អ្នកប្រដាល់ជើងខ្លាំងកម្ពុជាចាន់ ប៊ុនហឿន ក្លិបនិរោធមានជ័យ នឹងត្រូវជួបប្រកួត ជាមួយអ្នកប្រដាល់ឡាវ Nampetch Chhor.Champions នាយប់ថ្ងៃអាទិត្យទី០៩ ខែកញ្ញា ឆ្នាំ២០១៨នេះ នៅក្នុងកម្មវិធីប្រដាល់ដណ្តើមខ្សែក្រវាត់ខារ៉ាបាវទម្ងន់៦០គីឡូក្រាម នៅសង្វៀនបាយ័នស្ទឹងមានជ័យ។
ចាន់ ប៊ុនហឿន ជើងខ្លាំងរបស់កម្ពុជានេះ គេទើបតែផ្តួលយកឈ្នះអ្នកប្រដាល់ថៃ Petchphonrom Petchchinda ក្នុងទឹកទី៣ កាលពីថ្ងៃទី១៨សីហាកន្លងទៅនេះ។ គេមិនធ្លាប់ដែលប៉ះជាមួយឡាវទេ គឺធ្លាប់ជួបថៃប៉ុណ្ណោះ។ ក្នុងការជួបថៃ២៩លើកកន្លងមកនេះ គឺឈ្នះ២០លើក ចាញ់០៧លើក និងស្មើ០២លើក។
Nampetch Chhor. ដែលជាគូរបស់ចាន់ ប៊ុនហឿននេះ គេធ្លាប់មកប្រកួតនៅសង្វៀនបាយ័នស្ទឹងមានជ័យកាលពីថ្ងៃទី១០សីហាកន្លងមកនេះ ដោយវាយឈ្នះរិទ្ធ ភូលូ អ្នកប្រដាល់ក្លិបអាណាចក្រគុនខ្មែរដោយពិន្ទុ។
តាមអ្នកដឹកនាំកីឡាករឡាវអោយដឹងនោះថា អ្នកប្រដាល់ឡាវរូបនេះ ជាជើងខ្លាំងទម្ងន់៦០គីឡូក្រាមប្រចាំនៅស្រុកឡាវ។ ឆ្លងកាត់ការប្រកួត៧៩លើក Nampetch Chhor.វាយឈ្នះ៦៤លើក ចាញ់១៣លើក និងស្មើ០១លើក។
ចាន់ ប៊ុនហឿន គេមានប្រវត្តិប្រកួតចំនួន៦៩លើក ឈ្នះ៥៨លើក និងចាញ់១០លើក និងស្មើ០១លើក ។ ប៊ុនហឿនគេមានថ្វីកែងនិងជង្គង់ល្អណាស់ តែយ៉ាងណាការឈ្នះចាញ់រវាងចាន់ ប៊ុនហឿន និង Nampetch Chhor.នេះ ពុំមាននរណាហ៊ានទាយមុនថាអ្នកណាឈ្នះនោះទេ ?។
ចំពោះ អ្នកប្រដាល់រិទ្ធ ភូលូ ក្លិបអាណាចក្រគុនខ្មែរ នឹងត្រូវជួបប្រកួតជាមួយអ្នកប្រដាល់ថៃឈ្មោះNuth Kor.Kesanon។ពួកគេទាំងពីរជួបប្រកួតគ្នាក្នុងទម្ងន់៦០គីឡូក្រាម។
គូនេះ ក៏ជាគូខ្សែក្រវាត់ក្នុងជំនួបលើកដំបូងដែរ។រិទ្ធ ភូលូ ជាអ្នកប្រដាល់ដែលចាត់ទុកថាជាជើងថ្មី ព្រោះគេទើបតែជួបប្រកួតជាមួយអ្នកប្រដាល់បរទេសចំនួន១០លើកប៉ុណ្ណោះ ក្នុងនោះជួបថៃបាន៧លើក ហើយក៏ជាអ្នកប្រដាល់ដែលមានបទពិសោធន៍ខ្ចីនៅឡើយដែរ។ ប៉ុន្តែរិទ្ធ ភូលូ បែរជាអាចយកឈ្នះថៃបានទាំង៧លើក។ ភូលូ ប្រកួតជាមួយថៃលើកចុងក្រោយនេះ គឺវាយឈ្នះNuth Kor.Kesanonនេះឯង ដោយឈ្នះដោយពិន្ទុ។
រិទ្ធ ភូលូ មានប្រវត្តិប្រកួតប្រមាណជិត៥៣លើកប៉ុណ្ណោះ ក្នុងនោះវាយឈ្នះ៣៦ ចាញ់១៧ តែធ្លាប់ផ្តួលដៃគូអោយសន្លប់ចំនួន១២ ។ គេជាអ្នកប្រដាល់ជើងខ្លាំងស្រករក្រោយ ដោយមានចិត្តធំ កម្លាំងខ្លាំង វាយមិនសំចៃដៃឡើយ ។ ប៉ុន្តែយ៉ាងណាការប្រកួតលើកនេះ មិនដឹងថារិទ្ធ ភូលូ អាចយកឈ្នះ Nuth Kor បានទៀតដែរឬអត់នោះទេ ? ។
Nuth Kor ជាអ្នកប្រដាល់ជើងចាស់ មានស្នៀតទាត់និងកណ្តាប់ដៃល្អ។គេធ្លាប់មកប្រកួតនៅស្រុកខ្មែរពីរដងហើយកន្លងមក ដោយវាយចាញ់ចាន់ ចំរើន ក្លិបនិរោធមានជ័យដោយពិន្ទុនិងចាញ់រិទ្ធ ភូលូដោយពិន្ទុ ។ ទោះជាយ៉ាងណា រិទ្ធ ភូលូមិនអាចមើលស្រាលចំពោះNuth Kor នេះឡើយ ព្រោះលើកនេះជាការប្រកួតជម្រុះដណ្តើមខ្សែក្រវាត់ ។ ចាំមើល Nuth Kor អាចសងសឹករិទ្ធ ភូលូ បានឬអត់ ?។
ចំពោះការប្រកួតរវាងអ្នកប្រដាល់រួមជាតិវិញនោះ ហូ សុភា អ្នកប្រដាល់ក្លិបឃ្លាំងមឿងកីឡា ត្រូវគេផ្គូអោយជួបប្រកួតជាមួយអ្នកប្រដាល់ហេង សុភ័ក្រ ក្លិបព្រៃទទឹងខេត្តបាត់ដំបង ដោយជួបប្រកួតក្នុងទម្ងន់៥៧ គីឡូក្រាម ។ ធន់ វណ្ណា អ្នកប្រដាល់ក្លិបមជ្ឈមណ្ឌលកីឡាខ.ភ.ម ត្រូវជួបប្រកួតជាមួយ ម៉ែន ១៥ធ្នូអ្នកប្រដាល់ក្លិបកងពលតូចទ័ពឆ័ត្រយោង៩១១ ក្នុងប្រភេទទម្ងន់៥៧គីឡូក្រាមដែរ៕
Source: Kampuchea Thmey Daily
0 Comments