កាលពីថ្ងៃចន្ទ រដ្ឋបាលលោក Trump បានកាត់បន្ថយការទទួលយកជនភៀសខ្លួនប្រចាំឆ្នាំរបស់ខ្លួនសម្រាប់ឆ្នាំទីពីរជាប់គ្នាដោយនិយាយថា ខ្លួននឹងទទួលយកអតិបរមាត្រឹមតែ៣០,០០០នាក់ប៉ុណ្ណោះក្នុងឆ្នាំសារពើពន្ធខាងមុខនេះ។
ចំនួននេះបានធ្លាក់ចុះពីការកំណត់៤៥,០០០នាក់ក្នុងឆ្នាំនេះដែលបញ្ចប់នៅថ្ងៃទី៣០ខែកញ្ញា។
វាជាចំនួនទាបបំផុតសម្រាប់កម្មវិធីជនភៀសខ្លួនរបស់ក្រសួងការបរទេសអាមេរិកចាប់តាំងពីវាត្រូវបានបង្កើតឡើងក្នុងឆ្នាំ១៩៨០។
រដ្ឋមន្ត្រីក្រសួងការបរទេសលោក Mike Pompeo បាននិយាយថា “គោលនយោបាយជនភៀសខ្លួនដែលមានភាពប្រសើរឡើងនៃរដ្ឋបាលនេះបានបម្រើដល់ផលប្រយោជន៍ជាតិរបស់សហរដ្ឋអាមេរិកនិងពង្រីកសមត្ថភាពរបស់យើងដើម្បីជួយដល់អ្នកដែលត្រូវការជំនួយនៅទូទាំងពិភពលោក។ យើងគឺជានិងបន្តជាប្រជាជាតិដែលមានចិត្ដទូលាយបំផុតនៅក្នុងពិភពលោក”។
កម្រិតថ្មីនេះគឺតិចជាងមួយភាគបួននៃការកំណត់ចំនួន១១០,០០០នាក់ដែលត្រូវបានកំណត់ដោយអតីតប្រធានាធិបតី Barack Obama សម្រាប់ឆ្នាំសារពើពន្ធ២០១៧។
ការធ្លាក់ចុះយ៉ាងខ្លាំងនេះគឺជាផ្នែកមួយនៃការបង្ក្រាបជាទូទៅរបស់លោកប្រធានាធិបតី Donald Trump លើការធ្វើអន្តោប្រវេសន៍។
លោក Pompeo បាននិយាយថា បន្ទុកនៃសំណើសុំសិទ្ធិជ្រកកោនរាប់សែនអ្នកដែលភាគច្រើនមកពីប្រទេសម៉ិកស៊ិកនិងអាមេរិកកណ្តាលគឺជាបន្ទុកយ៉ាងធ្ងន់ធ្ងរលើការិយាធិបតេយ្យដែលកំពុងវាយតម្លៃពាក្យសុំ។ លោកក៏បាននិយាយផងដែរថា រដ្ឋាភិបាលត្រូវតែប្រុងប្រយ័ត្នបន្ថែមទៀតចំពោះការទទួលយកការគំរាមកំហែងព្រហ្មទណ្ឌនិងភេរវកម្ម។
លោកបាននិយាយថា “នៅឆ្នាំនេះ យើងបានឃើញភស្តុតាងរួចទៅហើយដែលថា ប្រព័ន្ធនេះពីមុនគឺមានបញ្ហា។ វាអនុញ្ញាតឲ្យជនបរទេសជ្រៀតចូលដែលត្រូវបានគេរកឃើញនាពេលក្រោយថាជាសមាជិកនៃក្រុម ISIS ក៏ដូចជាបុគ្គលដទៃទៀតដែលមានប្រវត្តិបទល្មើសព្រហ្មទណ្ឌផងដែរ”។
យោងតាមតួលេខរបស់ក្រសួងការបរទេសបានបង្ហាញថា រហូតដល់ថ្ងៃទី១៤ខែកញ្ញាដែលមានរយៈពេលពីរសប្តាហ៍មុនពេលបញ្ចប់ឆ្នាំសារពើពន្ធ២០១៨ ប្រទេសនេះបានទទួលយកជនភៀសខ្លួនត្រឹមតែ២០,៨២៥នាក់ប៉ុណ្ណោះដែលតិចជាងពាក់កណ្តាលនៃកូតាឆ្នាំនេះ៕ AFP
Source: Kampuchea Thmey Daily
0 Comments