ភ្នំពេញ ៖ បុរស ៣នាក់ បើកម៉ូតូសណ្ដោងរ៉ឺម៉កឌុបគ្នា ក្នុងល្បឿនលឿន តាមបណ្តាយផ្លូវ ២៧១ទិសដៅពីត្បូងទៅជើង លុះមកដល់ចំណុចស្តុបបំបែកជា៥ ក៏រេចង្កូតទៅបុកដើមឈើនៅចិញ្ចើមផ្លូវបណ្ដាលឲ្យម៉ូតូសណ្ដោងរ៉ឺម៉ករងការខូច បុរស២នាក់រងរបួសធ្ងន់ និងម្នាក់ទៀតរងរបួសស្រាល។
គ្រោះថ្នាក់នេះ បានកើតឡើងកាលពី វេលាម៉ោង២ និង៥០នាទីរំលងអធ្រាត្រ ឈានចូលថ្ងៃទី៥ ខែកញ្ញា ឆ្នាំ២០១៨ ដែលនៅត្រង់ចំណុចស្តុបបំបែកជា៥ តាមបណ្ដោយផ្លូវ២៧១ ស្ថិតក្នុងសង្កាត់ទំនប់ទឹក ខណ្ឌចំការមន រាជធានីភ្នំពេញ។
សាក្សីបាននិយាយឲ្យដឹងថា នៅពេលកើតហេតុ គេឃើញបុរសរងគ្រោះ៣នាក់ បានបើកម៉ូតូសណ្ដោងរ៉ឺម៉កឌុបគ្នា តាមបណ្ដោយផ្លូវលេខ២៧១ទិសដៅពីត្បូងទៅជើង ក្នុងល្បឿនលឿន លុះមក ដល់ចំណុចកើតហេតុ ស្រាប់តែរេចង្កូតទៅបុកដើមឈើនៅចិញ្ចើមផ្លូវ បណ្ដាលឲ្យម៉ូតូសណ្ដោងរ៉ឺម៉ករងការខូចខាតផ្នែកខាងមុខយ៉ាងដំណំ រួមទាំងបណ្ដាលឲ្យបុរស២នាក់រងរបួសធ្ងន់ និងម្នាក់ទៀតរងរបួសស្រាល។
សាក្សីបន្តថា ក្រោយពី កើតហេតុ ជនរងគ្រោះ២នាក់ដែលរបួសធ្ងន់ ត្រូវបានរថយន្តសង្គ្រោះបន្ទាន់របស់មន្ទីរពេទ្យឯកជន សុខ លាភមេត្រី ដឹកយកទៅព្យាបាល។ សមត្ថកិច្ចមូលដ្ឋានបានចុះមកដល់កន្លែងកើតហេតុ ដោយឃើញពុំមានខូចខាតដល់សម្បត្តិរដ្ឋ ទើបប្រគល់ម៉ូតូរ៉ឺម៉កសណ្ដោងឲ្យទៅសាច់ញាតិជនរងគ្រោះយកទៅជួសជុលដោយខ្លួនឯង៕
Source: Kampuchea Thmey Daily
0 Comments