ក្រុមបាល់ទាត់ព្រះខ័នរាជស្វាយរៀង បានបាត់ឱកាសក្នុងការដណ្តើមយកជើងឯកទាំងក្នុងពានរង្វាន់លីគកំពូលកម្ពុជា (Metfone Cambodian League 2018) និងទាំងក្នុងពានរង្វាន់សម្តេចតេជោ ហ៊ុន សែន (Hun Sen Cup) នៅរដូវកាលឆ្នាំ២០១៨ នេះ ខណៈសមាជិកជាច្រើននៅក្នុងក្រុមនេះកំពុងតែមានបញ្ហាសុខភាព។
យោងតាមការបញ្ជាក់ពីក្លិបដែលមានមូលដ្ឋាននៅខេត្តស្វាយរៀងមួយនេះថា កីឡាករសំខាន់ៗចំនួន៦នាក់កំពុងស្ថិតក្នុងបញ្ជីកីឡាកររបួសដោយក្នុងនោះកីឡាករ ជា សំណាង ដែលជាប្រធានក្រុមអាចត្រលប់មកហ្វឹកហាត់បានធម្មតា ក្រោយអាក់ខានការប្រកួតមិត្តភាពកន្លងមកដោយសារបញ្ហារបួសប្រអប់ជើង។ ចំណែកកីឡាករ រស់ គង់សំរេច វិញអាចត្រលប់ចូលហ្វឹកហាត់បានវិញហើយដែរ ក្រោយសម្រាកព្យាបាលរបួសប្រេះឆ្អឹងជើងកាលពីដើមរដូវកាលកន្លងមក។
ដោយឡែកកីឡាករ ហេង គីមហុង បានត្រលប់ចូលហ្វឹកហាត់វិញដូចគ្នា ប៉ុន្តែពុំទាន់អាចធ្វើការប្រកួតណាមួយបានឡើយ។ ចំពោះកីឡាករ ប្រាក់ មុន្នីឧត្តម មិនទាន់ច្បាស់ថាអាចលេងបាននៅសប្តាហ៍នេះរឺយ៉ាងណាដោយសារបញ្ហារបួសក្រលៀន។ ងាកមកមើលខ្សែប្រយុទ្ធ សុក សំណាង កំពុងសម្រាកព្យាបាលវះកាត់នៅវៀតណាម ត្រង់របួសឆ្អឹងដែលត្រូវសម្រាករហូតដល់រយៈពេល៥ខែ។ សម្រាប់កីឡាករ សំអឿន ពិដោរ ត្រូវសម្រាករហូតដល់រដូវកាលក្រោយ បន្ទាប់ពីរបួសដាច់សរសៃពួរជង្គង់។
លោក Conor Nestor ដែលជាគ្រូបង្វឹករបស់ក្រុមព្រះខ័នរាជស្វាយរៀង កំពុងតែឈឺក្បាលរឿងដឹកនាំក្រុមទទួលបានចំណាត់ថ្នាក់មិនសូវបានល្អប្រចាំរដូវកាលនេះទាំងក្នុងពានរង្វាន់លីគកំពូលកម្ពុជា និងពានរង្វាន់សម្តេចតេជោ ហ៊ុន សែន។ ចំពោះលីគកំពូលកម្ពុជា វិញក្រោយប្រកួតបាន២០លើក ឈ្នះបាន៨លើក ហើយស្មើគ្នាបាន៣លើក និងបរាជ័យរហូតដល់៩លើកមាន២៧ពិន្ទុ ឈរចំណាត់ថ្នាក់លេខ៦បណ្តោះអាសន្នក្នុងចំណោមក្លិបជាសមាជិកទាំង១២។ ចំណែកពានរង្វាន់សម្តេចតេជោ ហ៊ុន សែន វិញក្រុមនេះបានធ្លាក់ត្រឹមវគ្គ៨ក្រុមចុងក្រោយបន្ទាប់ពីចាញ់ក្រុមអង្គរថាយហ្គឺរ។
នៅក្នុងរដូវកាលដោះដូរកីឡាករដំណាក់កាល២ថ្មីៗនេះ ក្លិបបានដោះដូរកីឡាករគួរឲ្យភ្ញាក់ផ្អើលមួយ ដើម្បីត្រៀមជើងទី២លីគកំពូលកម្ពុជារដូវកាលឆ្នាំ២០១៨ ហើយតាមរយៈការដោះដូរកីឡាករនេះគ្រូបង្វឹកកាន់អាជ្ញាប័ណ្ណ UEFA A License រូបនេះរំពឹងថា ក្រុមនឹងមានគុណភាពមួយកម្រិតថែមទៀត៕
Source: Kampuchea Thmey Daily
0 Comments