ភ្នំពេញ ៖ ជនជាតិអាមេរិកាំងម្នាក់ ព្រោះតែការប្រើប្រាស់ថ្នាំញៀនលើសចំណុះពេកនោះ បានបណ្តាលឲ្យគាំងបេះដូងស្លាប់កាលពីថ្ងៃព្រហស្បតិ៍ ១១រោច ខែស្រាពរណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៦ ខែកញ្ញា ឆ្នាំ២០១៨ វេលាម៉ោង៤ និង១០នាទីរសៀល ស្ថិតនៅទីតាំងផ្ទះលេខ១៤២អា៣ ផ្លូវលេខ១៧២ ក្រុម១៨ ភូមិ៤ សង្កាត់ជ័យជំនះ ខណ្ឌដូនពេញ ក្នុងបន្ទប់លេខ អា១៩ ជាន់ទី២នៃផ្ទះសំណាក់យីហោ(ហ្គោលឌិនហូម)។
សមត្ថកិច្ចបានឲ្យដឹងថា ជនរងគ្រោះត្រូវបានគេស្គាល់ឈ្មោះ BELLOUMO ARTHURFRANKSTANLY ភេទប្រុស អាយុ២៧ឆ្នាំ កាន់លិខិតឆ្លងដែនលេខ ៥៦៥៥៩៦៤៥៨ ស្នាក់នៅបណ្តោះអាសន្នផ្ទះសំណាក់កើតហេតុ។
បើតាមសេចក្តីរាយការណ៍ព័ត៌មានបានឲ្យដឹងថា នៅថ្ងៃទី៤ ខែកញ្ញា ឆ្នាំ២០១៨ វេលាម៉ោង៧ និង៣០នាទីយប់ ជនរងគ្រោះបានមកជួលបន្ទប់នៃផ្ទះសំណាក់យីហោហ្គោលឌិនហូម ស្នាក់នៅក្នុងតម្លៃ១ថ្ងៃចំនួន៦ដុល្លារ។ លុះដល់ថ្ងៃទី៥ ខែកញ្ញា វេលាម៉ោង១០ និង៣០នាទី ជនរងគ្រោះបានជិះម៉ូតូចេញពីផ្ទះសំណាក់ ដោយដឹកសង្សារចេញពីអាកាសយានដ្ឋានអន្តរជាតិភ្នំពេញ រហូតដល់ម៉ោង១ និង៣០នាទី ទើបឃើញជនរងគ្រោះជិះម៉ូតូត្រឡប់មកវិញ ហើយឡើងទៅសម្រាក់នៅបន្ទប់រហូតដល់ម៉ោងប្រហែលជាម៉ោង៧យប់ ជនរងគ្រោះបានចុះពីបន្ទប់មកក្រោម ហើយជិះម៉ូតូចេញក្រៅបាត់តែម្តង។
ប្រភពព័ត៌មានបានឲ្យដឹងទៀតថា លុះដល់ម៉ោង២៣ និង១០នាទីយប់ ទើបឃើញជនរងគ្រោះជិះម៉ូតូត្រលប់មកវិញ ហើយឡើងទៅសម្រាកក្នុងបន្ទប់លេខអា១៩ ជាន់ទី២វិញ រហូតដល់ម៉ោង២រសៀលខែឆ្នាំដដែល ដោយមិនឃើញជនរងគ្រោះចេញពីបន្ទប់ ទើបឈ្មោះ ភ័ក្រ ជាបុគ្គលិកផ្ទះសំណាក់ បានឡើងទៅគោះទ្វារជាច្រើនដងតែពុំមានការឆ្លើយតប។ ដោយមានការសង្ស័យក៏បើកទ្វារចូលមើល ស្រាប់តែឃើញជនរងគ្រោះដេកផ្កាប់មុខលើគ្រែ ដោយពុំមានសម្លៀកបំពាក់ជាប់នឹងខ្លួននោះទេ ក៏រត់ចុះមកក្រោមវិញរាយការណ៍ប្រាប់ថៅកែ និងសមត្ថកិច្ចឲ្យជ្រាបពីដំណឹងនេះផងដែរ។
តាមការពិនិត្យរបស់គ្រូពេទ្យកោសល្យវិច័យ និងនគរបាលការិយាល័យបច្ចេកទេសវិទ្យាសាស្ត្របានឲ្យដឹងថា ការស្លាប់របស់ជនរងគ្រោះខាងលើនេះ ព្រោះតែការប្រើប្រាស់ថ្នាំញៀនប្រភេទម៉ហ្វីន និងបេតំហ្វេតាម៉ីនលើសកម្រិតពេកទើបបណ្តាលឲ្យគាំងបេះដូង។
បច្ចុប្បន្នសពបានបញ្ជូនទៅតម្កល់នៅមន្ទីរពេទ្យខ្មែរសូវៀត។ ចំណែកសំភារៈរបស់ជនរងគ្រោះបានប្រគល់ជូនខាងការិយាល័យស៊ើបអង្កេតនិងអនុវត្តនីតិវិធីដើម្បីរក្សាទុក៕
Source: Kampuchea Thmey Daily
0 Comments