រតនគិរី ៖ បុរសវ័យចំណាស់ម្នាក់ បានសម្រេចចិត្តចងកបញ្ចប់ជីវិតដោយខ្លួនឯងមិនដឹងមូលហេតុ។
ហេតុការណ៍បង្កការភ្ញាក់ផ្អើលនេះ បានកើតឡើងនៅវេលាម៉ោង៩និង៥៣នាទីព្រឹក ថ្ងៃពុធ ១០រោច ខែស្រាពរណ៍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៥ ខែកញ្ញា ឆ្នាំ២០១៨ ត្រង់ចំណុចចម្ការស្វាយចន្ទីខាងក្រោយផ្ទះប្រមាណ២០០ម៉ែត្រ ស្ថិតនៅភូមិការម៉ែនធំ ឃុំសាមគ្គី ស្រុកអូរជុំ។
នគរបាលស្រុកអូរជុំបានឲ្យដឹងថា ប្រជាការពារភូមិរាយការណ៍មកថា មានករណីធ្វើអត្តឃាតចងកសម្លាប់ខ្លួនឯងនៅចំណុចចម្ការស្វាយចន្ទីខាងក្រោយផ្ទះប្រមាណ២០០ម៉ែត្រប៉ុណ្ណោះ។
នគរបាលបានបន្តថា ជនរងគ្រោះមានឈ្មោះ ត្វេត ញី អាយុ ៥៥ឆ្នាំ ជនជាតិទំពួន មុខរបរកសិករ មានទីលំនៅភូមិឃុំកើតហេតុខាងលើ ដោយចងកនឹងខ្សែអង្រឹងជាប់នឹងដើមស្វាយចន្ទី។ មូលហេតុ ខណៈជនរងគ្រោះពីមុនធ្លាប់ផឹកស្រាស្រវឹង ហើយដើរបាត់ពីផ្ទះអស់រយៈពេល១ខែមកហើយ ទើបវិលមកវិញ ស្រាប់តែស្រវឹងលើកនេះរត់ទៅចងកសម្លាប់ខ្លួនឯងតែម្តង។
ក្រោយកើតហេតុកម្លាំងជំនាញនៃអធិការនគរបាលស្រុក ចុះទៅដល់កន្លែងកើតហេតុត្រួតពិនិត្យនឹងធ្វើកោសល្យវិច័យលើសពឃើញថា ជនរងគ្រោះពិតជាស្លាប់ដោយសារធ្វើអត្តឃាតចងកសម្លាប់ខ្លួនឯងពិតប្រាកដមែន មិនមែនរឿងអ្វីនោះឡើយ។
បច្ចុប្បន្នកម្លាំងសមត្ថកិច្ចបានធ្វើកោសល្យវិច័យរួចមក ក៏ធ្វើលិខិតប្រគល់សពជូនក្រុមគ្រួសារដើម្បីយកទៅធ្វើបុណ្យតាមប្រពៃណីបងប្អូនជនជាតិដើមភាគតិចផងដែរ៕
Source: Kampuchea Thmey Daily
0 Comments