ភ្នំពេញ ៖ ថ្ងៃទី២៤ ខែកញ្ញា ឆ្នាំ២០១៨ គឺជាខួប២០ឆ្នាំនៃការប៉ុនប៉ងធ្វើឃាដលើសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលព្រឹត្តិការណ៍នោះ បានកើតឡើងនៅវេលាម៉ោង៨និង៥២នាទីព្រឹក ថ្ងៃទី២៤ ខែកញ្ញា ឆ្នាំ១៩៩៨ ដែលពេលនោះ មានគ្រាប់រ៉ុក្កែត បេ៤០ មួយគ្រាប់ក្នុងចំណោម៤គ្រាប់ បានហោះសំដៅរថយន្តរបស់សម្តេច តែមិនបានត្រូវទេ ហើយបានហោះទៅបុកផ្ទះប្រជាជននៅម្ខាងផ្លូវ ធ្វើអោយប្រជាពលរដ្ឋម្នាក់ស្លាប់ និងម្នាក់ទៀតត្រូវរបួសជាទម្ងន់។
សម្តេចតេជោ ហ៊ុន សែន លើកឡើងថា ការរៀបចំធ្វើឃាដលើសម្តេចនាពេលនោះ ត្រូវបានធ្វើឡើងស្របពេលនៃការប្រជុំសភានីតិកាលទី២ ដែលត្រូវប្រជុំនៅព្រះរាជដំណាក់នាទីក្រុងសៀមរាប ក្រោមព្រះរាជអធិបតីភាព សម្តេចព្រះ នរោត្តម សីហនុ ហើយប្រសិនបើពេលនោះគ្រាប់បេ៤០ទាំង៤គ្រាប់ ផ្ទុះព្រមគ្នាទាំងអស់ ឬព្រឹកនោះ មិនមានភ្លៀងធំទេនោះ ប្រហែលជាជីវិតរបស់សម្តេចត្រូវចប់ហើយ។ សម្តេចបញ្ជាក់ថា “ប្រសិនបើខ្ញុំស្លាប់នាពេលនោះ តើនឹងមានរឿងអ្វីកើតឡើងក្រោយពេលខ្ញុំស្លាប់ នៅក្នុងក្រុងសៀមរាប ? បន្ទាប់មក តើសង្គ្រាមអាចបញ្ចប់បានតាមរយៈនយោបាយ ឈ្នះ-ឈ្នះ ដូចពេល ហ៊ុន សែន នៅរស់ ឬទេ?នេះជាចម្លើយ ដែលត្រូវឆ្លើយសម្រាប់សំណួរទាំងពីរខាងលើនេះ”។
ជាមួយគ្នានោះ សម្តេចតេជោ បានអរគុណទេវតា ដែលថែរក្សាអង្គរវត្ត ព្រះអង្គចេក ព្រះអង្គចម និងបារមីវត្ថុស័ក្តិសិទ្ធទាំងអស់ ដែលជួយការពារនាពេលនោះ។ ស្តេចជឿច្បាស់ណាស់ថា អ្នកជួយជីវិតនាពេលនោះ គឺតាមផ្លូវងងឹត គឺគុណបុណ្យ ទេវតាទាំងភូមិទេវតា រុក្ខទេវតា អាកាសទេវតា បារមីព្រះអង្គចេក ព្រះអង្គចម បារមីដែលតាមថែរក្សាសម្តេចជាប្រចាំកន្លងមកបានជួយជីវិតអោយរស់បាន២០ឆ្នាំកន្លងមកនេះ ដែលធ្វើអោយសម្តេចបានដឹកនាំប្រទេសចេញពីសង្គ្រាមមកកាន់សន្តិភាព និងការអភិវឌ្ឍដូចសព្វថ្ងៃ។
សម្តេចតេជោ ហ៊ុន សែន លើកឡើងទៀតថា សម្តេចបានអហោសិកម្មអោយអ្នក ដែលចង់សម្លាប់សម្តេចនៅសៀមរាបរួចហើយ បើទោះបីជាសម្តេចមានពន្លឺក្នុងការស្រាវជ្រាវក៏ដោយ តែអ្នកត្រូវដឹងថា ពេលណាសម្តេចនៅកាន់តំណែងជានាយករដ្ឋមន្ត្រី សម្តេចមិនអោយពួកគេធ្វើអ្វីៗបានសម្រេចទេ មិនអោយពួកគេធ្វើរដ្ឋប្រហារ ឬធ្វើបដិវត្តពណ៌បានទេ។ ទោះក្នុងតម្លៃណាក៏ដោយ សម្តេចត្រូវការពារសន្តិភាព និងការពារជីវិតប្រជាជនកម្ពុជាអោយខានតែបាន៕
Source: Kampuchea Thmey Daily
0 Comments