម្នាក់នៅថៃ ក្នុង១ថង់នេះ តម្លៃ៥០ម៉ឺនរៀល ចំពោះលុយកាក់គឺគេវេតាមវីង និងទ្រូម៉ានី រួចយកថ្នាំមកលក់ចែកចាយបន្តក្នុងភូមិចំពោះសកម្មភាពរបស់គេទើបតែជាលើកទី១ ទេក៏ត្រូវសមត្ថកិច្ចចាប់ខ្លួនបាន។
លោកអាត់ ខែម បានបញ្ជាក់ថា ក្រោយពីបានចំលើយរបស់ជនសង្ស័យហើយកម្លាំងនគរបាលជំនាញការិយាល័យ ប្រឆាំងគ្រឿងញៀន កំពុងរៀបចំសំណុំរឿងបញ្ជូនខ្លួនទៅសាលាដំបូងខេត្ត ដើម្បីចាត់ការតាមនីតិវិធីច្បាប់៕
Source: Kampuchea Thmey Daily
0 Comments