ភ្នំពេញ ៖ បុរសជាជនជាតិខ្មែរម្នាក់ បានរបួសធ្ងន់ធ្ងរដោយប៉ើងពីកៅអីហោះទៅបុកនឹងកញ្ចក់រថយន្តរបស់ខ្លួន ក្រោយពីមានហេតុការណ៍គ្រោះថ្នាក់ចរាចរណ៍Range Roverបើកបរដោយជនជាតិចិនបោលបញ្ច្រាសទិសមកបុកយ៉ាងពេញទំហឹងនោះ។
ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើងកាលពីវេលាម៉ោង១២និង៣០នាទីយប់ ឆ្លងចូលថ្ងៃទី៧ ខែកញ្ញា ឆ្នាំ២០១៨ ត្រង់ចំណុចផ្លូវបំបែកជាបួន ផ្លូវ៥៩២ កែងនិងផ្លូវ៣១៣ សង្កាត់បឹងកក់២ ខណ្ឌទួលគោក រាជធានីភ្នំពេញ។
សាក្សីនៅកន្លែងកើតហេតុបានឱ្យដឹងថា នៅមុនពេលកើតហេតុ គេបានឃើញ រថយន្ត Prius ពណ៌ស្ករ ពាក់ស្លាកលេខ ភ្នំពេញ 2AV-5792 បើកបរដោយបុរសម្នាក់ ធ្វើដំណើរតាមបណ្ដោយផ្លូវ៥៩២ ទិសដៅពីលិចទៅកើត លុះមកដល់ចំណុចកើតហេតុ ស្រាប់តែមានរថយន្ត ម៉ាក Ranger Rover ពណ៌ស ពាក់ស្លាកលេខ ភ្នំពេញ 2AH-5188 បើកបរដោយបុរសជនជាតិចិនម្នាក់ ធ្វើដំណើរតាមបណ្ដោយផ្លូវ៥៩២ ទិសដៅពីកើតទៅលិច បត់ឆ្វេងដៃជ្រុលទៅបុករថយន្តព្រូស បញ្ច្រាសទិសគ្នាពេញទំហឹង បណ្តាលឲ្យតៃកុងរថយន្តព្រូសរងរបួសធ្ងន់ បែកក្បាលដោយសារបុកជាមួយកញ្ចក់រថយន្តខាងមុខ ពីព្រោះមិនដាក់ខ្សែក្រវាត់។ ភ្លាមៗក៏មានរថយន្តសង្គ្រោះដឹកទៅមន្ទីរពេទ្យផងដែរ។
ក្រោយកើតហេតុ សមត្ថកិច្ចមូលដ្ឋានចុះមកដល់ រួចទំនាក់ទំនងទៅជំនាញចរាចរណ៍ មកវាស់វែងយករថយន្តទាំង២ ទៅរក្សាទុករង់ចាំដោះស្រាយគ្នាពេលក្រោយ៕
Source: Kampuchea Thmey Daily
0 Comments