ព្រឹត្តិការណ៍ដណ្តើមខ្សែក្រវាត់Wurkzទម្ងន់៦៣,៥០០គីឡូក្រាម នៅលើសង្វៀនSEA –TV បានឈានដល់វគ្គផ្តាច់ព្រ័ត្រហើយ នាល្ងាចថ្ងៃអាទិត្យទី០៩ ខែកញ្ញា ឆ្នាំ២០១៨នេះ រវាងឡុង សំណាង អ្នកប្រដាល់ក្លិបសាលវ័ន្តកីឡា និង Pek Thiengអ្នកប្រដាល់ថៃ។
ឡុង សំណាង និង Pek Thieng ពួកគេពីរនាក់នេះ ត្រូវបានក្រុមអ្នកវិភាគកីឡាប្រដាល់ក្នុងស្រុករំពឹងទុកថា ឡុង សំណាងនឹងក្លាយជាម្ចាស់ជើងឯកខ្សែWurkzទម្ងន់៦៣,៥០០គ.ក្រនេះ ព្រោះថាឡុង សំណាងធ្លាប់បានយកឈ្នះPek Thiengនេះក្នុងទឹកទី៤ ម្តងរួចទៅហើយ នៅក្នុងការជួបគ្នាក្នុងវគ្គជម្រុះក្នុងពូលនោះ។
ក្នុងការប្រកួតវគ្គជម្រុះក្នុងពូលកន្លងមក ឡុង សំណាង ដែលមាន៤ប្រកួតនោះ គេវាយឈ្នះថៃទាំង៤ប្រកួត គឺបាន១២ពិន្ទុ ។ អ្នកប្រដាល់ក្លិបសាលវ័ន្តកីឡារូបនេះ មានកំនត់ត្រាប្រកួត៧៩លើក ឈ្នះ៦៦លើក ចាញ់១០លើក និងស្មើ០៣លើក។
ចំពោះ Pek Thiengវិញ គេមានស្នៀតគុនល្អ និងវាយខ្លាំងដែរ តែបើប្រៀបជាមួយឡុង សំណាងនោះ មិនដឹងថាយ៉ាងណានោះទេ ។ក្នុងការប្រកួតជម្រុះ៤លើកនោះ Pek Thiengវាយឈ្នះ៣ ចាញ់១លើក បាន១០ពិន្ទុ ។ Pek Thieng គេមានប្រវត្តិប្រកួតចំនួន៦១លើក ឈ្នះ៥២លើក ចាញ់០៩លើក មិដែលស្មើ។
ប៉ុន្តែយ៉ាងណា Pek Thieng មិនប្រាកដថាចាញ់ឡុង សំណាង នោះទេ ព្រោះថាការដែលបានឡើងមកដល់វគ្គផ្តាច់ព្រ័ត្រនោះ ពួកគេទាំងពីរគឺមិនធម្មតានោះឡើយ ។ដូច្នេះ ចាំមើលរវាងឡុង សំណាង និង Pek Thieng តើនរណានឹងក្លាយជាម្ចាស់ខ្សែក្រវាត់Wurkzទម្ងន់៦៣,៥០០គីឡូក្រាមនេះ ? ។
ចំពោះគូដែលប្រកួតអមគូខ្សែក្រវាត់នេះ ជាការប្រកួតលក្ខណះអន្តរជាតិ ដែលក្នុងនោះយុគ យក្សផ្លែ អ្នកប្រដាល់ក្លិបបូរីរាជសីហ៍មានរិទ្ធ នឹងត្រូវជួបជាមួយអ្នកប្រដាល់ថៃឈ្មោះKamlay Yuok ដោយប្រកួតក្នុងប្រភេទទម្ងន់៥៧គ.ក្រ។
អ្នកប្រដាល់ថៃ ដែលយុគ យក្សផ្លែ ត្រូវតស៊ូជាមួយនោះ ជាជើងខ្លាំងមួយរូបនៅស្រុកថៃ ។ Kamlay Yuok គេមានជំនាញប៉ិនប្រសប់ក្នុងការប្រកណ្តាប់ដៃ ដោយសារគេធ្លាប់វាយប្រដាល់សាកល ។ គេមានប្រវត្តិប្រកួត៨៨លើក ដោយវាយឈ្នះ៧០លើក ចាញ់១៧លើក និងស្មើ០១លើក ខណះដែលយុគ យក្សផ្លែ គេមានប្រវត្តិប្រកួតចំនួន១៥៩លើក ឈ្នះ១៣២លើក ចាញ់២៣លើក និងស្មើ០៤លើក។
Kamlay Yuok ធ្លាប់វាយឈ្នះយុគ យក្សផ្លែក្នុងទឹកទី៤ម្តងហើយកាលពីឆ្នាំ២០១៦កន្លងទៅ ។គេមកប្រកួតលើកចុងក្រោយនៅសង្វៀនSEATVនេះ គេបានវាយចាញ់អ្នកប្រដាល់ជើងខ្លាំងវ័យក្មេងក្លិបរាហ៊ូកីឡាខេត្តបាត់ដំបង ឈុត សេរីវ៉ាន់ថង ដោយពិន្ទុ ។
សម្រាប់លើកនេះ មិនដឹងថា Kamlay Yuok អាចយកឈ្នះយុគ យក្សផ្លែ បានទៀតឬក៏អត់នោះទេ? ព្រោះយក្សផ្លែ ការប្រកួតចុងក្រោយនៅក្នុងស្រុក គេវាយស្មើជាមួយអ្នកប្រដាល់ម្ចាស់មេដាយសំរិទ្ធស៊ីហ្គេម វ៉ាន់ វឿន កាលពីថ្ងៃទី១៩សីហាកន្លងមកនេះ ។
ទោះជាយ៉ាងណា ការឈ្នះចាញ់រវាងយុគ យក្សផ្លែ និង Kamlay Yuok នេះ ពុំមាននរណាហ៊ានទាយមុនថាអ្នកណាឈ្នះនោះទេ សម្រាប់ការប្រកួតផ្តាច់ព្រ័ត្រដណ្តើមខ្សែក្រវាត់ជើងឯកWurkz ទម្ងន់៥៣,៥០០គីឡូក្រាមនេះ៕
Source: Kampuchea Thmey Daily
0 Comments