ភ្នំពេញ ៖ ក្រុមហ៊ុនខ្មែរ ប៊ែវើរីជីស(ស្រាបៀរកម្ពុជា) នៅតែបន្តលើកទឹកចិត្តអតិថិជនឆ្នើមរបស់ខ្លួនតាមរយៈដំណើរកម្សាន្ត ទៅប្រទេសនានា ជាពិសេសនៅថ្ងៃទី៦ ខែកញ្ញា ឆ្នាំ២០១៨ នេះអតិថិជនឆ្នើមចំនួន១៨០នាក់ ត្រូវបានធ្វើដំណើរកម្សាន្តទៅកាន់ទីក្រុងសេអ៊ូល (SEOUL)ប្រទេសកូរ៉េខាងត្បូង រយៈពេល៥ថ្ងៃ។
លោក លាង ពៅ (ភីតធើ) អគ្គនាយកក្រុមហ៊ុនខ្មែរ ប៊ែវើរីជីស បានថ្លែង ក្នុងឱកាសជួបជុំ ជាមួយអតិថិជនឆ្នើមនៅអាកាសយានដ្ឋានអន្តរជាតិភ្នំពេញថា" ក្រុមហ៊ុន ខ្មែរ ប៊ែវើរីជីស តែងតែរៀបចំដំណើរកម្សាន្តទៅកាន់គោលដៅល្បីៗ នៅលើពិភពលោកសម្រាប់អតិថិជនយើង។ ហើយថ្ងៃនេះដំណើរកម្សាន្តរបស់យើងគឺទៅកាន់ ប្រទេសកូរ៉េខាងត្បូងដែលមានទិដ្ឋភាពដ៏ស្រស់ស្អាត។ ក្នុងដំណើរកម្សាន្តនេះ យើងនឹងទៅទស្សនាតំបន់ទេសចរណ៍ល្បីៗមួយចំនួនក្នុងប្រទេសកូរ៉េខាងត្បូង ដែលរួមមានដូចជា ព្រះរាជវាំងក្យុងបុក ប៉មសេអ៊ូល កោះណាមី និងសួនកំសាន្តអេវើលែនជាដើម។
លោកបានបន្តថា ដំណើរកម្សាន្តលើកនេះ មានរយៈពេល៥ថ្ងៃ និងមានអតិថិជនឆ្នើមចំនួន១៨០នាក់ចូលរួមក្នុង ដំណើរកម្សាន្តដ៏រំភើបនិងរីករាយនេះ។ ព្រោះថា ប្រទេសកូរ៉េ គឺជាប្រទេសមួយដែលកំពុងតែទទួលបានការចាប់អារម្មណ៍យ៉ាងខ្លាំង ដោយសារការរីកចម្រើនខាងវិស័យសិល្បៈ រមណីយដ្ឋានស្រស់ស្អាត ហាងទំនិញ និងកន្លែងកម្សាន្តជាច្រើន។ ពិសេស យើងនឹងនាំអតិថិជនយើងទៅកាន់តំបន់ទេសចរណ៍ដែលពេញនិយមបំផុតក្នុងប្រទេសកូរ៉េ គឺកោះណាមី ដែលជាតំបន់ធម្មជាតិស្រស់ត្រកាល និងរ៉ូមែនទិកបំផុត ហើយជាពិសេសកោះនេះជាកន្លែងថតខ្សែភាពយន្តកូរ៉េដ៏ល្បីឈ្មោះ។ មិនតែប៉ុណ្ណោះ ពួគគាត់ក៏អាចទស្សនាទេសភាពដ៏អស្ចារ្យនារដូវស្លឹកឈើជ្រុះផងដែរ។
លោកបានបញ្ជាក់ថា ក្រុមហ៊ុន ខ្មែរ ប៊ែវើរីជីស តែងផ្តល់ជូនអតិថិជននូវអ្វីដែលល្អជាងគេ។ សម្រាប់ឱកាសដំណើរកម្សាន្តទាំងនេះ អតិថិជនត្រូវលក់ស្រាបៀរកម្ពុជា និងផលិតផលផ្សេងៗរបស់ក្រុមហ៊ុន ខ្មែរ ប៊ែវើរីជីស ទៅតាមគោលដៅដែលក្រុមហ៊ុន បានកំណត់ឲ្យ៕
Source: Kampuchea Thmey Daily
0 Comments