ភ្នំពេញ ៖ ថ្លែងនៅក្នុងកិច្ចប្រជុំរួមនៅទីស្ដីការក្រសួងកាលពីថ្មីៗនេះ លោកកិត្តិសេដ្ឋាបណ្ឌិត ចម ប្រសិទ្ធទេសរដ្ឋមន្ត្រីរដ្ឋមន្ត្រីក្រសួងឧស្សាហកម្ម និងសិប្បកម្ម បានថ្លែងនូវការជំរុញឲ្យក្រុមគណៈកម្មការបច្ចេកទេសទាំង១១ បន្តកិច្ចប្រឹងប្រែងបន្ថែមទៀត លើបញ្ហាបច្ចេកទេសតាមស្ដង់ដារកម្ពុជាពិសេសគុណភាពទំនិញនិងផលិតផលផ្សេងៗទៀត។
ថ្លែងបញ្ជាក់បែបនេះ ខណៈរៀបចំកិច្ចប្រជុំលើកទី២០ របស់ក្រុមប្រឹក្សាស្តង់ដារជាតិ ក្រោមអធិបតីភាពដ៏ខ្ពង់ខ្ពស់របស់ លោកកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម និងជាប្រធានក្រុមប្រឹក្សាស្ដង់ដារជាតិកម្ពុជាតែម្ដង។
មានប្រសាសន៍នាឱកាសនោះ លោកកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បាន វាយតម្លៃខ្ពស់ និងកោតសរសើរចំពោះសមាជិកក្រុមប្រឹក្សាជាតិទាំងអស់ដែលក្នុងនោះមានគណៈកម្មការបច្ចេកទេសចំនួន១១ បានខិតខំបំពេញការងារស្នូលរបស់ខ្លួនសម្រេចបាននូវ លទ្ធផលគួរជាទីមោទនៈ ជាពិសេស ក្នុងរាជរដ្ឋាភិបាល អាណត្តិទី៥ កន្លងមកនេះ ទាក់ទងនិងបទបញ្ញត្តិបច្ចេកទេសលើវិស័យស្តង់ដារកម្ពុជា គឺការអនុម័តលើស្តង់ដារទំនិញ និងផលិតផលជាច្រើនសម្រាប់ជាមូលដ្ឋានផលិត ប្រើប្រាស់ នាំចេញ និងនាំចូលមកកម្ពុជា។
លោកកិត្តិសេដ្ឋាបណ្ឌិតបានបន្តថា ដោយសារកិច្ចប្រឹងប្រែងរបស់មន្ត្រីគណៈកម្មការទាំងអស់កន្លងមកឃើញថា មានការខិតខំមែនទើប ថ្ងៃនេះក៏មានការរៀបចំពិធីបំពាក់គ្រឿងឥស្សរិយយស និងមេដាយមុនីសារាភ័ណ្ឌតាមលំដាប់ថ្នាក់ ជូនសមាជិកក្រុមប្រឹក្សាស្តង់ដារជាតិ និងសមាជិកគណៈកម្មការ បច្ចេកទេស សរុបចំនួន ១០៥ រូបផងដែរ ដែលមាន ស្នាដៃឆ្នើមក្នុងការអភិវឌ្ឍន៍ស្តង់ដារជាតិ ក្នុងគោលបំណងលើកទឹកចិត្ត និងជំរុញឲ្យចូលរួមយ៉ាងសកម្ម ក្នុងសកម្មភាពស្តង់ដារនីយកម្ម។ ក្នុងនោះបន្តអនុវត្តន៍ដូចជាទី១-ការកែសម្រួលស្តង់ដារកម្ពុជា CS 093:2012 និងបទប្បញ្ញត្តិបច្ចេកទេស CTR 008:2015 សម្រាប់សារធាតុបន្ថែម លើម្ហូបអាហារ ដែលស្តង់ដារនេះ ត្រូវបានអនុម័តទទួលយកតាមស្តង់ដារអន្តរជាតិកូដិច អន្តរជាតិ។
ទី២-ស្តង់ដារអន្តរជាតិ IEC សម្រាប់បរិក្ខាអគ្គីសនី ប្រើប្រាស់ក្នុងលំនៅឋាន ចំនួន ១៥ស្តង់ដារ មកធ្វើជាស្តង់ដារជាតិរបស់កម្ពុជា ដើម្បីផ្តល់ភាព ងាយស្រួលដល់អង្គភាពត្រួតពិនិត្យទាំងអស់វាយតម្លៃ និងត្រួតពិនិត្យគុណភាព និងសុវត្ថិភាពបរិក្ខាខាងលើ ក្នុងទិសដៅការពារអ្នកប្រើប្រាស់ ហានីភ័យ និងបរិស្ថានដែលបង្កដោយបរិក្ខារ ទាំងនោះ។
