ក្រុមហ៊ុនឆ្នោតកីឡាជាតិ បានផ្ដល់រង្វាន់លើកទឹកចិត្តដល់កីឡាករសាលី អ៊ូមើតនិង កីឡការិនីខាន់ ចេសា ដែលជាម្ចាស់មេដាយមាសក្នុងការប្រកួតកីឡាអាស៊ី (ASIAN Games) ទី១៨នៅប្រទេសឥណ្ឌូនេស៊ី ក្នុងឱកាសដែលគណៈកម្មាធិការជាតិអូឡាំពិកកម្ពុជា ដឹកនាំទៅទស្សនកិច្ចនៅក្នុងក្រុមហ៊ុនឆ្នោតកីឡាជាតិ នាវេលាថ្ងៃត្រង់ទី០៦កញ្ញា២០១៨នេះ។
លោកវ៉ាត់ ចំរើនអគ្គលេខាធិការ គណៈកម្មាធិការជាតិអូឡាំពិក(NOCC) បានមានប្រសាសន៍អោយដឹងថា ក្រុមហ៊ុនឆ្នោតកីឡាជាតិ ជាក្រុមហ៊ុនទី២ដែលបានលើកទឹកចិត្តដល់ម្ចាស់មេដាយមាសអាស៊ី បន្ទាប់ពីក្រុមហ៊ុនណាហ្គាវើល។ លោកបញ្ជាក់ថា ក្រុមហ៊ុនឆ្នោតកីឡាជាតិ ជាដៃគូសហការរបស់គណៈកម្មាធិការជាតិអូឡាំពិកកម្ពុជា ក្នុងការស្វែងរកថវិកា សម្រាប់ជួយឧបត្ថម្ភនិងលើកទឹកចិត្តដល់កីឡាករ កីឡាការិនី ដែលមានស្នាដៃឆ្នើមក្នុងការដណ្តើមមេដាយលើឆាកអន្តរជាតិ។
ពិសេសនោះ លោកវ៉ាត់ ចំរើនក្នុងនាមកម្ពុជាធ្វើម្ចាស់ផ្ទះកីឡា SEA Games ឆ្នាំ ២០២៣ NO CC ក៏បានបង្ហាញមហិច្ឆតា និងរកយុទ្ធសាស្ត្រថ្មី ដើម្បីអោយកីឡាករ កីឡាការិនីកម្ពុជា រកមេដាយបានច្រើននៅក្នុងការប្រកួតកីឡាស៊ីហ្គេមលើកទី៣២ខាងមុខនេះ។
កញ្ញា Chen Mengling ប្រធានក្រុមប្រឹក្សាភិបាលក្រុមហ៊ុនឆ្នោតកីឡាជាតិ បញ្ជាក់ថា សម្រាប់រង្វាន់លើកទឹកចិត្តដល់កីឡាករសាលី អ៊ូមើតនិង កីឡការិនីខាន់ ចេសា ដែលជាម្ចាស់មេដាយមាសនោះ មានសន្លឹកឆ្នោតកីឡាជាតិជាច្រើនដុំ និងថវិកាលើកទឹកចិត្តមួយចំនួន។
សូមរម្លឹកថា ក្នុងប្រវត្តិជាង៦០ឆ្នាំដែលព្រឹត្តិការណ៍កីឡាអាស៊ីបានបង្កើតឡើងនោះ នេះជាលើកទី ២ហើយ ដែលកម្ពុជារកបានមេដាយមាសពីការប្រកួតកីឡាកម្រិតទ្វីបនេះ។ កាលពីលើកទី១ កីឡាការិនីតេក្វាន់ដូស៊ន សៀវម៉ី ដែលដណ្ដើមបានមេដាយមាសក្នុងការប្រកួតកីឡាអាស៊ី (ASI AN Games) ទី១៧នៅទីក្រុង Incheon សាធារណរដ្ឋកូរ៉េ ឆ្នាំ២០១៤។
គួរបញ្ជាក់ដែរថា កាលពីចុងទសវត្សរ៍ឆ្នាំ១៩៦០ និង ដើមទសវត្សឆ្នាំ១៩៧០ កម្ពុជាធ្លាប់ដណ្ដើមបានមេដាយប្រាក់ និង មេដាយសំរិទ្ធប៉ុណ្ណោះ។ ប៉ុន្តែដើមទសវត្ស២១នេះ កម្ពុជាទទួលបានមេដាយមាស ដែលអាចនិយាយបានថា ក្រោយរយះពេល៤៤ឆ្នាំ(១៩៧០-២០១៤) ទើបកម្ពុជាអាចដណ្តើមបានមេដាយឡើងវិញបាន និងបានរហូតដល់មេដាយមាស ពីការប្រកួតកីឡាទ្វីបអាស៊ីនេះទៀតផង៕
Source: Kampuchea Thmey Daily
0 Comments