ភ្នំពេញ ៖ នៅព្រឹកថ្ងៃទី ៦ ខែកញ្ញានេះ សម័យប្រជុំលើកទី១ នៃរដ្ឋសភានីតិកាលទី៦បន្តដោយអង្គប្រជុំ នឹងចាប់ផ្តើមនៅម៉ោង៨ព្រឹក ក្រោមអធិបតីភាពសម្តេចចក្រី ហេង សំរិន ព្រឹទ្ធសមាជិករដ្ឋសភា និង មានលេខាធិការប្រាំរូបជួយការងារព្រឹទ្ធសមាជិករដ្ឋសភា។ កិច្ចប្រជុំ បានចាប់ផ្តើមរបៀបវារៈការបោះឆ្នោតជ្រើសតាំងប្រធាន អនុប្រធាន នៃរដ្ឋសភា ប្រធាន អនុប្រធានគណៈកម្មការជំនាញទាំងអស់នៃរដ្ឋ សភានិងផ្តល់សេចក្តីទុកចិត្តរាជរដ្ឋាភិបាលថ្មីដែលមាននាយករដ្ឋមន្ត្រី ឧបនាយករដ្ឋមន្ត្រី ទេសរដ្ឋមន្ត្រី និង រដ្ឋមន្ត្រីជាកញ្ចប់ដោយការ លើកដៃ មានសំឡេងគាំទ្រ ១២៥ លើ ១២៥។
ការបោះឆ្នោតជ្រើសតាំងប្រធាន អនុប្រធាន នៃរដ្ឋសភា ប្រធាន អនុប្រធានគណៈកម្មការជំនាញទាំងអស់នៃរដ្ឋ សភា និង ផ្តល់សេចក្តីទុកចិត្តរាជរដ្ឋាភិបាលអាណត្តិទី៦ តាមរយៈការបោះឆ្នោតជាកញ្ចប់នេះគឺធ្វើឡើងតាមនីតិវិធីដែលមានចែងក្នុងមាត្រា៤នៃរដ្ឋធម្មនុញ្ញបន្ថែម។
សមាសភាពថ្នាក់ដឹកនាំរដ្ឋសភានីតិកាលទី៦ រួមមាន៖ សម្តេច ហេង សំរិន ប្រធានរដ្ឋសភា និង អនុប្រធានរដ្ឋសភា ២ រូបគឺ លោក ងួន ញ៉ិល អនុប្រធានទី១ រដ្ឋសភា និង លោកស្រី ឃួន សុដារី អនុប្រធានទី២ រដ្ឋសភា។ សមាជិកគណៈកម្មការជំនាញទាំង៩នៃរដ្ឋសភារួមមាន .ទី១.គណៈកម្មការសិទ្ធិមនុស្ស ទទួលពាក្យបណ្តឹង អង្កេត និង ទំនាក់ទំនងរដ្ឋសភា ព្រឹទ្ធសភា ប្រធានលោកប៉ា សុជាតិវង្ស ។ ទី២.គណៈកម្មការសេដ្ឋកិច្ច ហិរញ្ញវត្ថុ ធនាគារ និង សវនកម្ម ប្រធានលោក ជាម យៀប ។ ទី៣.គណៈកម្មការផែន ការ វិនិយោគ កសិកម្ម អភិវឌ្ឍន៍ជនបទ បរិស្ថាន និង ធនធានទឹក លោក ជា វណ្ណដេត ប្រធាន ។ ទី៤.គណៈកម្មការមហាផ្ទៃការពារ ជាតិ និង មុខងារសាធារណៈលោក ហ៊ុន ណេង ប្រធាន។ ទី៥. គណៈកម្មការការបរទេសនិងសហប្រតិបត្តិការអន្តរជាតិ ឃោសនាការ និងព័ត៌មាន លោក ឈាង វុន ប្រធាន ។ ទី៦.គណៈកម្មការនីតិកម្ម និង យុត្តិធម៌ លោក ប៉ែន បញ្ញា ប្រធាន។ ទី៧.គណៈកម្មការ អប់រំ យុវជន កីឡា ធម្មការ កិច្ចការសាសនាវប្បធម៌ និង ទេសចរណ៍ លោក ហ៊ុន ម៉ានី ប្រធាន។ ទី៨.គណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និង កិច្ចការនារី លោកស្រី ឡោ ខេង ប្រធាន ។ទី៩.គណៈ កម្មការសាធារណការ ដឹកជញ្ជូន ទូរគមនាគមន៍ ប្រែសណិយ៍ ឧស្សាហកម្ម រ៉ែ និង ថាមពល ពាណិជ្ជកម្ម រៀបចំដែនដី នគរូបនីយកម្ម និង សំណង់ លោកស្រី ងិន សុផុន ប្រធាន លោក និង ទី១០. គណៈកម្មការអង្កេតបោសសំអាត និង ប្រឆាំងអំពើពុករលួយ លោក ប៉ែន ស៊ីម៉ន ប្រធាន។
ខាងក្រោមជាឈ្មោះសមាសភាពសមាជិករាជរដ្ឋាភិបាលនីតិកាលទី៦ ដែលរួមមាន ឧបនាយករដ្ឋមន្ត្រី ទេសរដ្ឋមន្ត្រី និង រដ្ឋមន្ត្រី ចំនួន ២៩ រូបនៅតាមក្រសួងទាំង ២៩ ក្នុងនោះរួមមាន ៖ ឧបនាយករដ្ឋមន្ត្រីចំនួន ១០ រូប ,ទេសរដ្ឋមន្ត្រី ១៧ រូប និង រដ្ឋមន្ត្រី ២៩ រូប។ បើពិនិត្យទៅលើបញ្ជីឈ្មោះសមាសភាពរាជរដ្ឋាភិបាលថ្មីនីតិកាលទី៦ នេះ គឺស្ទើរតែមិនមានការផ្លាស់ប្តូរក្រសួងណាមួយ ឡើយគឺ មានតែការតម្លើងឋានៈបន្ថែមពីទេសរដ្ឋមន្ត្រី ទៅឧបនាយករដ្ឋមន្ត្រី និង ពីរដ្ឋលេខាធិការទៅជារដ្ឋមន្ត្រី ៕
Source: Kampuchea Thmey Daily
0 Comments