វណ្ណ វល័ក្ខ ស្ទើរតែមិនជឿខ្លួនឯង ខណៈមានតារាស្រីខ្មែរម្នាក់មានទម្រង់មុខមាត់ស្ទើរដូចនាងទាំងស្រុង

ភ្នំពេញ ៖ តារាសម្តែងរីកលម្អងផ្កាសាយក្លិនមកពីទឹកដីខេត្តកំពង់ធំកញ្ញា វណ្ណ វល័ក្ខ ស្របពេលដែលអាជីពសិល្បៈរបស់នាងសព្វថ្ងៃកាន់តែទទួលបានភាពជោគជ័យ និងមានឱកាសលេចវត្តមានសម្តែងខ្សែភាពយន្តច្រើននោះ ត្រូវបានទស្សនិកជនមួយចំនួនធំបានកត់សម្គាល់ឃើញថាតារាស្រីរូបនេះសម្រាប់ជីវភាពរស់នៅប្រចាំថ្ងៃរបស់នាងក៏មានយីអ៊ុនហក់ឡើងខ្ពស់មិនធម្មតានោះដែរ ខណៈដែលបច្ចុប្បន្នស្រីស្រស់រូបនេះតែងមានភាពហ៊ឺហាតាមរយៈការប្រើប្រាស់សម្ភារៈថ្លៃៗនិងទំនើបគួរឲ្យស្ងើចសរសើរ។

ជាមួយគ្នានៃការចាប់ផ្តើមមានភាពជោគជ័យលើអាជីពសិល្បៈសព្វថ្ងៃនេះតារាសម្តែងចង្កាស្រួចមានមន្តស្នេហ៍កញ្ញា វណ្ណ វល័ក្ខ បើសង្កេតមើលពីទឹកមុខនិងរូបសម្រស់របស់នាងក៏ហាក់កាន់តែមានភាពស្រស់ថ្លាខុសប្លែកជាងគ្រាកន្លងមកផងដែរ។ ប៉ុន្តែយ៉ាងណាមិញថ្មីៗនេះ កញ្ញា វណ្ណ វល័ក្ខ ក៏ស្រាប់តែបង្ហាញការភ្ញាក់ផ្អើលចំពោះខ្លួនឯងក្រោយពីមានព័ត៌មាននិងមិត្តភក្តិមួចំនួនសួរនាំអំពីរឿងរ៉ាវថា នាងមានប្អូនស្រីភ្លោះជាអ្នកសិល្បៈ ហើយមានទម្រង់មុខមាត់ដូចគ្នាស្ទើរទាំងស្រុងផងនោះ។

ជាការបកស្រាយលើចម្ងល់របស់មហាជនក៏ដូចជាមិត្តភក្ដិរួមអាជីពសិល្បៈដូចគ្នាកញ្ញា វណ្ណ វល័ក្ខបានប្រាប់កម្ពុជាថ្មីទាំងអារម្មណ៍ភ្ញាក់ផ្អើលថា ដំណឹងនេះខ្ញុំទើបតែបានដឹងថ្មីៗនេះដែរ ក្រោយពីមានការផ្សព្វផ្សាយនិងមិត្តភក្តិជាច្រើនរួមទាំងទស្សនិកជនដែលស្គាល់តែងលើកជាសំនួរមកកាន់ខ្ញុំថាសព្វថ្ងៃនេះខ្ញុំពិតជាមានប្អូនស្រីម្នាក់ទៀត(កូនភ្លោះ)កំពុងប្រឡូកក្នុងវិស័យសិល្បៈដូចគ្នាតើមែនទេ?។មិនតែប៉ុណ្ណោះមានអ្នកគាំទ្រខ្លះទៀតក៏បានយល់ច្រឡំខ្ញុំនិងតារាស្រីម្នាក់នោះថាជាមនុស្សតែមួយផងដែរ។

កញ្ញា វណ្ណ វល័ក្ខ បញ្ជាក់ថា តាមពិតទៅខ្ញុំដូចជាឆ្ងល់ដែរ រាល់ថ្ងៃគឺគ្មានបងប្អូនស្រីណាមុខដូចខ្ញុំទេ។ចំណែកតារាស្រីម្នាក់នេះគឺមនុស្សភាគច្រើនគេតែងយល់ច្រឡំថានាងគឺជាខ្ញុំព្រោះរាល់ការនិយាយស្តី មុខមាត់ហាក់មានលក្ខណៈដូចគ្នាស្ទើរទាំងស្រុង។ខ្ញុំនិយាយនេះគឺធ្វើឡើងតាមមតិរបស់មហាជននិងមិត្តភក្តិមួយចំនួនដែលគេបានប្រាប់និងតែងសួរមកខ្ញុំអំពីបញ្ហាមួយខាងលើនេះ។

តារាស្រីសិចស៊ីមានសម្រស់ដើមទ្រូងគួរឲ្យខ្នាញ់កញ្ញា វណ្ណ វល័ក្ខ បានបន្ថែមថា រវាងនាងនិងតារាស្រីម្នាក់នោះគឺគ្មានអ្វីពាក់ព័ន្ធឬជាបងប្អូននឹងគ្នាឡើយ។ ប៉ុន្តែអ្វីដែលចម្លែកសម្រាប់នាងនោះមិនគួរមានរឿងចៃដន់បែបនេះទេពោលគឺមនុស្សស្រីពីរនាក់មានមុខមាត់ស្រដៀងគ្នាបង្កឲ្យមានការយល់ច្រឡំពីទស្សនិកជន ខណៈកន្លងមកធ្លាប់តែឃើញបងប្អូនដែលកើតមកភ្លោះរួមផ្ទៃម្តាយតែមួយទើបមានចរិត និងមុខមាត់ស្រដៀងគ្នាអញ្ចឹង៕