ស្ទឹងត្រែង ៖ តបតាមសេចក្តីណែនាំរបស់ក្រសួងសុខាភិបាលស្ដីពីការបង្ការបញ្ហាសុខភាពក្រោយទឹកជំនន់ស្រកទៅវិញ នៅថ្ងៃ០៥ ខែកញ្ញា-ឆ្នាំ២០១៨នេះ មន្ទីរសុខាភិបាលខេត្តស្ទឹងត្រែងប្រកាសឱ្យបងប្អូនប្រជាពលរដ្ឋប្រយ័ត្នចំពោះជំងឺឆ្លងព្រោះនៅរដូវទឹកជំនន់ស្រកទៅ អាចនឹងមានជំងឺរាតត្បាតមួយចំនួនកើតមានឡើងដូចជាជំងឺរាក-ជំងឺគ្រុនឈាម-ជំងឺកមរមាស់-និងជំងឺព្រូនជាដើម។
លោកវេជ្ជបណ្ឌិតទន វុទ្ធី អនុប្រធានមន្ទីរសុខាភិបាល និងជាប្រធានក្រុមអន្តរាគមន៍ប្រយុទ្ធនឹងជំងឺឆ្លងខេត្តស្ទឹងត្រែង បានបញ្ជាក់ថា ៖ បញ្ហាទាំងនេះសូមសាធារណជនទាំងអស់លើកកម្ពស់ការបង្ការជំងឺឆ្លង ព្រោះថាពេលទឹកស្រកបរិស្ថាននៅជុំវិញផ្ទះ របស់របរប្រើប្រាស់មួយចំនួនក៏មានការខូចខាត ហើយអ្វីៗត្រូវផ្លាស់ប្តូរ យើងត្រូវ បង្ការជំងឺឆ្លងនៅរដូវទឹកស្រកទៅនេះ។
លោកវេជ្ជបណ្ឌិតបង្ហាញថា ៖ ជំងឺទាំងនេះយើងអាចបញ្ចៀសវាបានគ្រាន់តែបងប្អូនប្រជាពលរដ្ឋយើងអនុវត្តនូវវិធានការ ការថែរក្សាសុខភាព ដែលមន្ត្រីសុខាភិបាលបានណែនាំដូចជាចំណីអាហារត្រូវមានអនាម័យ សំអាតខ្លួនប្រាណ គេងដាក់មុង បរិភោគទឹកឆ្អិន និងរៀបសំអាតបង្គន់អនាម័យឡើងវិញ។
លោកស្រីប៊ុតដានាងប្រជាពលរដ្ឋនៅភូមិស្រះឬស្សីក្រុងស្ទឹងត្រែងបានបញ្ជាក់ថា ៖ នៅពេលទឹកស្រកទៅនេះ ពួកគាត់ក៏ព្រួយបារម្ភខ្លាចកើតជំងឺឆ្លងផ្សេងៗដែរព្រោះបរិស្ថាននៅជុំវិញផ្ទះមានភាពស្មុគស្មាញច្រើន ដោយសារតែទឹកជំនន់បំផ្លិចបំផ្លាញ។
លោកស្រីនូថងដាំនៅសង្កាត់ស្រះឬស្សីនេះដែរ បានអះអាងថា ៖ ភារកិច្ចរក្សាសុខភាពប្រជាពលរដ្ឋបានអនុវត្តតាមការណែនាំគ្រប់មធ្យោបាយ ដែលមន្ត្រីសុខាភិបាលបានផ្សព្វផ្សាយកន្លងមក មិនធ្វេសប្រហែសទេ។
លោកស្រីថា ៖ ទោះជាយ៉ាងណាពួកគាត់ជាអ្នកស្រែចំការ តែងតែព្រួយបារម្ភចំពោះកូនចៅតូចព្រោះនៅតាមមូលដ្ឋាន ពេលរដូវទឹកឡើងច្រើនប្រឈមនឹងជំងឺគ្រុនចាញ់ឬគ្រុនឈាមឬគ្រុនផ្តាសាយផ្សេងៗទៀត។
សូមបញ្ជាក់ថា ៖ ករណីទាំងនេះមន្ត្រីសុខាភិបាលបានរំលឹកដល់បងប្អូនប្រជាពលរដ្ឋប្រសិនបើមានបញ្ហាសុខភាពសូមលោកអ្នកទៅពិនិត្យ និងព្យាបាលឱ្យ បាន រួសរាន់ និងទៅជួបគ្រូពេទ្យជាបន្ទាន់នៅមណ្ឌលសុខភាពឬមន្ទីរពេទ្យបង្អែកដែលនៅជិតផ្ទះលោកអ្នក៕
Source: Kampuchea Thmey Daily
0 Comments