ក្រុងសេអ៊ូលបាននិយាយនៅថ្ងៃព្រហស្បតិ៍ថា លោក គីម ជុងអ៊ុន នឹងជួបជាមួយប្រធានាធិបតីកូរ៉េខាងត្បូងលោក មូន ចេអ៊ីន នៅឯកិច្ចប្រជុំកំពូលមួយក្នុងទីក្រុងព្យុងយ៉ាងក្នុងខែកញ្ញានេះ ដើម្បីពិភាក្សាអំពីការរំសាយអាវុធនុយក្លេអ៊ែរ។
ទីប្រឹក្សាសន្តិសុខជាតិរបស់កូរ៉េខាងត្បូងលោក Chung Eui-yong បានឲ្យដឹងថា នេះជាជំនួបលើកទី៣ក្នុងឆ្នាំនេះរវាងមេដឹកនាំទាំងពីរ ដែលនឹងពិភាក្សាអំពីវិធានការជាក់ស្តែងដើម្បីរំសាយអាវុធនុយក្លេអ៊ែរក្នុងអំឡុងកិច្ចប្រជុំកំពូលចាប់ពីថ្ងៃទី១៨ដល់ថ្ងៃទី២០ខែកញ្ញា។
កាលបរិច្ឆេទនៃកិច្ចប្រជុំកំពូលនេះត្រូវបានសម្រេចក្នុងអំឡុងដំណើរទស្សនកិច្ចកាលពីថ្ងៃពុធរបស់លោក Chung ទៅកាន់ទីក្រុងព្យុងយ៉ាងដែលនៅទីនោះលោកបានជួបលោក គីម ហើយបានប្រគល់លិខិតផ្ទាល់ខ្លួនមួយពីលោក មូន។
យោងតាមប្រេសិតរូបនេះបានឲ្យដឹងថា មេដឹកនាំកូរ៉េខាងជើងបាននិយាយថា លោកមានឆន្ទៈសហការជាមួយទាំងទីក្រុងសេអ៊ូលនិងវ៉ាស៊ីនតោនស្តីពីការលុបបំបាត់អាវុធនុយក្លេអ៊ែរ។
លោក Chung បាននិយាយថា ក្នុងអំឡុងកិច្ចប្រជុំ មេដឹកនាំកូរ៉េខាងជើងបានសម្តែងនូវការប្តេជ្ញាចិត្តយ៉ាងមុតមាំឆ្ពោះទៅរកការលុបបំបាត់អាវុធនុយក្លេអ៊ែរទាំងស្រុងចេញពីឧបទ្វីបកូរ៉េក៏ដូចជាបំណងធ្វើការយ៉ាងជិតស្និទ្ធជាមួយអាមេរិកដើម្បីសម្រេចឲ្យបានគោលដៅនេះផងដែរ។
ដំណើរទស្សនកិច្ចរបស់បេសកជនកូរ៉េខាងត្បូងទៅកាន់ទីក្រុងព្យុងយ៉ាងបានកើតឡើងចំពេលមានឧបសគ្គលើបញ្ហាអាវុធនុយក្លេអ៊ែររបស់កូរ៉េខាងជើងខណៈកិច្ចខិតខំប្រឹងប្រែងរបស់សហរដ្ឋអាមេរិកក្នុងការរុះរើឃ្លាំងអាវុធបានជាប់គាំងអស់រយៈពេលជាច្រើនសប្តាហ៍មកហើយ។
ក្នុងកិច្ចប្រជុំកំពូលជាប្រវត្តិសាស្ត្រនៅប្រទេសសិង្ហបុរីកាលពីខែមិថុនា ប្រធានាធិបតីសហរដ្ឋអាមេរិកលោកដូណាល់ត្រាំនិងលោកគីមបានប្តេជ្ញាធ្វើការឆ្ពោះទៅរកការរំសាយអាវុធនុយគ្លេអ៊ែរទាំងស្រុងចេញពីឧបទ្វីបកូរ៉េប៉ុន្តែកិច្ចព្រមព្រៀងរបស់ពួកគេមានភាពលម្អិតតិចតួចណាស់ស្តីពីអត្ថន័យនិងវិធីដែលវានឹងត្រូវសម្រេចបាន៕ AFP
Source: Kampuchea Thmey Daily
0 Comments