អ្នកជួយសង្គ្រោះហ្វីលីពីនរាប់រយនាក់បានប្រើប្រាស់ប៉ែលនិងដៃទទេរបស់ពួកគេនៅថ្ងៃអង្គារដើម្បីស្វែងរកតាមការបាក់ដីដ៏ធំមួយដែលជាកន្លែងមនុស្សរាប់សិបនាក់ត្រូវគេព្រួយបារម្ភថាបានស្លាប់នៅក្នុងតំបន់ដែលរងការវាយប្រហារខ្លាំងបំផុតដោយព្យុះទីហ្វុង Mangkhut ខណៈអ្នកស្លាប់ដោយសារព្យុះនេះកើនដល់៧៤នាក់។
ព្យុះដែលមានកម្លាំងខ្លាំងបំផុតសម្រាប់ឆ្នាំ២០១៨នេះបានកម្ទេចផ្ទះនិងជន់លិចតំបន់កសិកម្មសំខាន់ៗនៅភាគខាងជើងប្រទេសហ្វីលីពីនមុនពេលវាយប្រហារទីក្រុងហុងកុងនិងភាគខាងត្បូងប្រទេសចិនជាមួយខ្យល់បក់ដ៏សាហាវនិងភ្លៀងធ្លាក់ខ្លាំង។
យោងតាមប៉ូលិសបានឲ្យដឹងថា ព្យុះទីហ្វុងនេះបានសម្លាប់មនុស្សចំនួន៤នាក់នៅក្នុងខេត្ត Guangdong ភាគខាងត្បូងប្រទេសចិនហើយចំនួនអ្នកស្លាប់បានកើនឡើងដល់៧៤នាក់នៅកោះ Luzon ភាគខាងជើងប្រទេសហ្វីលីពីនខណៈចំនួនត្រូវបានគេរំពឹងថានឹងកើនឡើងទៀត។
មនុស្សយ៉ាងតិច៤០នាក់នៅតែត្រូវបានគេគិតថាបានកប់នៅក្នុងដីបាក់នៅទីក្រុង Itogon ។
មន្ត្រីជាន់ខ្ពស់មូលដ្ឋានលោក Victorio Palangdan បានប្រាប់ AFP ថា “សឹងតែ៩៩ភាគរយទៅហើយដែលពួកគេអាចនឹងស្លាប់ប៉ុន្តែនៅមានឱកាសរស់ត្រឹមតែ១ភាគរយប៉ុណ្ណោះ”។ គាត់និយាយថា “កិច្ចប្រឹងប្រែងជួយសង្គ្រោះនឹងបន្តរហូតដល់ប្រធានាធិបតីបញ្ជាឲ្យយើងឈប់”។
ដោយសារតែផ្លូវថ្នល់រអិល អាជ្ញាធរមិនអាចនាំយកឧបករណ៍ធុនធ្ងន់ចូលទៅក្នុងតំបន់នេះដើម្បីពន្លឿនការស្វែងរកនោះទេ។ ជាលទ្ធផល ពួកគេបានប្រើមនុស្សដើម្បីទាញយកកម្ទេចកម្ទី។
ជនរងគ្រោះស្ទើរតែទាំងអស់នៃព្យុះនេះគឺត្រូវបានសម្លាប់នៅក្នុងការបាក់ដីជាច្រើនកន្លែងដែលបានកើតឡើងនៅតាមបណ្តោយជួរភ្នំ Cordillera ដែលជាតំបន់រុករករ៉ែមាសដ៏សំខាន់មួយ។
ភាគច្រើននៃអ្នកដែលត្រូវបានកប់នៅទីក្រុង Itogon គឺជាកម្មករអណ្តូងរ៉ែមាសខ្នាតតូចនិងក្រុមគ្រួសាររបស់ពួកគេដែលបានជ្រកកោននៅក្នុងអគារដែលត្រូវបានបោះបង់ចោលដោយក្រុមហ៊ុនរ៉ែដ៏ធំមួយ។
ប្រទេសហ្វីលីពីនមានកំណត់ត្រារុករករ៉ែមិនល្អទេដោយការបាក់រូងភ្នំនិងការបាក់ដីក្នុងរយៈពេលប៉ុន្មានឆ្នាំថ្មីៗនេះជាទៀងទាត់បានបណ្តាលឲ្យមនុស្សបាត់បង់ជីវិត៕ AFP
Source: Kampuchea Thmey Daily
0 Comments