សៀមរាប ៖ ច្រាំងកសិណអង្គរវត្តជ្រុងខាងលិច ស្លាបខាងជើងប្រវែង៤០ម៉ែត្រ ត្រូវបានជួសជុលដោយអ្នកជំនាញអាជ្ញាធរជាតិអប្សរារួចរាល់ជាស្ថាពរកាលពីចុងឆ្នាំ២០១៧ និងកំពុងបន្តជួសជុលប្រវែង២០ម៉ែត្របន្ថែមទៀត នៅក្នុងឆ្នាំ២០១៨។
លោកស្រី នង បូរ៉ាវី បុរាណវិទូនៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការរបស់អាជ្ញាធរជាតិអប្សរាបានឲ្យដឹងថា ច្រាំងកសិណប្រវែង៤០ម៉ែត្រដែលជួសជុលរួច គឺចំណាយរយៈពេល៤ឆ្នាំ ដោយចាប់ផ្តើមពីឆ្នាំ២០១៣ដល់២០១៧។ ក្នុងចំណោម៤០ម៉ែត្រនេះដែរ គឺមានប្រវែង២០ម៉ែត្រដំបូងធ្លាប់បានជួសជុលម្តងហើយ ដោយបារាំងនាទសវត្សទី៦០ ដែលដឹងបានតាមរយៈការមើលឃើញដោយផ្ទាល់ និងកាន់តែច្បាស់ពេលបើករណ្តៅកំណាយស្រាវជ្រាវមុនធ្វើការជួសជុល។ ក្រោយការបញ្ចប់គម្រោង៤០ម៉ែត្រដោយជោគជ័យ ក្រុមការងារក៏បានបន្តគម្រោងជួសជុល២០ម៉ែត្របន្ថែមនៅឆ្នាំ២០១៨។
លោកស្រីបន្តទៀតថា ចំពោះបច្ចេកទេសជួសជុល បន្ទាប់ពីកំណាយស្រាវជ្រាវយើងដឹងថា ចាស់បុរាណកសាងច្រាំងកសិណដោយដីបុកបង្ហាប់បាតគ្រឹះក្រោម ដូច្នេះដើម្បីរក្សាតម្លៃនៃបេតិកភណ្ឌវប្បធម៌ អាជ្ញាធរជាតិអប្សរាបានជ្រើសយកបច្ចេកទេសបុរាណមកអនុវត្ត ដោយកាយយកដីចាស់ ដីស្អុយចេញ ហើយជំនួសដោយដីថ្មី ហើយបុកបង្ហាប់គ្រឹះក្រោមឲ្យមាំជាមួយថ្មភ្នំ ថ្មក្រលៀន ដីខ្សាច់ និងល្បាយដីដែលបានពីកម្ទេចថ្មបាយក្រៀម ដីឥដ្ឋ កំបោរស។ ចំពោះគ្រឹះ យើងពង្រីកទំហំគ្រឹះចាស់៨០សង់ទីម៉ែត្រទៅ១២០សង់ទីម៉ែត្រ ហើយជម្រៅគ្រឹះទៅក្រោម៣០សង់ទីម៉ែត្រទៅ៨០សង់ទីម៉ែត្រ ធ្វើយ៉ាងណាឲ្យកាំកសិណរឹងមាំបានល្អ។
ក្រៅពីពង្រឹងគ្រឹះហើយ យើងក៏ពង្រឹងរចនាសម្ព័ន្ធច្រាំងកសិន្ធុដោយប្រើថ្មបាយក្រៀមចាស់ដែលមានស្រាប់និងថ្មបាយក្រៀមថ្មីជំនួសថ្ម ដែលពុកផុយមករៀបជាជណ្តើរចំនួន៨កាំ ដោយដាក់ឆ្លាស់គ្នា និងដាប់ចុះក្រោម១សង់ទីម៉ែត្រសម្រាប់ប្រទាក់គ្នាពីមួយទៅមួយក្នុងការរក្សាលំនឹងឲ្យបានល្អមិនឲ្យថ្មរអិល ហើយបិទភ្ជាប់ថ្មពីមួយទៅមួយដោយបាយអររាវ ដើម្បីការពារជម្រាបទឹកចូលក្នុងថ្ម ធ្វើឲ្យថ្មឆាប់ពុកផុយ។ រីឯថ្មភក់ដែលរៀបនៅផ្នែកខាងលើថ្មបាយក្រៀមក៏រៀបទៅតាមលំនាំដើម ដោយប្រើថ្មដែលមានស្រាប់និងថ្មីជំនួសថ្មីដែលមិនអាចទ្រទម្ងន់បានទៀត ហើយបិទភ្ជាប់ថ្មដោយបាយអរម្សៅ ដើម្បីផ្ជិតស្នាមមិនមានទឹកចូលក្នុងថ្ម អាចនាំឲ្យថ្មឆាប់ខូច។
លោកស្រី បូរ៉ាវី ក៏បានបញ្ជាក់ដែរពីមូលហេតុសំខាន់ៗដែលធ្វើឲ្យរចនាសម្ពន្ធសំណង់កសិណអង្គរវត្តផ្នែកខាងលិចស្លាបខាងជើងរងនូវការខូចខាតយ៉ាងខ្លាំង គឺដោយសារអាយុកាលនៃសំណង់ កង្វះការថែទាំជាប្រចាំ ការឡើងចុះនៃកម្ពស់ទឹកមិនទៀងទាត់បានបំផ្លាញគ្រឹះក្រោម រួមទាំងការពុកផុយ នៃស្រទាប់ថ្មបាយក្រៀមខាងក្រោម ដើមឈើធំៗដុះក្បែរច្រាំងបានចាក់ឫសជ្រែកទៅក្នុងថ្ម ធ្វើឲ្យថ្មរំកិលពីទីតាំងដើម នាំឲ្យច្រាំងកសិណរលំ។ បច្ចុប្បន្នអាជ្ញាធរជាតិអប្សរាបានយកចិត្តទុកដាក់យ៉ាងខ្លាំងលើការអភិរក្សនិងជួសជុលទាំងប្រាសាទនិងកសិណ ដើម្បីអភិរក្សសំណង់បុរាណដែលជានិមិត្តរូបនៃជាតិខ្មែរឲ្យរឹងមាំយូរអង្វែងនិងលើកតម្លៃសោភណ្ឌភាពសំណង់បេតិកភណ្ឌឲ្យមានភាពស្រស់ស្អាតជាទីទាក់ទាញទេសចរ។ បន្ថែមពីនោះ ការបណ្តុះធនធានមនុស្ស ក៏ជាផ្នែកសំខាន់ដែលអាជ្ញាធរជាតិអប្សរាគិតគូរយ៉ាងខ្លាំង ដើម្បីបង្កើនស្នាដៃក្នុងនាមជារបស់ខ្លួន ដោយមិនពឹងលើកិច្ចសហប្រតិបត្តិការអន្តរជាតិច្រើនដូចមុនទៀតឡើយ៕
Source: Kampuchea Thmey Daily
0 Comments