រដ្ឋាភិបាលអាមេរិកកាលពីថ្ងៃព្រហស្បតិ៍បានចោទប្រកាន់និងដាក់ទណ្ឌកម្មបុរសជនជាតិកូរ៉េខាងជើងម្នាក់ ដែលពាក់ព័ន្ធក្នុងការវាយប្រហារតាមអ៊ីនធឺណិតដោយមេរោគ WannaCry ឆ្នាំ ២០១៧និងការវាយប្រហារតាមអ៊ីនធឺណិតឆ្នាំ២០១៤លើក្រុមហ៊ុន Sony Corp។
ការចោទប្រកាន់នេះក៏បានចោទប្រកាន់ផងដែរថា អ្នក Hacker កូរ៉េខាងជើងម្នាក់នេះបាន Hack ចូលធនាគារកណ្តាលនៃប្រទេសបង់ក្លាដែសក្នុងឆ្នាំ២០១៦។
យោងតាមពាក្យបណ្តឹងនេះបានឲ្យដឹងថា លោក Park Jin Hyok បានធ្វើការជាផ្នែកមួយនៃពួក hacker មួយក្រុមដែលក៏ត្រូវបានគេស្គាល់ផងដែរថាជាក្រុម Lazarus Group ដើម្បីព្យាយាមរំលោភបំពានក្រុមហ៊ុនអាមេរិកជាច្រើនផ្សេងទៀត។
ក្រសួងរតនាគាអាមេរិកបានដាក់ទណ្ឌកម្មលើលោក Park និងក្រុមហ៊ុន Chosun Expo ដែលមានមូលដ្ឋាននៅប្រទេសចិនដែលជាកន្លែងគាត់ធ្វើការ។
បេសកកម្មរបស់កូរ៉េខាងជើងប្រចាំអង្គការសហប្រជាជាតិមិនបានឆ្លើយតបភ្លាមៗចំពោះសំណើសុំយោបល់ទេ។
នៅក្នុងឆ្នាំ២០១៤ មន្ត្រីអាមេរិកបាននិយាយថា ពួក Hacker កូរ៉េខាងជើងដែលមិនបញ្ចេញឈ្មោះបានទទួលខុសត្រូវចំពោះការលុកលុយតាមអ៊ីនធឺណិតដ៏ធំមួយចូលក្នុងក្រុមហ៊ុន Sony ដែលជាលទ្ធផលបានធ្លាយឯកសារខាងក្នុងហើយទិន្នន័យត្រូវបានបំផ្លាញ។
ការវាយប្រហារនោះបានកើតឡើងបន្ទាប់ពីក្រុងព្យុងយ៉ាងបានផ្ញើលិខិតមួយទៅអង្គការសហប្រជាជាតិដោយទាមទារឲ្យក្រុមហ៊ុន Sony កុំបញ្ចាំងខ្សែភាពយន្ត “The Interview” ដែលបង្ហាញពីការធ្វើឃាតក្រោមការឧបត្ថម្ភរបស់សហរដ្ឋអាមេរិកលើតួអង្គដែលមានរូបរាងដូចមេដឹកនាំកូរ៉េខាងជើងគីមជុងអ៊ុន។
កាលពីឆ្នាំមុន ការវាយប្រហារដោយមេរោគ WannaCry បានធ្វើឲ្យប៉ះពាល់ដល់អាជីវកម្មរាប់ពាន់នៅទូទាំងពិភពលោកតាមរយៈមេរោគកុំព្យូទ័ររួមទាំងសេវាកម្មសុខភាពជាតិចក្រភពអង់គ្លេសផងដែរដែលនៅទីនោះប្រព័ន្ធកុំព្យួទ័រមិនដំណើរការបានបង្ខំឲ្យលុបចោលការណាត់ជួបអ្នកជំងឺរាប់ពាន់នាក់៕ REUTERS
Source: Kampuchea Thmey Daily
0 Comments