ភ្នំពេញ ៖ កម្លាំងយាមល្បាតនៅពេលរាត្រីរបស់នគរបាលប៉ុស្ដិ៍ឫស្សីកែវ ដេញតាមរហូតបង្ក្រាបឃាត់ខ្លួនបានភ្លាមៗម្នាក់ ខណៈ២នាក់ទៀត កំពុងតែរត់គេចខ្លួន បន្ទាប់ពីធ្វើសកម្មភាពប្រើដាវគំរាមប្លន់យកម៉ូតូ Scoopy ១គ្រឿងពីជនរងគ្រោះ បានសម្រេចហើយតែរត់មិនរួច។
ហេតុការណ៍នេះ បានកើតឡើងកាលពីវេលាម៉ោង២នឹង៣០នាទីរំលងអធ្រាត្រថ្ងៃទី២៤ខែកញ្ញា ឆ្នាំ២០១៨ នៅលើកំណាត់ផ្លូវលំមួយកន្លែង ស្ថិតក្នុងក្រុមទី១០ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
សមត្ថកិច្ចឲ្យដឹងថា ជនសង្ស័យមានឈ្មោះ ជេម សីហាក់ អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួលមួយកន្លែង ក្នុងក្រុមទី១៩ ភូមិសាមគ្គី សង្កាត់ឫស្សីកែវ ខណ្ឌឫស្សីកែវ និងមានសារធាតុញៀនក្នុងខ្លួន។ រីឯជនរងគ្រោះឈ្មោះ សុខ សំបូរ អាយុ២៨ឆ្នាំ មុខរបរធ្វើការក្រុមហ៊ុនលក់គ្រឿជ័រ ស្នាក់នៅផ្ទះលេខ៤៦ ផ្លូវលេខ១០៧ សង្កាត់អូរឫស្សីទី១ ខណ្ឌ៧មករា។
ប្រភពបន្តថា នៅមុនពេលកើតហេតុ មានជនសង្ស័យចំនួន៣នាក់ បានធ្វើសកម្មភាពប្រើដាវមកគម្រាមយកម៉ូតូ Scoopy របស់ជនរងគ្រោះរហូតបានសម្រេចហើយក៏ព្យាយាមជិះម៉ូតូរបស់ជនរងគ្រោះគេចខ្លួន ដែលធ្វើឲ្យជនរងគ្រោះស្រែកឆោឡោឲ្យគេជួយ ស្របពេលដែលកម្លាំងរបស់ នគរបាលប៉ុស្តិ៍ឫស្សីកែវ និងខណ្ឌឫស្សីកែវ កំពុងយាមល្បាតនៅពេលរាត្រី បានចេញធ្វើអន្តរាគមន៍ភ្លាមៗ ដោយដេញតាមក្របួចជនសង្ស័យបានម្នាក់ ឯ២នាក់ទៀតរត់គេចខ្លួនបាត់ទៅហើយ នៅចំណុចផ្លូវជាតិលេខ៥ ក្នុងភូមិសាមគ្គី និងដកហូតបានដាវចំនួន២ដើម ជាមួយម៉ូតូ២គ្រឿង ក្នុងនោះ១គ្រឿង ជារបស់ជនរងគ្រោះ និង១គ្រឿងទៀតជារបស់ជនសង្ស័យ។
បច្ចុប្បន្នជនសង្ស័យ និង វត្ថុតាងត្រូវបាននាំខ្លួនមកកាន់អធិការដ្ឋាន នគរបាលខណ្ឌ កសាងសំណុំរឿងចាត់ការតាមនីតិវិធី ហើយបន្តការសាកសួរស្រាវជ្រាវរកបក្ខពួក ដែលនៅសេសសល់ចាប់យកមកផ្តន្ទាទោសតាមច្បាប់៕
Source: Kampuchea Thmey Daily
0 Comments