បាត់ដំបង ៖ ជនសង្ស័យចំនួន២នាក់ ដែលពាក់ព័ន្ធនឹងករណី កាន់កាប់ រក្សាទុកដោយខុសច្បាប់ នូវសារធាតុញៀន ត្រូវបានកម្លាំងជំនាញ នៃអធិការដ្ឋាន នគរបាលស្រុករតនមណ្ឌល ធ្វើការឃាត់ខ្លួន ខណៈដែលកំលាំងកំពុងចេញប្រតិបត្តិការ និងបន្ទាប់ពីមានការសង្ស័យ ទៅលើអ្នកទាំង ២។
ដោយអនុវត្តន៍តាមការណែនាំផ្ទាល់ពី លោក ឧត្តមសេនីយ៍ទោ អ៊ុច សុខុន ស្នងការនគរបាលខេត្ត ក៏ដូចជាលោកឧត្តមសេនីយត្រី កុយ ហៀង ស្នងការរងទទួលផែនប្រឆាំងបទល្មើស និងដោយមានការសម្របសម្រួលពីលោក នួន សាន ព្រះរាជអាជ្ញាសាលាដំបូងខេត្តបាត់ដំបង ផងនោះ ទើបនៅថ្ងៃទី ៦ ខែកញ្ញា ឆ្នាំ ២០១៨ វេលាម៉ោង១០ និង ២០នាទី ព្រឹក កម្លាំងបានចុះទៅកាន់ចំណុចជិតវិទ្យាល័យស្តៅសន្តិភាព ស្ថិតក្នុងភូមិដង្គត់ ឃុំស្តៅ ស្រុករតនៈមណ្ឌល ខេត្តបាត់ដំបង ដោយមានការអនុញ្ញាត ពីលោកវរសេនីយ៍ត្រី ផាន់ ឡុង អធិការស្តីទី បានចាត់តាំងលោក អនុសេនីយ៍ឯក ឈុន រុន នាយរងផ្នែកចុះជួយផ្នែកប្រឆាំងគ្រឿងញៀន ដើម្បីដឹកនាំកំលាំងចុះបង្ក្រាបករណី រក្សាទុកដោយខុសច្បាប់នូវសារធាតុញៀន ១ ករណី។
នៅក្នុងកិច្ចប្រតិបត្តិការនេះដែរ កំលាំងជំនាញ បានធ្វើការឃាត់ខ្លួនមុខសញ្ញាបានចំនួន ២ នាក់ ដោយជនសង្ស័យទាំងនោះមានឈ្មោះ មឿត ឌឿន ភេទប្រុស អាយុ៤១ឆ្នាំ មានទីលំនៅភូមិពេជ្រចង្វា ឃុំ រស្មីសង្ហា ស្រុករតនៈមណ្ឌល និង ឈ្មោះ ទ្រី សុខណា ហៅ ង៉ា ភេទប្រុស អាយុ ១៨ឆ្នាំ មានទីលំនៅភូមិស្តៅ ឃុំស្តៅ ស្រុករតនៈមណ្ឌល ខេត្តបាត់ដំបង។
ថ្នាំញៀនប្រភេទម៉ាទឹកកក ចំនួន ៤ ថង់តូច ទូរស័ព្ទដៃ ចំនួន ២ គ្រឿង ម៉ូតូម៉ាក MSX ពណ៌ ស ចំនួន ១ គ្រឿង សម្ភារៈសម្រាប់ប្រើប្រាស់ និងសម្រាប់វេចខ្ចប់ មួយចំនួនថែមទៀត ។ ដោយបច្ចុប្បន្នជនសង្ស័យទាំង ២ នាក់ ត្រូវបានកំលាំងអធិការដ្ឋាន រៀបចំកសាងសំណុំរឿង ដើម្បីបញ្ជូនទៅកាន់ស្នងការដ្ឋាន នគរបាលខេត្តហើយ ក្នុងការចាត់វិធានការបន្ត៕
Source: Kampuchea Thmey Daily
0 Comments