ភ្នំពេញ ៖ ក្រសួងការការងារនិងបណ្ដុះបណ្ដាលវិជ្ជាជីវៈបានស្នើឲ្យថៅកែរោងចក្រសហគ្រាសនានា អនុញ្ញាតឲ្យកម្មករបានឈប់សម្រាកចំនួន៣ថ្ងៃដើម្បីទៅចូលរួមនៅក្នុងពិធីបុណ្យភ្ជុំបិណ្ឌដែលនឹងប្រព្រឹត្តិទៅចាប់ពីថ្ងៃទី៨ ៩និងទី១០ ខែតុលា ឆ្នាំ២០១៨ខាងមុខនេះ។
ថ្លែងនៅក្នុងសេចក្តីជួនដំណឹងរបស់ក្រសួងការងារ ដែលទើបទទួលបាននៅថ្ងៃទី៧ខែកញ្ញាឆ្នាំ២០១៨ លោកបណ្ឌិត អ៊ិត សំហេង រដ្ឋមន្ត្រីក្រសួងការងារនិងបណ្ដុះបណ្ដាលវិជ្ជាជីវៈបានឲ្យដឹងថា ដើម្បីបង្កលក្ខណៈងាយស្រួលដល់កម្មករនិយោជិតបានទៅចូលរួមពិធីបុណ្យភ្ជុំបិណ្ឌខាងមុខនេះនិយោជក ឬ ម្ចាស់រោងចក្រសហគ្រាស គ្រឹះស្ថានការងារទាំងអស់ត្រូវអនុញ្ញាតឲ្យកម្មករបានឈប់សម្រាកដោយរក្សាទុកប្រាក់ឈ្នួលនិងប្រាក់រង្វាន់ធ្វើការទៀងទាត់ដូចថ្ងៃធម្មតានិងត្រូវខិតខំរៀបចំបើកប្រាក់ឈ្នួលជួនដល់កម្មករនិយោជិតឲ្យបានមុនថ្ងៃបុណ្យភ្ជុំបិណ្ឌ។
លោករដ្ឋមន្ត្រីបានបន្តថា ប៉ុន្តែបើពុំមានលទ្ធភាពបើកប្រាក់ឈ្នួលឲ្យបានទាន់ពេលទេសូមអនុញ្ញាតឲ្យកម្មករនិយោជិតទទួលបានប្រាក់បុរេប្រទានយ៉ាងតិច៥០ភាគរយមុនថ្ងៃបុណ្យភ្ជុំបិណ្ឌ។
លោករដ្ឋមន្ត្រីសង្ឃឹមយ៉ាងមុតមាំថា និយោជកឬម្ចាស់រោងចក្រ សហគ្រាស គ្រឹះស្ថានការងារទាំងអស់ នឹង អនុវត្តតាមសេចក្តីជូនដំណឹងនេះប្រកបដោយប្រសិទ្ធភាព។
លោក កាំង មូនីកា អគ្គលេខាធិការរងនៃសមាគមអ្នករោងចក្រកាត់ដេរនៅកម្ពុជាដែលហៅកាត់ថាG M ACធ្លាប់បានមានប្រសាសន៍ថាសមាគមនឹងអនុវត្តទៅតាមសេចក្តីជូនដំណឹងរបស់ក្រសួងការងារនិងបណ្តុះបណ្តាលវិជ្ជាជីវៈហើយនឹងធ្វើការផ្សព្វផ្សាយសេចក្តីជួនដំណឹងនេះទៅតាមបណ្តារោងចក្រសហគ្រាសនានាដើម្បីអនុញ្ញាតឲ្យកម្មករ កម្មការិនីបានឈប់សម្រាកទៅតាមការកំណត់របស់ក្រសួង ដោយមិនកាត់ប្រាក់ឈ្នួល ឬប្រាក់បំណាច់អ្វីទាំងអស់។
គួរបញ្ជាក់ពិធីបុណ្យភ្ជុំបិណ្ឌនៅឆ្នាំនេះនឹងប្រព្រឹត្តិទៅរយៈពេល៣ថ្ងៃគឺចាប់ពីថ្ងៃទី៨ ទី៩និងទី១០ខែតុលាឆ្នាំ២០១៨ខាងមុខនេះ៕
Source: Kampuchea Thmey Daily
0 Comments