រដ្ឋមន្ត្រីក្រសួងការពារជាតិអាមេរិកលោក Jim Mattis បានទៅដល់ទីក្រុងកាប៊ុលកាលពីថ្ងៃសុក្រសម្រាប់ដំណើរទស្សនកិច្ចដែលមិនបានប្រកាសមួយទៅកាន់ប្រទេសអាហ្វហ្គានីស្ថានដែលហែកហួរដោយសង្គ្រាម។ នេះជាការបន្ថែមទម្ងន់របស់គាត់ចំពោះកិច្ចខិតខំប្រឹងប្រែងផ្នែកការទូតដើម្បីនាំពួកតាលីបង់ទៅកាន់តុចរចា។
ការធ្វើដំណើររបស់គាត់បានកើតឡើងក្នុងរយៈពេលជាងមួយឆ្នាំបន្ទាប់ពីលោកប្រធានាធិបតីអាមេរិក Donald Trump បានបង្ហាញពីយុទ្ធសាស្ត្រថ្មីមួយសម្រាប់ប្រទេសអាហ្វហ្គានីស្ថាន។
លោក Mattis ដែលបានធ្វើទស្សនកិច្ចជាលើកទី២នៅប្រទេសនេះក្នុងរយៈពេលប៉ុន្មានខែចុងក្រោយគឺនឹងជួបជាមួយលោកប្រធានាធិបតី Ashraf Ghani និងមេបញ្ជាការអាមេរិកថ្មីសម្រាប់កងកម្លាំងអាមេរិកនិងអង្គការណាតូគឺលោកឧត្តមសេនីយ៍ Scott Miller ។
ការទៅដល់របស់គាត់នៅទីក្រុងកាប៊ុលបានកើតឡើងចំពេលដ៏រសើបក្នុងសង្គ្រាមរយៈពេល១៧ឆ្នាំ។
ការប៉ះទង្គិចគ្នាបានមើលឃើញពីការរីកចម្រើនតិចតួចដោយកងកម្លាំងអាហ្វហ្គានីស្ថានឬអាមេរិកប្រឆាំងនឹងក្រុមតាលីបង់ដែលជាក្រុមសកម្មប្រយុទ្ធធំបំផុតរបស់ប្រទេសនេះ។
អាហ្វហ្គានីស្ថាននិងអន្តរជាតិបាននិងកំពុងខិតខំប្រឹងប្រែងធ្វើកិច្ចចរចាសន្តិភាពជាមួយពួកតាលីបង់ដែលត្រូវបានទម្លាក់ពីអំណាចដោយកងកម្លាំងដឹកនាំដោយអាមេរិកក្នុងឆ្នាំ២០០១។
បទឈប់បាញ់ដែលមិនធ្លាប់មានពីមុនមកកាលពីខែមិថុនានិងកិច្ចចរចាររវាងមន្ត្រីអាមេរិកនិងតំណាងក្រុមតាលីបង់នៅប្រទេសកាតាកាលពីខែកក្កដាបានជំរុញឲ្យមានក្តីសង្ឃឹមថា ការចរចានោះអាចបញ្ចប់ការប្រយុទ្ធគ្នា។
ប៉ុន្តែការវាយប្រហារនាពេលថ្មីៗនេះរបស់ក្រុមតាលីបង់និងក្រុមរដ្ឋឥស្លាមដែលបណ្តាលឲ្យកងកម្លាំងសន្តិសុខនិងជនស៊ីវិលរាប់រយនាក់ស្លាប់គឺបានធ្វើឲ្យក្តីសង្ឃឹមនោះត្រូវរសាយបាត់។
ការវាយប្រហារគ្រាប់បែកនៅក្លឹបចំបាប់មួយក្នុងសង្កាត់និកាយស៊ីអ៊ីតនៃទីក្រុងកាប៊ុលកាលពីថ្ងៃពុធគឺជាការវាយប្រហារចុងក្រោយបំផុតមួយក្នុងបណ្តាញនៃការវាយប្រហារដ៏សាហាវដែលបានសម្លាប់មនុស្សយ៉ាងតិច២៦នាក់និងរងរបួស៩១នាក់៕ AFP
Source: Kampuchea Thmey Daily
0 Comments