ទី៣-ស្តង់ដារអន្តរជាតិ ISO 5001:2011ប្រព័ន្ធគ្រប់គ្រងថាមពល-ការតម្រូវជាមួយការណែនាំសម្រាប់ការប្រើប្រាស់ មកធ្វើជាស្តង់ដារជាតិរបស់កម្ពុជា ដើម្បីឲ្យក្រុមហ៊ុន/អង្គភាពទាំងអស់អាចអនុវត្តក្នុងការគ្រប់គ្រងការប្រើប្រាស់ថាមពល ធ្វើឲ្យប្រសើរឡើងនូវកម្រិតនៃការប្រព្រឹត្តថាមពលតាមរយៈការប្រើប្រាស់ឧបករណ៍ និងបរិក្ខារអគ្គីសនីដែលត្រូវបានផលិតឡើងឲ្យមានលក្ខណៈសន្សំសំចៃ និងកាត់បន្ថយផលប៉ះពាល់ដល់បរិស្ថាន ការចំណាយ ការប្រើប្រាស់ធនធានច្រើន ការបំភាយកំដៅ និងការបំពុលចំពោះបរិស្ថាន។ ស្តង់ដារនេះ ក៏ផ្តល់ជាមូលដ្ឋានសម្រាប់ការចេញវិញ្ញាបនបត្រលើការគ្រប់គ្រងថាមពលផងដែរ។
ទី៤-ស្តង់ដារអន្តរជាតិ ISO ផ្នែកវិធីសាស្ត្រ សម្រាប់គ្រឿងសង្ហារឹម ចំនួន ១១ស្តង់ដារ មកធ្វើជាស្តង់ដារជាតិរបស់កម្ពុជា ដើម្បីផ្តល់នូវមូលដ្ឋាននិងឯកសារដល់មន្ទីរពិសោធន៍ និងអង្គភាពត្រួតពិនិត្យទាំងអស់អនុវត្តសម្រាប់ការវាយតម្លៃចរិតលក្ខណៈ គុណភាព និងសុវត្ថិភាពគ្រឿងសង្ហារឹម សម្រាប់ការប្រើប្រាស់ និងសម្រាប់សម្របសម្រួលដល់ការធ្វើពាណិជ្ជកម្ម។
បន្ថែមលើការអនុម័តទទួលយកស្តង់ដារអន្តរជាតិ ISO និង IEC អង្គប្រជុំក្រុមប្រឹក្សាជាតិក៏បានពិនិត្យផងដែរ អំពីលទ្ធភាពនៃការកែសម្រួលបទប្បញ្ញត្តិបច្ចេកទេស CTR 008:2015 សម្រាប់សារធាតុ បន្ថែមលើម្ហូបអាហារដោយសារស្តង់ដារ CS 093:2012 បានធ្វើការកែសម្រួល និងការកំណត់ ស្តង់ដារអន្តជាតិ IEC ចំនួន ១៥ ស្តង់ដារខាងលើជាបទប្បញ្ញត្តិបច្ចេកទេស ដើម្បីពង្រឹងការអនុវត្តស្តង់ដារ ក្នុងទិសដៅធានាសុវត្ថិភាពដល់អ្នកប្រើប្រាស់។
ក្នុងឱកាសនោះ ជាមួយ និងការបំពាក់គ្រឿងឥស្សរិយយស និងមេដាយ មុនីសារាភ័ណ្ឌ ក៏មានពិធី ប្រគល់ព្រះរាជក្រឹត្យ និងអនុក្រឹត្យ ដោយលោកកិត្តិសេដ្ឋាបណ្ឌិត ទេសរដ្ឋមន្ត្រី ចម ប្រសិទ្ធស្តីពីការបញ្ចប់មុខតំណែង តែងតាំង និងសម្រួលភារកិច្ចថ្នាក់ដឹកនាំនៃវិទ្យាស្ថានស្តង់ដារកម្ពុជាផងដែរ ដោយហេតុថា វិទ្យាស្ថានស្តង់ដារកម្ពុជា ត្រូវប្តូរមកជា អគ្គនាយកដ្ឋានស្តង់ដារកម្ពុជា វិញ៕
Source: Kampuchea Thmey Daily
0 Comments