បាត់ដំបង ៖ សត្វគោចំនួន៥ ក្បាល ដែលអាយុនៅថ្លៃត្រូវបានរួចខ្លួនពីកណ្តាប់ដៃចោរមកវិញ ហើយក៏ជាសំណាងរបស់ម្ចាស់គោដែរ បន្ទាប់ពីសត្វគោទាំងនេះត្រូវបានជនមិនស្គាល់មុខលួចយកបានហើយ ប៉ុន្តែត្រូវបានរួចខ្លួនមកវិញ ដោយសារតែចោរមានការភ្ញាក់ផ្អើលជាមួយនឹងប្រជាពលរដ្ឋដែលចុះមកបត់ជើងក្នុងពេលយប់ ចំពេលដែលចោរកំពុងដឹកគោមកដល់ល្មម។
ការភ្ញាក់ផ្អើល និងឆោឡោឡើងនេះ គឺនៅវេលាម៉ោង ១ រំលងអធ្រាត ឈានចូល ថ្ងៃទី២៤ ខែកញ្ញា ឆ្នាំ២០១៨ ត្រង់ចំណុចភូមិប៉ោយស្វាយ ឃុំតាគ្រាម ស្រុកបាណន់ ខេត្តបាត់ដំបង ដោយសារតែមានចោរចំនួន ២នាក់ មិនស្គាល់អត្តសញ្ញាណ បានធ្វើសកម្មភាពលួចគោអ្នកស្រុក យ៉ាងស្ងៀមស្ងាត់។
បើតាមប្រភពនៅទីនោះបាននិយាយថា នៅពេលដែលជនសង្ស័យលួចគោបានចំនួន៥ក្បាល រួចហើយ បានដឹកតាមក្រោយភូមិ លុះមកដល់ខាងក្រោយផ្ទះឈ្មោះឈឿន សុខាហៅជុក ភេទប្រុស អាយុ៣៦ឆ្នាំ រស់នៅភូមិឃុំខាងលើ ស្របពេលដែលម្ចាស់ផ្ទះនោះបានចុះមកបត់ជើង ក៏ពើបប្រទះនឹងគ្នា ដោយមានការសង្ស័យទើបឈ្មោះ ឈឿន សុខា បានស្រែកហៅឪពុក គ្រាន់តែឮប៉ុណ្ណឹង ស្រាប់តែចោរទាំង២នាក់ បានរត់ចោលគោទាំង ៥ ក្បាល ដែលក្នុងនោះមាន មេធំ៣ក្បាល កូនតូច២ក្បាល ផងដែរ។
ក្រោយពីសមត្ថកិច្ចបានចុះទៅពិនិត្យ និងបន្ទាប់ពីមានការភ្ញាក់ផ្អើលទាំងយប់រួចមក ទើបគេដឹងថា គោទាំង ៥ ក្បាលនេះ ជារបស់ឈ្មោះ ចម ឃើន ភេទប្រុស អាយុ៥៨ឆ្នាំរស់នៅភូមិប៉ោយស្វាយ ឃុំតាគ្រាម នោះដែរ។ បច្ចុប្បន្នគោទាំងអស់ ត្រូវបានសមត្ថកិច្ចប្រគល់ទៅឲ្យម្ចាស់វិញហើយ ដោយឡែកមុខសញ្ញា កម្លាំងកំពុងធ្វើការស្រាវជ្រាវ៕
Source: Kampuchea Thmey Daily
0 Comments