កិច្ចចរចាសន្តិភាពយេមែនដែលបានគ្រោងទុកត្រូវកកស្ទះនៅថ្ងៃសុក្រ ដោយសារតែក្រុមឧទ្ទាម rebel បានទាមទារលក្ខខណ្ឌជាមុនសម្រាប់ការមកដល់ទីក្រុងហ្សឺណែវ ខណៈរដ្ឋាភិបាលបានព្រមានថា ខ្លួននឹងសម្រេចចិត្តក្នុងរយៈពេលប៉ុន្មានម៉ោងថា តើត្រូវហោះហើរទៅផ្ទះវិញឬអត់។
គណៈប្រតិភូក្រុមឧទ្ទាមដែលនៅតែស្ថិតក្នុងរដ្ឋធានី សាណា របស់ប្រទេសយេមែនបានទទូចថា អង្គការសហប្រជាជាតិត្រូវបំពេញតាមការទាមទារចំនួនបីមុនពេលធ្វើដំណើរទៅកាន់ប្រទេសស្វីស។
លោក Martin Griffiths ប្រេសិតអង្គការសហប្រជាជាតិដែលមុននេះបាននិយាយថាកិច្ចប្រជុំដែលបានគ្រោងទុកនេះបានផ្តល់សញ្ញាក្តីសង្ឃឹមមួយសម្រាប់ការបញ្ចប់ជម្លោះរយៈពេលជាច្រើនឆ្នាំនោះគឺត្រូវតែពន្យារពេលចាប់ផ្តើមកិច្ចពិភាក្សា។
ការិយាល័យរបស់លោកបាននិយាយនៅក្នុងសេចក្តីថ្លែងការណ៍មួយថា “លោកនៅតែបន្តប្រឹងប្រែងដើម្បីយកឈ្នះឧបសគ្គនានាដើម្បីអនុញ្ញាតឲ្យការពិគ្រោះយោបល់នេះឆ្ពោះទៅមុខ”។ ការិយាល័យបានបន្ថែមថា លោក Griffiths នៅតែមានក្តីសង្ឃឹមថា ពួកឧទ្ទាមនឹងមក។
ការចរចារក្រុងហ្សឺណែវត្រូវបានគេចាត់ទុកថាជាលើកទីមួយចាប់តាំងពីឆ្នាំ២០១៦មកនៅពេលដែលការចរចាររយៈពេល១០៨ថ្ងៃរវាងរដ្ឋាភិបាលរបស់លោកប្រធានាធិបតី Abedrabbo Mansour Hadi និងពួកឧទ្ទាមបានបរាជ័យក្នុងការឈានដល់កិច្ចព្រមព្រៀងមួយ។
ក្រុម Huthi បានគ្រប់គ្រងរដ្ឋធានី សាណា និងភាគច្រើននៃភាគខាងជើងប្រទេសយេមែនខណៈក្រុមចម្រុះដឹកនាំដោយអារ៉ាប៊ីសាអ៊ូឌីតដែលគាំទ្ររដ្ឋាភិបាលរបស់លោក Hadi បានគ្រប់គ្រងដែនអាកាសរបស់ប្រទេសនេះ។
ដឹកនាំដោយរដ្ឋមន្ត្រីក្រសួងការបរទេសលោក Khaled al-Yamani, គណៈប្រតិភូរបស់រដ្ឋាភិបាលយេមែនបានទៅដល់ប្រទេសស្វីសកាលពីថ្ងៃពុធ។
ប៉ុន្តែនៅលើអ្វីដែលត្រូវបានគេនិយាយថាជាថ្ងៃបើកការចរចានោះ ពួកឧទ្ទាមបានចេញឧសានវាទមួយពីទីក្រុងសាណាដោយនិយាយថា ពួកគេនឹងមិនចូលរួមទេរហូតទាល់តែអង្គការសហប្រជាជាតិឆ្លើយតបទៅនឹងលក្ខខណ្ឌចំនួនបីដែលខ្លួនបានព្រមព្រៀងរួចហើយ។
ពួកគេចង់ដឹកជញ្ជូនពួកឧទ្ទាមដែលរងរបួសទៅប្រទេសអូម៉ង់ដើម្បីព្យាបាលជំងឺ ធ្វើមាតុភូមិនិវត្តន៍នៃពួកឧទ្ទាមដែលទទួលបានការព្យាបាលនៅទីនោះរួចទៅហើយនិងការធានាថាគណៈប្រតិភូរបស់ក្រុម Huthi នឹងត្រូវបានអនុញ្ញាតឲ្យវិលត្រឡប់ទៅកាន់ទីក្រុង សាណា វិញបន្ទាប់ពីកិច្ចចរចាទីក្រុងហ្សឺណែវ៕ AFP
Source: Kampuchea Thmey Daily
0 Comments