បាត់ដំបង ៖ លោក សោម សុវត្ថិ នាយករងសាលាមិត្តភាព ដែលកន្លងមកធ្លាប់មានរឿងអាស្រូវកើតឡើងមិនចេះចប់ មិនចេះហើយនោះ កំពុងពង្រីកមហិច្ឆតារបស់ខ្លួន ដោយដំឡើងសាច់ដុំ ក្នុងការកម្ចាយបុគ្គលិកនៅក្រោមឱវាទរបស់ខ្លួន ដោយគេហាក់មានគំនិតគុំគួន និង ប្រើទ្រឹស្តីមួយ គឺ « ជីកស្មៅ ត្រូវជីកទាំងឫស »។
គួរបញ្ជាក់ដែរថា បើតាមប្រភពច្បាស់ការ គឺបានលើកយកប្រវត្តិ លោកនាយករង សាលាមិត្តភាព មកបញ្ជាក់ថា គេគឺជាបុគ្គលមួយរូបដែលល្មោភអំណាចជាទីបំផុត ព្រោះគេបានប្រមូលផ្តុំកំលាំងនៅក្នុងសាលាដើម្បីប្រើវិធីសាស្ត្រវាយផ្តួលរំលំ អតីត នាយិកាជឹង ស៊ិរីដា រហូតធ្លាក់ចេញពីតំណែង ទើបបុគ្គលល្មោភអំណាចរូបនេះ ស្ទុះរត់ជើងពីរជើងបី ដើម្បីរកខ្សែវល្លិតោងរហូតបានក្លាយជានាយករង នាពេលបច្ចុប្បន្ន និងកំពុងតែរកខ្សែកាបធំៗ ដើម្បីជួយយឹតយោងឡើងទៅកាន់ ជានាយកស្របច្បាប់ ដែលសាលានេះមានទីតាំងស្ថិតក្នុងសង្កាត់ស្លាកែត ក្រុងបាត់ដំបង។
ប្រភពដដែលបានសង្កត់ធ្ងន់ថា មិនតែប៉ុណ្ណោះ លោក សោម សុវត្ថិ ជាមនុស្សឆ្អិនក្បាលស៊ីក្បាល ឆ្អិនកន្ទុយស៊ីកន្ទុយ ហើយឆាប់ភ្លេចកំណើត ព្រោះក្រោយពីបានសម្រេចជោគជ័យរួចមក គេបានរៀបចំពិធីជប់លៀងមួយនៅក្នុងសាលា ជាមួយនឹងបុគ្គលិកសិក្សាទាំងអស់ ដែលបានចូលរួមផ្តិតមេដៃ ស្នើសុំដកនាទីរបស់អតីត នាយិកា សាលា។
ធាតុពិតឆ្កែកន្ទុយខ្វៀននៅតែខ្វៀនដដែល ព្រោះករណីដែលគេបានចោទប្រកាន់ទៅ នាយិកា ថា ពាក់ព័ន្ធនឹងអំពើពុករលួយ ដូចជា កេងប្រវ័ញ្ចទៅលើថវិកា PB និង SIG ព្រមទាំងបានកំណត់អោយបង្កើតបរិមាណ សិស្សខ្មោច យ៉ាងច្រើនផងដែរ នៅក្នុងថ្នាក់ នីមួយៗ នោះត្រូវបានលោក សោម សុវត្ថិ យកមកអនុវត្តបន្តដដែល ហើយចាប់ផ្តើមប៉ែងចោល នូវលោកគ្រូ អ្នកគ្រូណា ដែលមានគំនិតមិនយល់ស្របជាមួយខ្លួន។
ជាក់ស្តែងនាពេលបច្ចុប្បន្ននេះ បើទោះបីជាអង្គភាព ប្រឆាំងអំពើពុករលួយ ដែលមានលោក ឱម យិនទៀង ដឹកនាំប្រតិភូ ចុះទៅដល់សាលា ព្រមទាំងបានរកឃើញនូវកំហុសដែលពាក់ព័ន្ធមួយចំនួនក៏ដោយ ក៏បុគ្គលរូបនេះ នៅតែព្យាយាមចងអាឃាតទៅលើគ្រូៗមួយចំនួនដដែល ដែលគេបានតាមកម្ចាយអស់គ្រូមួយចំនួនហើយ ដោយគ្រូខ្លះបានចាកចេញពីសាលានេះហើយ។
ទោះបីជាយ៉ាងនេះក្តី ក៏លោក សោម សុវត្ថិ នៅតែបន្តពង្រីកមហិច្ឆតារបស់ខ្លួន ដោយប្រើប្រាស់វិធី « ជីកស្មៅ ត្រូវជីកទាំងឫស » ព្រោះនៅវេលាម៉ោង ៨ និង ៣០ នាទី ព្រឹកថ្ងៃទី ៧ ខែ កញ្ញា ឆ្នាំ ២០១៨ នេះលោកនាយករង បានដឹកនាំកំលាំងមួយក្រុម ចុះទៅរុះរើតូប របស់ប្រជាពលរដ្ឋសម្រាប់លក់ដូរ នំ ចំណី និងបាយ កំប៉ិកកំប៉ុក នៅក្នុងសាលា ដែលជាកម្មសិទ្ធិរបស់ឈ្មោះ ណាក់ សូរីដា ត្រូវជាកូនស្រីរបស់គ្រូដែលត្រូវបានចាកចេញពីសាលានេះ រីឯតូបចំនួន ៨ តូបទៀត គេមិនបានប៉ះពាល់ឡើយ ដែលទង្វើនេះវាហាក់បីដូចជាធ្វើទៅតាមកំហឹង ឬក៏តាមបែបគំនុំ។
ជុំវិញបញ្ហានេះ លោកចៅសង្កាត់ ស្លាកែត បានលើកឡើងថា មុននេះមួយថ្ងៃ ឃើញលោកនាយករង ទៅសុំច្បាប់អនុញ្ញាតរុះរើតូបនេះដែរ ប៉ុន្តែលោកមិនបានអនុញ្ញាតអោយទេ ព្រោះវាអាចខុសនឹងផ្លូវច្បាប់ ដោយសារតែយើងមិនបានជូនដំណឹងទៅដល់ប្រជាពលរដ្ឋអោយបានដឹងជាមុន ដោយបច្ចុប្បន្ននេះ នារីរងគ្រោះដែលជាម្ចាស់តូប លក់ដូរតាំងពីឆ្នាំ ២០១៥ មកនោះ បាន និង កំពុងដាក់ពាក្យប្តឹងនៅសាលាសង្កាត់ហើយ ដើម្បីអោយផ្លូវច្បាប់ជួយរកយុត្តិធម៌៕
Source: Kampuchea Thmey Daily
0 Comments