ភ្នំពេញ ៖ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ និងលោកជំទាវ នៅព្រឹក ថ្ងៃសៅរ៍នេះបានជួប សំណេះសំណាល និងបំពាក់គ្រឿងឥស្សរិយយសជូននិវត្តជន ដែលជាអតីតមន្ត្រីបម្រើការនៅក្នុងក្របខ័ណ្ឌក្រសួងព័ត៌មានចំនួន ៣៧៦នាក់។
ក្នុងឱកាសនេះ លោករដ្ឋមន្ត្រីបានចាត់ទុក មន្ត្រីចូលនិវត្តន៍ទាំងនេះថា នៅតែជាគ្រួសារតែមួយរបស់ក្រសួងព័ត៌មាន ដដែល។ លោកខៀវ កាញារីទ្ធ បានបន្តថា អស់លោក លោកស្រីខ្លះបានចូលរួមបម្រើការការងារ តាំងពីគ្រាដ៏លំបាកលំបិនក្រោយថ្ងៃរំដោះ ៧ មករា ១៩៧៩។ អស់លោក លោកស្រី ពិតជាបានបន្សល់ទុកនូវស្នាដៃជាច្រើនសម្រាប់ប្រទេសជាតិនៅក្នុងវិស័យព័ត៌មាន ដែលលោក លោកស្រីទាំងអស់មិនត្រូវបានបំភ្លេចចោលសោះឡើយ។
ក្នុងឱកាសនេះ លោករដ្ឋមន្ត្រីក្រសួងព័ត៌មានបានសុំឲ្យមន្ត្រីវ័យក្មេង ដែលកំពុងបម្រើការនៅក្របខ័ណ្ឌក្រសួងព័ត៌មានទាំងអស់ សុំការចែករំលែកបទពិសោធន៍ការងារពីមន្ត្រីចូលនិវត្តន៍ ដែលយើងអាចហៅពួកគាត់ថា ជាអ្នកជើងចាស់នៅក្នុងវិស័យព័ត៌មាន ដើម្បីឲ្យការបំពេញការងារ ប្រចាំថ្ងៃរបស់យើងទទួលបាននូវភាពជោគជ័យថ្មីៗបន្ថែមទៀត។
ក្នុងឱកាសនោះដែរ លោករដ្ឋមន្ត្រី និងលោកជំទាវក៏បានផ្តល់ជូននូវអំណោយ លើកទឹកចិត្ត ដល់និវត្តជនទាំង ៣៧៦នាក់ ក្នុងម្នាក់ៗទទួលបានថវិកា ១០ម៉ឺនរៀល អង្ករ និងសម្ភារៈមួយចំនួន ព្រមទាំងបានអញ្ជើញពួកគាត់ទទួលទានអាហារសាមគ្គីមួយពេលផងដែរ។
តំណាងនិវត្តជន លោក មី វ៉ាត បានសម្តែងនូវក្តីគោរពចំពោះសណ្តានចិត្តដ៏ល្អរបស់ ឯកឧត្តមរដ្ឋមន្ត្រីក្រសួងព័ត៌មាន និងលោកជំទាវដែលតែងបានគិតគូរដល់សុខទុក្ខចំពោះមន្ត្រី រាជការដែលកំពុងបម្រើការងារ ក៏ដូចជាមន្ត្រីចូលនិវត្តន៍ ដោយរដ្ឋមន្ត្រី និងលោកជំទាវតែងតែបានចាត់ទុក ទាំងអស់គ្នា គឺជាសមាជិកគ្រួសារតែមួយរបស់ក្រសួងព័ត៌មាន៕
Source: Kampuchea Thmey Daily
0 Comments