ឧត្តមសេនីយ៍ឯក ហ៊ុន ម៉ាណែត ៖ ជីវិតមនុស្សអាចប្រែប្រួល ប៉ុន្តែការការពារជាតិមិនអាចប្រែប្រួលបានទេ

ភ្នំពេញ ៖ លោកឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក មានប្រសាសន៍បែបនេះ នៅក្នុងពិធីសំណេះសំណាលជាមួយអតីតនាយទាហាន មកពីសាលាហ្វឹកហ្វឺននាយទាហាន (ង៥០ដីឥដ្ឋ) នៅទីបញ្ជាការ បញ្ជាការដ្ឋានកងពលតូចលេខ៧០ កាលពីថ្ងៃសៅរ៍ ទី២២ ខែកញ្ញា ឆ្នាំ២០១៨។

មានមតិសំណាលនៅក្នុងពិធីនោះ លោកឧត្តមសេនីយ៍ឯក ហ៊ុន ម៉ាណែត បានផ្តាំផ្ញើការសាកសួរសុខទុក្ខពីសំណាក់សម្ដេចតេជោ ហ៊ុន សែន និងសម្ដេចកិតិ្តព្រឹទ្ធបណ្ឌិត ថ្នាក់ដឹកនាំក្រសួងការពារជាតិ ជូនចំពោះនាយទាហាន នាយទាហានរង ពលទាហាន និងអតីតនាយទាហាន មកពីសាលាហ្វឹកហ្វឺននាយទាហាន (ង៥០ ដីឥដ្ឋ) ទាំងអស់ ចំពោះការដឹងគុណនៃការលះបង់ក្នុងបុព្វហេតុការពារជាតិមាតុភូមិ។ ជាមួយគ្នានោះ លោកបានថ្លែងអំណរគុណ និងកោតសរសើរចំពោះនាយទាហានស្ម័គ្រចិត្តចូលរួមក្នុងការបម្រើកងទ័ពនាសម័យនោះ។ លោកបញ្ជាក់ថា ការចូលបម្រើកងទ័ពក្នុងសម័យសង្គ្រាម គឺជាកាលះបង់ខ្ពស់បំផុតចំពោះជាតិមាតុភូមិ ដែលយុវជនជំនាន់ក្រោយត្រូវតែដឹងគុណ ដោយសារតែការលះបង់នេះហើយដែលធ្វើឲ្យយើងមានសន្តិភាព មានឱកាសក្នុងការកសាង និងអភិវឌ្ឍប្រទេសរហូតមកដល់សព្វថ្ងៃ។ ស្នាដៃជាច្រើនរបស់កងទ័ពបានចូលរួមក្នុងបុព្វហេតុជាតិជាច្រើន ដូចជាទប់ស្កាត់ការវិលត្រលប់មកវិញរបបខ្មែរក្រហម កិច្ចព្រមព្រៀង២៣ តុលា ១៩៩៣ និងបញ្ចប់សង្គ្រាម ឆ្នាំ១៩៩៨ និងការពារថែរក្សាសុខសន្តិភាពដល់សព្វថ្ងៃនេះ។

លោកឧត្ដមសេនីយ៍ឯក ហ៊ុន ម៉ាណែត លើកឡើងដែរថា “ភារកិច្ចកាតព្វកិច្ចរបស់កងទ័ពសម័យនេះ មិនខុសពីភារកិច្ចកាតព្វកិច្ចរបស់កងទ័ពសម័យមុននោះទេ គឺការពារជាតិ ការពារទឹកដី និងប្រជាជន។ ជីវិតមនុស្សអាចប្រែប្រួល ប៉ុន្តែការការពារជាតិមិនអាចប្រែប្រួលបាននោះទេ គឺត្រូវពង្រឹងបន្ថែម។ ដូច្នេះកងទ័ពសម័យនេះ និងកងទ័ពគ្រប់ជំនាន់ត្រូវការពារសុខសន្តិភាពនិងសមទ្ធិផលដែលរៀមច្បងបានបន្សល់ទុកឲ្យ និងចូលរួមថែរក្សាការពារសម្រាប់មនុស្សជំនាន់ក្រោយៗទៀត៕