បាត់ដំបង ៖ ជនដៃដល់ម្នាក់ ដែលជាឃាតកសម្លាប់មនុស្ស ត្រូវបានកម្លាំងសមត្ថកិច្ចនៃស្នងការដ្ឋាន នគរបាលខេត្ត ធ្វើការស្រាវជ្រាវ រហូតឈានដល់ការឃាត់បានខ្លួនភ្លាមៗ បន្ទាប់ពីមានការភ្ញាក់ផ្អើលដោយសារតែឃើញសពបុរសម្នាក់ស្លាប់អណ្តែតទឹកក្នុងស្ទឹងសង្កែ មិនបានប៉ុន្មានម៉ោងផង។
ការប្រទះឃើញសពនេះ គឺនៅវេលាម៉ោង១១និង៣០នាទី ថ្ងៃទី ៥ ខែកញ្ញា ឆ្នាំ២០១៨នៅចំណុចមុខវត្តកែវ ក្នុងក្រុមទី១៨ ភូមិកំពង់សំបួរ ឃុំសំរោងក្នុង ស្រុកឯកភ្នំ ខេត្តបាត់ដំបង ដោយមានកម្លាំងអធិការដ្ឋាននគរបាលស្រុកឯកភ្នំ និងប្រជាពលរដ្ឋសហការគ្នាស្រង់សពបុរសនេះឡើងពីទឹក មកដាក់នៅលើច្រាំងស្ទឹងដើម្បីអោយកម្លាំងជំនាញ បច្ចេកទេសវិទ្យាសាស្ត្រ និងកោសល្យវិច័យចុះទៅពិនិត្យ។
ជនរងគ្រោះមានឈ្មោះ ធឿន មករា ហៅ ស៊ុយ ភេទប្រុស អាយុ៣៣ឆ្នាំ រស់នៅភូមិស្លាកែត សង្កាត់ស្លាកែត ក្រុងបាត់ដំបង ដោយកម្លាំងជំនាញបានលើកឡើងថា សពនេះ អាចស្លាប់មកពីការលង់ទឹក និងបន្ទាប់ពីមានការប៉ះទង្គិចនឹងវត្ថុរឹងអ្វីមួយនៅលើផ្ទៃមុខ ( អាចមកពីអំពើហិង្សា ដោយមានស្ថានទម្ងន់ )។
តាមការអះអាងពីសាក្សីមួយចំនួនបាននិយាយថា កាលពីយប់ថ្ងៃទី៣ ខែកញ្ញា នៅម្តុំផ្ទះជនរងគ្រោះរស់នៅ មានការផឹកស៊ី រហូតដល់ពេលរំលងអធ្រាត្រ ក៏ស្រាប់តែឮសំឡេងដូចជាមនុស្សដេញវ៉ៃគ្នា រហូតដល់មាត់ស្ទឹង ដោយមានទាំងសំឡេងស្រែកអោយគេជួយថែមទៀត។
ក្រោយពីមានការបញ្ជាផ្ទាល់ពីលោកស្នងការ អ៊ុច សុខុន រួចមក លោក ស្នងការរងជេត វណ្ណនី បានចាត់តាំងលោក អូន ហ្វៃ នាយការិយាល័យ ព្រហ្មទណ្ឌកម្រិតធ្ងន់ លោកនាយរង សេង លុច ដើម្បីចុះសហការជាមួយនឹងកម្លាំងសមត្ថកិច្ចមូលដ្ឋានធ្វើការស្រាវជ្រាវ រហូតឈានដល់ការនាំខ្លួនជនសង្ស័យម្នាក់ មកសាកសួរ។
នៅចំពោះមុខសមត្ថកិច្ច ឈ្មោះ ចាន់ សុហេង ភេទប្រុស អាយុ២៤ឆ្នាំ មានស្រុកកំណើតនៅខេត្តកោះកុង ស្នាក់នៅបណ្តោះអាសន្ន ភូមិស្លាកែត សង្កាត់ស្លាកែត ក្រុងបាត់ដំបង បានសារភាពថា នៅយប់នោះពិតជាមានការផឹកស៊ីមែន ប៉ុន្តែនៅម៉ោងប្រហែល៩ យប់ ពួកគេក៏បានបែកផ្លូវគ្នាទៅដេករៀងៗខ្លួនអស់ទៅ។
ជនសង្ស័យដែលជាឃាតកបានបន្តថា ប៉ុន្តែបានប្រហែលកន្លះម៉ោង ឈ្មោះស៊ុយ (ជនរងគ្រោះ) បានដើរមកសួររកស្រាផឹកទៀត ដោយខឹងដេកមិនបានខ្លួនក៏បានដេញធាក់រហូតដល់មុខវត្តដើម្បីអោយគេទៅដេកវិញ មិនតែប៉ុណ្ណោះ គឺនៅម៉ោង១ រំលងអធ្រាត្រ គេក៏បានដើរមកស្រែកឡូឡាទៀត ដោយសារតែខឹងខ្លាំងពេក ខ្លួនក៏បានស្រវ៉ាចាប់អំបែងពាងប៉ុនកដៃ ដេញរហូតដល់មាត់ស្ទឹង ហើយក៏បានវ៉ៃទៅលើផ្ទៃមុខចំនួន ២ អំបែងនោះបណ្តាលអោយគេដួលទៅក្នុងទឹក រួចខ្លួនក៏បានឡើងមកដេកវិញជាធម្មតា ប៉ុន្តែស្អែកឡើងក៏នៅតែមិនឃើញជនរងគ្រោះត្រឡប់ទៅផ្ទះវិញឡើយ ទើបខ្លួនគេគិតថា ប្រហែលជាគេអស់អាយុត្រឹមហ្នឹងហើយមើលទៅ ប៉ុន្តែនៅថ្ងៃទី ៥ ក៏ត្រូវសមត្ថកិច្ចឃាត់ខ្លួនតែម្តង។
លោកឧត្តមសេនីយ៍ត្រី ជេត វណ្ណនី បានលើកឡើងថា ពិតជាមានរឿងបទល្មើសឧក្រិដ្ឋកើតឡើងផ្ទួនៗគ្នាមែន ប៉ុន្តែក៏ត្រូវបានកម្លាំងបំបែកបានទាំងអស់ ដូចជារឿងបាញ់សម្លាប់នៅស្រុកបាណន់ រឿងរំលោភសម្លាប់នៅស្រុកសង្កែ និងចុងក្រោយរឿងនេះតែម្តងបច្ចុប្បន្នជនសង្ស័យដែលជាឃាតករ ត្រូវបានកម្លាំងសមត្ថកិច្ចរៀបចំឯកសារ ដើម្បីបញ្ជូនខ្លួនទៅកាន់តុលាការ ចំណែកសពក៏ត្រូវបានប្រគល់ទៅអោយក្រុមគ្រួសារ រៀបចំធ្វើបុណ្យតាមប្រពៃណីហើយដែរ៕
Source: Kampuchea Thmey Daily
0 Comments