ភ្នំពេញ ៖ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានអះអាងថា សម័យប្រជុំលើកដំបូង និងសម័យប្រជុំរដ្ឋសភាលើកទី១ នីតិកាលទី៦ ដែលបានប្រព្រឹត្តទៅដោយរលូនតាមកម្មវិធីគ្រោងទុកនេះ គឺជាជោគជ័យដ៏ត្រចះត្រចង់ជាប្រវត្តិសាស្ត្ររបស់កម្ពុជា ក្នុងការអនុវត្តលទ្ធិប្រជាធិបតេយ្យសេរីពហុបក្ស និងពង្រឹងនីតិរដ្ឋ ដែលជាសិទ្ធិសម្រេចដ៏ពេញលេញរបស់ប្រជាជនកម្ពុជា ជាម្ចាស់ជោគវាសនារបស់ប្រទេសជាតិខ្លួន។
អ្នកនាំពាក្យគណបក្សប្រជាជនកម្ពុជាលើកឡើងបែបនេះ កាលពីព្រឹកថ្ងៃទី០៥ ខែកញ្ញា ឆ្នាំ ២០១៨ និងស្របពេលដែលរដ្ឋសភាបើកកិច្ចប្រជុំដំបូង។ លោកថ្លែងយ៉ាងនេះថា ថ្ងៃពុធ ១០ រោច ខែស្រាពណ៍ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី០៥ ខែកញ្ញា ឆ្នាំ ២០១៨ គឺជាថ្ងៃប្រវត្តិសាស្ត្រ ដ៏មានសារសំខាន់នៃព្រះរាជាណាចក្រកម្ពុជា ដែលរដ្ឋសភានៃព្រះរាជាណាចក្រកម្ពុជាបើកសម័យប្រជុំដំបូងរបស់ខ្លួនតាមកម្មវិធី ដែលបានគ្រោងទុក ក្រោមព្រះរាជាធបតីភាពដ៏ខ្ពង់ខ្ពស់បំផុតនៃព្រះបាទសម្តេចព្រះ បរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដោយមានវត្តមានជាកិត្តិយសដ៏ឧត្តុង្គឧត្តមរបស់បណ្តាឯកអគ្គរដ្ឋទូត ឯកអគ្គរាជទូត បណ្តាប្រទេស ដែលមានចំណងទាក់ទងការទូតជាមួយព្រះរាជាណាចក្រកម្ពុជា និងមាននិវេសនដ្ឋាននៅព្រះរាជាណាចក្រកម្ពុជា”។
តាមលោក សុខ ឥសាន “ការប្រជុំដំបូងរដ្ឋសភានីតិកាលទី៦ នៅថ្ងៃនេះ បានដំណើរការតាមកម្មវិធីលំដាប់លំដោយ ជាបន្តបន្ទាប់ ក្រោមការដឹកនាំរបស់សម្តេចចក្រី ហេង សំរិន ព្រឹទ្ធសមាជិកនៃរដ្ឋសភា និងមានតំណាងរាស្ត្រជាប់ឆ្នោត៥រូប ដែលមានអាយុតិចជាងគេ ជាលេខាធិការកត់ត្រា។
តំណាងរាស្ត្រជាប់ឆ្នោតទាំង១២៥រូប ត្រូវបានប្រកាសសុពលភាពដោយប្រធានអង្គប្រជុំ តាមសេចក្តីសម្រេចផ្លូវការរបស់ គ.ជ.ប។ បន្ទាប់មកអង្គប្រជុំ បានអនុម័តលើខ្លឹមសារនៃបទបញ្ជាផ្ទៃក្នុងនៃរដ្ឋសភា ដោយសម្លេងឯកច្ឆន្ទ។ នៅរសៀលថ្ងៃដដែល តំណាងរាស្ត្រទាំ១២៥រូប បានទៅធ្វើសច្ចាប្រណិធានស្បថនៅព្រះបរមរាជវាំង ចំពោះព្រះភក្ត្រព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះអគ្គមហាសង្ឃរាជាធិបតី ព្រះសង្ឃរាជទាំងពីរគណៈ ប្រកបដោយកិត្តិយសដ៏ឧត្តុង្គឧត្តមខ្ពង់ខ្ពស់ក្រៃលែង”។
លោក សុខ ឥសាន បញ្ជាក់ទៀតថា ដំណើរការប្រជុំដំបូងរដ្ឋសភានៃព្រះរាជាណាចក្រកម្ពុជា ដែលបានប្រព្រឹត្តទៅដោយរលូនតាមកម្មវិធីគ្រោងទុកនេះ គឺជាជោគជ័យដ៏ត្រចះត្រចង់ជាប្រវត្តិសាស្ត្រនៃព្រះរាជាណាចក្រកម្ពុជា ក្នុងការអនុវត្តលទ្ធិប្រជាធិបតេយ្យសេរីពហុបក្ស និងពង្រឹងនីតិរដ្ឋ ដែលជាសិទ្ធិសម្រេចដ៏ពេញលេញរបស់ប្រជាជនកម្ពុជា ជាម្ចាស់ជោគវាសនារបស់ប្រទេសជាតិខ្លួន។
សូមបញ្ជាក់ថា សម័យប្រជុំលើកដំបូង បានធ្វើឡើងកាលពីព្រឹកថ្ងៃទី០៥ ខែកញ្ញា ឆ្នាំ២០១៨ក្រោមព្រះរាជអធិបតីភាពដ៏ខ្ពង់ខ្ពស់របស់ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដោយមានការអញ្ជើញចូលរួមពីសំណាក់ឯកអគ្គរដ្ឋទូត ឯកអគ្គរាជទូត នៃបណ្តាប្រទេសនានាប្រចាំកម្ពុជាផងដែរ៕
Source: Kampuchea Thmey Daily
0 Comments