ភ្នំពេញ ៖ ប៉ូលិសខណ្ឌឫស្សីកែវ បានឲ្យដឹងនៅថ្ងៃទី០៥ ខែកញ្ញា ឆ្នាំ២០១៨ ថា ចោរម្នាក់ ដែលត្រូវចាប់ខ្លួនតាមដីកាបង្គាប់អោយចាប់ខ្លួនរបស់លោកស្រី ថ្លាង ផាណែត ចៅក្រមសាលាដំបូង ឈ្មោះ ហាក់ ចាន់នី ត្រូវបានលោកស្រីចៅក្រមដោះលែងវិញស្ងាត់ៗហើយកាលពីថ្ងៃទី០៥ ខែកញ្ញានេះ ។
ប៉ូលិសបានឲ្យដឹងថា ជនជាប់ចោទជាចោរលួចរថយន្ត មានឈ្មោះ ហាក់ ចាន់នី ភេទប្រុស អាយុ ៤១ឆ្នាំ ជនជាតិខ្មែរ មុខរបរ ចោរ ( តែប្រភពមិនច្បាស់ការថា លោកចោរ ជាយោធាផ្កាយ៣ផង ) មានទីលំនៅផ្ទះលេខ៩៥អ ភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។
ដើមចមដែលនាំឲ្យ លោកចោរ ត្រូវប៉ូលិសវៃខ្នោះ ព្រោះតែ កាលពីថ្ងៃទី២២ ខែឧសភា ឆ្នាំ២០១៨ លោកស្រីចៅក្រម ថ្លាង ផាណែត បានប្រកាសសាលក្រមផ្តន្ទាទោស ដាក់គុក លោក ហាក់ ចាន់នី កំណត់ ២ឆ្នាំ និងចេញដីកាចាប់ និងឃុំខ្លួន ពាក់ព័ន្ធបទល្មើសឆបោក។
មន្ត្រីតុលាការបង្ហើបថា អំពើឆបោក របស់លោកចោរ ហាក់ ចាន់នី គឺលួចឡានជនរងគ្រោះយកលក់ យកលុយចាយលេង។
នគរបាល ខណ្ឌឬស្សីកែវ បានឃាត់ខ្លួនលោកចោរ ឈ្មោះ ហាក់ ចាន់នី កាលពីរសៀលថ្ងៃទី០៣ ខែកញ្ញា ឆ្នាំ២០១៨ នៅចំណុចផ្លូវបេតុង ក្រុមទី៩ ភូមិឃ្លាំងសាំង សង្កាត់ឬស្សីកែវ រាជធានីភ្នំពេញ តាមដីកាបង្គាប់ឲ្យចាប់ និងឃុំខ្លួនលេខ ៣២៨ ដ ច ន ចុះថ្ងៃទី២២ ខែឧសភា ឆ្នាំ២០១៨ របស់លោកស្រី ថ្លាង ផាណែត ចៅក្រមជំនុំជម្រះនៃសាលាដំបូងរាជធានីភ្នំពេញ ពីបទ ឆបោក (លួចរថយន្តគេយកទៅលក់) ប្រព្រឹត្តកាលពីកំឡុងឆ្នាំ២០១៧ នៅរាជធានីភ្នំពេញ៕
Source: Kampuchea Thmey Daily
0 Comments