ភ្នំពេញ ៖ មន្ត្រីជាន់ខ្ពស់ក្រសួងកសិកម្មរុក្ខាប្រមាញ់និងនេសាទ បានជំរុញឲ្យកសិករតាមបណ្តាខេត្តនីមួយៗពង្រីកពីសហគមន៍កសិករទៅជាសហភាពកសិករវិញ ដើម្បីធានាតម្លៃកសិផលនៅលើទីផ្សារឲ្យបានខ្ពស់លើកស្ទួយដល់សេដ្ឋកិច្ចកសិករឲ្យកាន់តែប្រសើរថែមទៀត។
លោក ម៉ៅ មិនា ប្រធាននាយកដ្ឋានផ្សព្វផ្សាយនៃអគ្គនាយដ្ឋានកសិកម្មបានមានប្រសាសន៍ថា ការបង្កើតសហភាពកសិករនេះ គឺដើម្បីឲ្យកសិករកាន់តែមានភាពងាយស្រួលក្នុងការរៀបចំផែនការច្បាស់លាស់ មានលទ្ធភាពចុះកិច្ចសន្យា ជាមួយបណ្តាក្រុមហ៊ុនសម្រាប់ទិញផលិតផលនៅពេលកសិករប្រមូលផលបាន ក៏ដូចងាយស្រួលដល់មន្ត្រីជំនាញកសិកម្មក្នុងការចុះទៅធ្វើការផ្សព្វផ្សាយពីបច្ចេកទេសថ្មីៗដល់សហគមន៍ផងដែរ។
ថ្លែងក្រោយពិធីសម្ពោធពិព័រណ៍និងសន្និសីទអន្តរជាតិធំបំផុតស្តីពី កសិកម្ម ចិញ្ចឹមសត្វ ជលផលនិងនេសាទនៅប្រទេសកម្ពុជាកាលពីថ្ងៃទី៥ ខែកញ្ញា ឆ្នាំ២០១៨ នៅមជ្ឈមណ្ឌលកោះពេជ្រ លោកក៏បានជំរុញឲ្យប្រជាកសិករនៅទូទាំងប្រទេសរួមគ្នាប្រមូលផ្តុំចងក្រងសហគមន៍កសិករនីមួយៗបង្កើតទៅជាសហភាពកសិករឲ្យបានច្រើនថែមទៀត ដើម្បីជួយឲ្យកសិករមានភាពរឹងមាំក្នុងការចរចាតម្លៃកសិផលជាមួយអាជីវករ ងាយស្រួលការផ្គត់ផ្គង់ទៅតាមតំរូវការទីផ្សារនិងទទួលបាននូវបច្ចេកទេសថ្មីៗបន្ថែមទៀត លើការដាំដុះដំណាំកសិកម្មជាដើម។
ចំណែកលោក គិតសេង អនុរដ្ឋលេខាធិការក្រសួងកសិកម្មរុក្ខាប្រមាញ់និងនេសាទបានអំពាវនាវឲ្យកសិករចងក្រងជាសមាគម ឬ សហគមន៍ឲ្យបានច្រើនបន្ថែមទៀត ដើម្បីឲ្យកសិករអាចទំនាក់ទំនងគ្នាពីផែនការបច្ចេកទេសការដាំដុះនិងទីផ្សារកសិផលឲ្យបានច្បាស់លាស់សម្រាប់ជួយគាំទ្រដល់កសិករនៅតាមសហគមន៍នីមួយៗឲ្យកាន់តែមានការរីកចម្រើន ខណៈបច្ចុប្បន្ននេះនៅទូទាំងប្រទេសមានសហគមន៍កសិកររហូតដល់ទៅ៨៥៧សហគមន៍។
លោកបានបន្តថា « ឧទាហរណ៍ថា បើគេធ្វើជាកុងត្រាក់ហ្វាមមីងធ្វើផលិតកម្មតាមកិច្ចសន្យាចងជាសហគមន៍ម៉ាស្រុកមាន៥ពាន់ទៅ១ម៉ឺនហិកតាផលិតទំនិញឲ្យបានច្រើនទៅងាយស្រួលសម្រាប់អ្នកវិនិយោគក៏ដូចជាអ្នកយកទៅកែច្នៃផលិតផលកសិកម្មដែលនឹងជួយឲ្យសហគមន៍នីមួយៗកាន់តែមានភាពរឹងមាំថែមទៀត»។
លោក សឿ សាខន ប្រធានសហគមអភិវឌ្ឍន៍កសិកម្មកំពង់ប្រាសាទនៅ ខេត្តកណ្តាលបានគាំទ្រការបង្កើតសហភាពកសិករនេះព្រោះបានជួយដល់កសិករទទួលបាននូវចំណេះដឹងទាក់ទិននឹងបច្ចេកទេសថ្មីៗក្នុងការដាំដុះដូចជាការប្រើប្រាស់ជី ផ្តល់ពូជដល់កសិករដើម្បីទទួលបានទិន្នផលខ្ពស់និងអាចលក់ស្រូវបានក្នុងតម្លៃខ្ពស់ផងដែរ។
លោក លីម សុបញ្ញា តំណាងក្រុមហ៊ុន វីអេសប្រចាំនៅប្រទេសកម្ពុជាដែលជាអ្នករៀបចំការតាំងពិព័រណ៍បានជំរុញឲ្យពាណិជ្ជករក៏ដូចជាកសិករចូលរួមនៅក្នុងពិព័រណ៍អន្តរជាតិសម្រាប់វិស័យកសិកម្ម បសុសត្វ វារីវប្បកម្ម និងនេសាទឧស្សាហកម្មនេះឲ្យបានច្រើនដើម្បីទទួលបាននូវចំណេះដឹងពីបច្ចេកទេសថ្មីៗពីវិស័យកសិកម្ម ការចិញ្ចឹមសត្វនិងវារីវប្បកម្មពីអ្នកជំនាញក្នុងស្រុកនិងបរទេសដើម្បីពង្រឹងទីផ្សារកសិកម្មនៅកម្ពុជាកាន់តែប្រសើរឡើងថែមទៀត។
គួរបញ្ជាក់ថា ពិព័រណ៍និងសន្និសិទ្ធអន្តរជាតិស្តីពីកសិកម្ម ចិញ្ចឹមសត្វ ជលផលនិងនេសាទនៅប្រទេសកម្ពុជានេះមានរយៈពេល៣ថ្ងៃគឺចាប់ពីថ្ងៃទី៥ដល់ថ្ងៃទី៧ខែកញ្ញាឆ្នាំ២០១៨នេះដោយមានស្តង់ចូលរួមជាង៦០និងមានផលិតផលជាង១០០ម៉ាកបង្ហាញផលិតផលអំពីវិស័យកសិកម្ម សត្វចិញ្ចឹម និង វារីវប្បកម្ម៕
Source: Kampuchea Thmey Daily
0 Comments