មាជ សុខរ៉ា អ្នកប្រដាល់ក្លិបតាព្រហ្មមានជ័យ និង ហេង វិឆ័យ អ្នកប្រដាល់នៃក្លិបអេភូថងកីឡា ត្រូវអ្នករៀបចំកម្មវិធីប្រដាល់នៅប៉ុស្តិ៍អាស៊ីអាគ្នេយ៍ ផ្គូផ្គងអោយជួបប្រកួតជាមួយអ្នកប្រដាល់បរទេស។ ទាំង២គូនេះ នឹងប្រកួតគ្នានាយប់ថ្ងៃសៅរ៍ទី០៨ ខែកញ្ញា ឆ្នាំ២០១៨ នៅលើសង្វៀនGanzberg Top Fighter របស់SEA-TV ។
មាជ សុខរ៉ា គេនឹងត្រូវជួបជាមួយអ្នកប្រដាល់ថៃឈ្មោះPhat Cha ដោយប្រកួតក្នុងប្រភេទទម្ងន់៦៧គ.ក្រ ។ អ្នកប្រដាល់ថៃ ដែលមាជ សុខរ៉ា ត្រូវតស៊ូជាមួយនោះ ជាជើងខ្លាំងនៅស្រុកថៃ ដែលមានប្រវត្តិប្រកួត៦៥លើក ដោយវាយឈ្នះ៥៦លើក ចាញ់០៩លើក មិនដែលស្មើ ខណះដែលសុខរ៉ា គេមានប្រវត្តិប្រកួតចំនួន៦០លើក ឈ្នះ៥២លើកចាញ់០៥លើក និងស្មើ០៣លើក ។
Phat Cha គេមកប្រកួតលើកចុងក្រោយនៅសង្វៀនSEATVនេះ គេបានវាយឈ្នះអ្នកប្រដាល់ជើងខ្លាំង មាស ច័ន្ទមាន ក្លិបកងពលធំអន្តរាគមន៍លេខ២ ក្នុងទឹកទី៣ ដោយដាល់ពោះច័ន្ទមានអោយសន្លប់លើរេញ។អ្នកប្រដាល់ថៃរូបនេះ គេមានផ្លែល្អពិសេសកណ្តាប់ដៃហើយជង្គង់និងទាត់ ក៏ល្អដែរ ។
តែសម្រាប់លើកនេះ មិនដឹងថា Phat Cha អាចយកឈ្នះមាជ សុខរ៉ា បានទៀតឬក៏អត់នោះទេ? ព្រោះមាជ សុខរ៉ា ការប្រកួតចុងក្រោយនៅក្នុងស្រុក គេវាយឈ្នះអ្នកប្រដាល់បារាំងKevin ក្នុងទឹកទី២ ហើយប្រកួតចុងក្រោយជាមួយអ្នកប្រដាល់ថៃKhun Krong Thap ដោយពិន្ទុ ។
ទោះជាយ៉ាងណា ការឈ្នះចាញ់រវាងមាជ សុខរ៉ា និងPhat Cha នេះ ពុំមាននរណាហ៊ានទាយមុនថាអ្នកណាឈ្នះនោះទេ ព្រោះថាអ្នកទាំងពីរនាក់នេះ មិនធ្លាប់ដែលប៉ះគ្នានោះទេ ។
ចំពោះ អ្នកប្រដាល់ជើងចាស់ហេង វិឆ័យ ក្លិបអេភូថងកីឡា នឹងត្រូវជួបជម្រះបញ្ជីជាមួយអ្នកប្រដាល់បារាំងឈ្មោះ NASER ។ ពួកគេទាំងពីរ ប្រកួតគ្នាក្នុងទម្ងន់៦៩គីឡូក្រាម។ ជាលើកទី២ហើយ ដែលវិឆ័យបានជួបអ្នកប្រដាល់ស្បែកខ្មៅអឺរ៉ុបនេះ ។កាលពីជួបគ្នាលើកមុន(១៤កក្កដា២០១៨) ពួកគេទាំងពីរ វាយស្មើពិន្ទុគ្នា ។
ហេង វិឆ័យ ជាអ្នកប្រដាល់ជើងចាស់ ធ្លាប់ហែលឆ្លងកាត់ប្រកួត ជាមួយថៃប៉ុន្មានលើកដែរហើយ។ យ៉ាងណា ប៉ះជាមួយអ្នកប្រដាល់បារាំង វិឆ័យលែងហ៊ានមើលស្រាលហើយ ។Naser មានកំនត់ត្រាប្រកួតទើបបាន៣០លើកប៉ុណ្ណោះ ក្នុងនោះវាយឈ្នះ១៨លើក និងចាញ់១២លើក។
អ្នកប្រដាល់បារាំងរូបនេះ ថ្វីត្បិតតែមានកំនត់ត្រាប្រកួតតិច តែគេមានស្នៀតប្រដាល់ល្អ មានបច្ចេកទេសវាយល្អ ដែលមិនអាចមើលស្រាលបាន ។ Naser កាលពីថ្ងៃទី១១សីហានៅលើសង្វៀនSEATVនេះ គេបានវាយចាញ់ជើងចាស់នន់ ជំនិត ដោយពិន្ទុ តែមុននឹងចាញ់នោះ គេបានវាយជំនិតអោយអាជ្ញាកណ្តាលរាប់៨ក្នុងទឹកទី១ដែរ ។ដូច្នេះNaserមិនធម្មតានោះឡើយ។វិឆ័យ ក៏នៅតែប្រឈមការលំបាកត្រង់ចាញ់កម្ពស់អ្នកប្រដាល់បារាំងនោះ ដោយNASER មានកម្ពស់រហូតដល់១,៧៣ម៉ែត្រ ខណះដែលខ្លួនគេកម្ពស់តែ១,៧១ ម៉ែត្រ ។ ដូច្នេះចាំមើល រវាងហេង វិឆ័យ និង អ្នកប្រដាល់បារាំងNaserនេះ តើនរណាឈ្នះសម្រាប់ជំនួបលើកទី២នេះ?៕
Source: Kampuchea Thmey Daily
0 Comments